Read Shekhawati 2 थिसलूनिकी 3 Bible Online

2 थिसलूनिकी 3 - Shekhawati bible

2 थिसलूनिकी 3

¹मेरा लाडला बिस्वास्यो, आखीर म, म्हें एकोर बात थारूँ चावां हां क थे करो, म्हारै ताँई बी अरदास कर्या करो, जिऊँ परबु को चोखो समचार जंय्यां थारै बिचमै फेल्यो हो बंय्यांई तावळो ओर मिनखा म बी फेलै अर आदरमान पावै।

²अरदास कर्या करो क परबु म्हानै बेकार अर बुराई करबाळा मिनखाऊँ बचावै। क्युं क हरेक मिनख परमेसर प बिस्वास कोनी राखै।

³पण परबु बिस्वास जोगो ह। बोई थानै ताकत देसी अर सेतानऊँ बचासी।

⁴परबु म म्हानै थार प पक्को बिस्वास ह क म्हें थानै जंय्यां करबा ताँई आदेस दिन्यो हो थे बंय्यांई करर्या हो अर करता रेहस्यो।

⁵परबु थारा हियानै परमेसर का परेमनै समजबा की अर मसी की जंय्यां बरदास करबा की सक्‍ति देवै।

⁶मेरा लाडला बिस्वास्यो, म्हें थानै परबु ईसु मसी म ओ आदेस देवां हां क, हरेक अंय्यां का बिस्वासी भाईड़ाऊँ नाकैई रेह्ज्यो जखो कामऊँ जी चुरावै ह। अर जखी सीख म्हें बिनै दिनी ह बिकै गेल कोनी चालै।

⁷थे खुद जाणो हो क थे म्हारी मिसाल प कंय्यां चाल सको हो, क्युं क जद म्हें थारै सागै हा जणा कमारई खाता हा,

⁸अर कोईकिई फोकट की रोटी कोनी खाई; पण रात-दिन मेनत अर दुख उठार काम-धंधो करता हा, जिऊँ थार प बोज कोनी बण्या।

⁹अंय्यां करबा क पिछै आ बात कोनी ही क थारै कनैऊँ म्हानै खाबा को हक कोनी हो; पण म्हें चावां हां क थे म्हानै देखर सीखो अर म्हारी जंय्यां जीओ।

¹⁰क्युं क जद म्हें थारै सागै हा जणा ओ आदेस दिओ हो क, “ज कोई काम कोनी करै बिनै खाबा ताँई बी मना द्‍यो।”

¹¹म्हें सुण्या हा क थारै मांयनै क्युंक मिनख सई गेलै कोनी चालै अर काम-धंधो कोनी करै। पण दुसरा का कामा म टांग अड़ावै।

¹²अंय्यां का मिनखानै परबु ईसु मसी म म्हें आदेस देवां हां अर समजावां हां क, बे हद म रेह्‍वै अर खुद कमार खावीं।

¹³ओ मेरा लाडला बिस्वास्यो, थे भला काम करबा ताँई कदैई हिमत मना हारज्यो।

¹⁴ज कोई म्हारी इ चिठी म मांडेड़ी बातानै कोनी मानै बापै निगा राखो अर बाका संगराऊँ दूरई रह्यो जिऊँ बाको सीर निचो होज्यावै।

¹⁵पण बिनै बेरी मना जाणज्यो, पण सागे भाई-भाण जा'णर चेताओ।

¹⁶परबु जखो खुद स्यांती को दातार ह बो हर टेम थारै सागै रेह्‍वै अर थारा हर हाल म थानै स्यांती देवै।

¹⁷चिठी का इ भाग म, म पोलुस, मेरै खुदका हातऊँ थानै जे मसी मांडूँ हूँ। अर अंय्यां चिठी का आखरी भाग म मेरै हात की लिखावटई तो मेरी चिठ्या की पिछाण ह, क आनै भेजबाळो मई हूँ।

¹⁸थारै सगळा प आपणा परबु ईसु मसी की दया होती रेह्‍वै।