Read Shekhawati 1 तिमूतियूस 5 Bible Online

1 तिमूतियूस 5 - Shekhawati bible

1 तिमूतियूस 5

¹जद तू बूडा-ठेरा मिनखानै चेतावै जणा बानै मना दकालजे, पण बाऊँ ईज्जतऊँ बोलजे जंय्यां क खुदका बापऊँ बोलै ह। अंय्यांई जवान मोट्यारा क सागै खुदका भाई की जंय्यां बरताव कर।

²अर बूडी-ठेरी लूगायानै माँ जंय्यां अर जवान लूगायानै पूरी खराई क सागै भाण समजर बरताव कर।

³बा खालीहोइड़ी लूगाया की ईज्जत कर जाकी देखभाळ करबाळो कोई कोनी।

⁴पण ज कोई खालीहोइड़ी क टाबर-टिकर, दोइती-दोय्ता नहिस पोती-पोता होवै जणा आ टाबरानै सऊँ पेल्या चाए क, अ आपका परवार क सागै भगती को बरताव करै। अर आपका माँ-बाप दादी-दादा की सेवा कर बाकै उपकार को जस दे, क्युं क अंय्यां करबाऊँ परमेसर राजी होवै ह।

⁵बा जखी सचमई खालीहोइड़ी लूगाई ह जिकै कनै बिकी साळसमाळ करबाळो कोई कोनी, अर जखी परमेसर म आस राखै ह अर रात-दिन अरदास करै ह अर परमेसरऊँ मदद माँगै ह।

⁶पण जखी खालीहोइड़ी लूगाई मोज-मस्ति म पड़गी बा जीता-जी मरगी।

⁷आ सगळानै आ बाता ताँई आदेस दे जिऊँ बापै कोई लालछण नइ लागै।

⁸पण ज कोई आपका रिस्तेदारा की, खासकर आपका घरहाळा की साळसमाळ नइ करै जणा बो बिस्वासऊँ मुकरगो ह अर बो एक बिस्वास नइ करबाळाऊँ बी भत्तर होगो ह।

⁹बि खालीहोइड़ी लूगाई को नाम इ बिदवा सायता सूची म मांडजै जखी साठ बरसऊँ कम नइ होवै, अर बा एकरई ब्याईड़ी होवै,

¹⁰जिको चोखा काम करबा म नाम होयड़ो हो, अर जखी आपका टाबरानै सूल पाळी हो, जखी पराया अर अणजाण मिनखा की आवभगत करी हो, परमेसर का मिनखा को खुदका घर म आवभगत करी हो, दिन-दुखीया की मदद करी हो, अर जखी खुदनै चोखा काम करबा म लगादि होवै।

¹¹पण जवान खालीहोइड़ी लूगाया को नाम बिदवा सायता सूची म मना मांडजै। क्युं क मसी बई बाकी भगती प जद बिकी काया की इंछ्या सवार होवै जणा बे ब्या करबो चावीं हीं।

¹²जणा बे अंय्यां कर परमेसर क सागै करेड़ा बाका पेल्या का वादाऊँ मुकर पापण बणी हीं।

¹³अर बे घर-घर हांडर खुदको टेम बरबाद करबो सीखीं हीं, अर इऊँ बी भत्तर बे फाँप मारबो अर दुसरा का काम म टांग अड़ाबो सीखीं हीं, अर जखी बाता क बारां म बात नइ करनी चाए, बाकै बारां म बतळावीं हीं।

¹⁴जणा म चाऊँ हूँ क, जवान खालीहोइड़ी लूगाई ब्या कर टाबर जलमै, अर आपका घर की देखभाळ करै, जिऊँ बे आपणी बुरी चितबाळानै आपणै खिलाप बुरो खेबा को मोको नइ दिं।

¹⁵क्युं क क्युंक जवान खालीहोइड़ी लूगाया पेल्याऊँई सेतान की भंगराया म आर बिकै गेल होली ह।

¹⁶ज कोई बिस्वासणी क परवार म खालीहोइड़ी लूगाई ह जणा बा बिकी देखभाळ करै अर बिस्वासी मंडळी प बिको बोज नइ गेरै, जिऊँ बिस्वासी मंडळी बा खालीहोइड़ी लूगाया की देखभाळ कर सकै जाको कोई कोनी।

¹⁷एक मुखिया क रूप म, जखाबी बिस्वासी मंडळी का मुखिया, चोखो काम करीं बे दुणा मान क जोगा समज्या जावै, खासकर बे जखा परचार अर सीखाबा म घणी मेनत करीं हीं।

¹⁸क्युं क नेम-कायदा बोलै ह, “थे कोईको पेट मना दुखाज्यो” अर “ध्यानग्यानै ध्यानगी मिल्णी चाए।”

¹⁹कोईबी बिस्वासी मंडळी का मुखिया क खिलाप दो नहिस बिऊँ बेसी गुवा बिना बिपै लगाया गया दोस मना सुणजै।

²⁰जखा पाप करीं बाकै सगळा क सामै दकाल लगा जिऊँ दुसरा पाप करबाऊँ डरै।

²¹म तनै परमेसर, मसी ईसु अर टाळेड़ा ईस्बर नगरी दुता की मोजूदगी म बोलुँ हूँ क, बिना कोईकी भीड़ लिये तू आ आदेसानै मानजै अर ख्यामई कोईकै सागैई भेद-भाव मना करजे।

²²मिनखा क सीर प आसिरबाद देबा ताँई हात म्हेलर बानै परमेसर की सेवा म देबा ताँई तावळ मना करजे। दुसरा क पाप म सामिल मना होए, खुदनै पबितर बणायो राख।

²³पाणीई मना पीआ कर पण पेट अर बारबार होबाळी बिमारी की बजेऊँ चीनिसी अँगूरी बी पी लिआ कर।

²⁴क्युंक मिनखा का पाप चोड़ा म रेह्‍वै अर बाकै गेल बाको न्याय बी होवै, पण कया का बुरा कामा को पाछै बेरो पड़ै ह।

²⁵अंय्यांई चोखा काम बी सामै आवीं हीं अर जखो भला काम सामै कोनी आया बे ओला म कोनी रेह्सी।