Read Shekhawati 1 थिसलूनिकी 2 Bible Online

1 थिसलूनिकी 2 - Shekhawati bible

1 थिसलूनिकी 2

¹मेरा लाडला बिस्वास्यो, आ बात थे खुदई जाणो हो क म्हारो थारै कनै आबो अळीयो कोनी गयो।

²अर आबी जाणो हो क थिसलूनिकी आबाऊँ पेल्या फलिपी म म्हें दुख उठाया अर बेजत कर्या गया। अर जद म्हें थिसलूनिकी म आया जणा अठै बी म्हारो खूब बिरोद होयो पण परमेसरऊँ अंय्यां की हिमत मिली क बिना डर थानै चोखो समचार सुणावां।

³क्युं क म्हारो उपदेस झूठो, धोको देबाळो अर छळकपट करबाळो कोनी,

⁴पण जंय्यां परमेसर म्हानै इ जोगो जा'णर चोखा समचारनै सुणाबा को काम सूप्यो ह, म्हें इनै बंय्यांई बतावां अर अंय्यां कर म्हें मिनखानै कोनी पण परमेसरनै जखो हियानै परखै ह राजी करां हां।

⁵थे इ बातनै सूल जाणो हो क म्हें कदैई लालाचोपड़ी की बाता कोनी करी। अर नइ म्हें अंय्यां की कोई बाता बोली जिऊँ थारो धन लूटां , अर आ बाता को परमेसरई गुवा ह।

⁶अर म्हें आ कोनी चावां क मिनख म्हारो मान करै अर नइ म्हें थारूँ अर दुसराऊँ आदरमान चायो। जदकी म्हें मसी का भेजेड़ा चेला होबा क नातै थारै प हक जमा सका हा।

⁷पण जंय्यां माँ आपका टाबरा की खेचळ करै ह बंय्यांकोई नरमाई को भेवार म्हें थारै सागै राख्यो। नहिस म्हें मसी का भेजेड़ा चेला होबा क चलतै थार प रोब जमार बोज गेर सकां।

⁸पण थारै ताँई म्हारा प्यार-परेम क चलतै म्हें थानै चोखो समचारई कोनी सुणाया, पण इकै सागै थारै ताँई ज्यान देबानै बी राजी हां क्युं क थे म्हारा प्यारा बणग्या हा।

⁹मेरा लाडला बिस्वास्यो, म्हें जाणा क थे म्हारी मेनतनै जखी म्हें थार ताँई करी अर दुखानै याद राखो हो। अर थानै पक्काई याद होगो क जद म्हें थानै परमेसर को चोखो समचार सुणार्या हा बि टेम का म्हारो पेट भरबा ताँई रात-दिन कंय्यां मेनत करी। क्युं क म्हें थार प म्हारो बोज कोनी लादबो चावा हा।

¹⁰थे खुद अर परमेसर इ बात का गुवा हो क थारै बिस्वास्या म म्हारो भेवार कंय्यां को पबितर, धारमिक अर बेदाग हो।

¹¹क्युं क थे जाणो हो क, जंय्यां बाप आपका टाबरा क सागै भेवार करै ह बंय्यांई म्हें थारै सागै भेवार राख्यो।

¹²थारै मऊँ हरेकनै हिमत बंधाता, तसली देता अर समजाता हा क थारो चाल-चलन परमेसर जोगो होवै जखो थानै आपका राज अर मेमा म बुलावै ह।

¹³म्हें इ ताँई बी थारै ताँई परमेसर को धनेवाद करता कोनी रूकां, क जद म्हें थानै परमेसर को चोखो समचार सुणायो हो जणा थे इनै मिनखा कानि को कोनी जाण्या पण परमेसर को जा'णर इनै मान्या अर सच बी ओई ह, इ बजेऊँ परमेसर थारै म जखा बिस्वास करो हो काम करै ह।

¹⁴भाई-भाणो थारै सागै बी बाई होई जखी यहूदिआ दिसावर म परमेसर की बिस्वासी मंडळी क सागै होई ही, क्युं क बे बी थारी जंय्यां मसी ईसुनै मानता हा। अर थानै बी थारा मिनखाऊँ बंय्यांई दुख मिल्यो जंय्यां बानै यहूदि मिनखाऊँ मिल्यो।

¹⁵जखा परबु ईसुनै अर परमेसर की खेबाळानै मार्या अर आपानै दिन घाल्या बाऊँ परमेसर बोळो नराज ह क्युं क बे सगळा क विरोध म हीं।

¹⁶अर बे गैर-यहूदि मिनखानै छुटकारा को चोखो समचार सुणाबा ताँई आपानै रोकै ह। अंय्यां करबाऊँ बाकै पाप को घड़ो भरर्यो ह अर परमेसर को परकोप बापै आग्यो ह।

¹⁷मेरा लाडला बिस्वास्यो, जद म्हें क्युंक दिना ताँई थारूँ कायाऊँ दूर हा पण हियाऊँ तो थारै कनैई हा, जणाबी म्हानै थारी बोळी उसेर आई अर थारूँ ओज्यु मिलबा की म्हें बोळी कोसिस करी।

¹⁸इ ताँई म्हें थारै कनै ओज्यु आबो चायो, जदकी म खुद, पोलुस दो बर थारै कनै आबा की कोसिस करी पण सेतान म्हानै रोक्या राख्यो।

¹⁹थेई बताओ, आपणा परबु ईसु क सामै बिका आबा की टेम म्हारै ताँई म्हारी आस, खुसी अर बडाई को मुकट कूण होसी? बे थेई कोनी होस्यो के?

²⁰सच म म्हारी बडाई अर खुसी थेई हो।