Read Shekhawati 1 थिसलूनिकी 5 Bible Online

1 थिसलूनिकी 5 - Shekhawati bible

1 थिसलूनिकी 5

¹मेरा लाडला बिस्वास्यो, परबु क ओज्यु आबा की घड़ी अर दिन क बारां म म्हानै मांडबा की जुर्त कोनी।

²क्युं क थे खुद, इ बातनै सूल जाणो हो क, परबु क ओज्यु आबा को दिन बंय्यां आसी जंय्यां रात म चाणचुक चोर आवै ह।

³जद मिनख खेसी, “सक्यु चोखो ह, अर क्युंई डर कोनी,” जणा बापै चाणचुक परकोप आ पड़सी जंय्यां चाणचुकै पेटहाळी क दरद चालू होवीं हीं। अर बे कंय्यांई कोनी बचसी।

⁴पण भाईड़ो, थे तो अँधकार म कोनी जिर्या, क परबु क ओज्यु आबो को दिन थार प चोर की जंय्यां चाणचुक आवै।

⁵क्युं क थे इब दिन का च्यानणा म चालो हो, थे रात का अँधकारऊँ न्यारा होगा हो।

⁶इ ताँई दुसरा की जंय्यां आपानै सुत्यो नइ रेह्णो चाए, पण खुदनै बस म राख'र चेता म अर जागतो रेह्णो चाए।

⁷क्युं क जखा सोवै ह बे रातनैई सोवै ह, अर पीबाळा रातनैई पीर मतवाळा होवै ह।

⁸पण आपा जखा दिन का च्यानणा म चालां हां बानै चाए क बे खुदनै बस म राख'र बिस्वास अर प्यार-परेम की झिलम पेरीं अर छुटकारो पाबा की आसनै टोपला की जंय्यां पेरीं।

⁹क्युं क परमेसर आपणा प आपकी झाळ काडबा ताँई नइ पण परबु ईसु मसी क जरिए पापऊँ छुटकारो पाबा ताँई टाळ्या ह।

¹⁰ईसु मसी आपणै ताँई मर्यो। इ ताँई आपा सगळा बिकै सागै सदाई जिस्यां, चाए बिकै आबा की टेम आपा जीवता रेह्‍वां नहिस मरेड़ा होवां।

¹¹इ ताँई जंय्यां थे करता आर्या हो बंय्यांई एक दुसरानै हिमत अर सारो द्‍यो।

¹²मेरा लाडला बिस्वास्यो, म्हें थारूँ आ बिणती करां हां क मंडळी का अगुवा जखा थारै ताँई मेनत करै, परबु म थानै गेलो दिखावै अर सीख देवै ह बाको आदरमान करो।

¹³बाका कामा की बजेऊँ प्यार-परेम क सागै बानै बोळा आदरमान क जोगा जाण्या करो अर आपसरी म मेळमिलापऊँ रेह्ओ।

¹⁴मेरा लाडला बिस्वास्यो, म्हें थानै समजावां हां क, जखा कामऊँ जी चुरावै ह बानै समजाओ, डरपोकानै हिमत बंधाओ, माड़ानै समाळो अर सगळा क सागै नरमाई बरतो।

¹⁵कोईबी बुराई क बदलै बुराई नइ करै, पण सगळा मिनखा को अर एक दुसरा को भलो करबा की कोसिस करता रेह्ओ।

¹⁶सदाई राजी-खुसी रेह्ओ।

¹⁷अरदास करबा म लाग्या रेह्ओ।

¹⁸हर हाल म परमेसरनै धनेवाद देता रेह्ओ, क्युं क थारै ताँई मसी ईसु म परमेसर की आई इंछ्या ह।

¹⁹पबितर आत्मा की अणसुणी मना करो।

²⁰परमेसर की खेबाळा की खयड़ी बातानै माड़ी मना जाणो।

²¹सगळी बातानै बिचासो अर जखी चोखी ह बानै पकड़्या रेह्ओ।

²²सगळी बुराईऊँ बच्या रेह्ओ।

²³स्यांती देबाळो परमेसर खुदई थानै सूल पबितर करै। थारी आत्मा, पिराण अर काया आपणा परबु ईसु मसी क ओज्यु आबा का दिन ताँई बेदाग रेह्‍वै।

²⁴थानै बुलाबाळो परमेसर बिस्वास जोगो ह, अर बो इनै पूरो करसी।

²⁵मेरा लाडला बिस्वास्यो, म्हारै ताँई बी अरदास कर्या करो।

²⁶सगळा परमेसर का मिनखाऊँ हात जोड़र जे मसी की कर्या करो।

²⁷आ चिठी सगळा भायानै बाचर सुणाज्यो इ ताँई म थानै परबु क सामै ओडाऊँ हूँ।

²⁸आपणा परबु ईसु मसी की दया थार प होती रेह्‍वै।