Read Shekhawati 1 तिमूतियूस 6 Bible Online

1 तिमूतियूस 6 - Shekhawati bible

1 तिमूतियूस 6

¹ज तू दास ह, तो तनै तेरा मालिक की ईज्जत अर बिको आदर करबो चाए। जिऊँ कोईबी परमेसर का नाम अर आपणी सीख क बारां म बुरो नइ बोल सकै।

²जखा दासा का मालिक बिस्वासी हीं, बे इ बजेऊँ क, बाका मालिक बिस्वासी हीं बाको मान-समान करबो कम नइ करै, इकी झघा बे बाकी सूल सेवा करै। क्युं क बाका कामा को फाईदो जानै मिलर्यो ह बे बिस्वासी हीं जानै बे परेम करै ह। अ बाता थे लोगानै करबा ताँई बोलो अर सीखाओ।

³ज कोई, बि सई अर आपणा परबु ईसु मसी की ईस्बरीय सीखनै, नइ मानै अर क्युं न्यारोई सीखावीं,

⁴जणा अंय्यां को मिनख मरोड़ म बांको रेह्‍वै, पण बो क्युंई कोनी जाणै। बिकी मत्ती मारी गई, अर बिनै बाता प जिदबो चोखो लागै ह। बिमैऊँ बळोकड़ोपूणो, दोस लगाबो, सूगली बाता अर बुराई निकळै ह।

⁵अर बा मिनखा म राड़ होवै ह जाकी मत्ती मारी गई ह, अर जखा सचऊँ दूर होगा हीं, बे सोचीं हीं क, परमेसर की सेवा धन कमाबा को सादन ह।

⁶परमेसर की भगती म राजी रेह्बाळो, इ सच म अमीर ह।

⁷क्युं क आपा धरती प नइ तो क्युं लेर आया हा अर नइ क्युं लेर ज्यास्यां।

⁸ज आपणै कनै रोटी अर गाबा हीं, जणा पाछै आपानै ओर काँई चाए?

⁹पण जानै धन भावै, बे लालच अर उजाड़बाळी बोळी बुरी इंछ्या म पड़ीं, जखी मिनखनै बरबादि अर बिनास क गर्त म गेरै ह।

¹⁰क्युं क पिसा को मो सगळी बुराया की जड़ ह। क्युंक मिनख पिसा का लालच म बिस्वासऊँ मुंडो मोड़र बोळा दुख मोल ले लिआ।

¹¹पण तू, जखो परमेसरनै मानबाळो ह, आ सगळी बाताऊँ दूर रेह्जे, पण धारमिक्‍ता, भगती, बिस्वास, परेम, थ्यावस अर दिनता म बण्यो रेह।

¹²बिस्वास की दोड़ म पूरी ज्यान लगार भाज। अर खुद ताँई अजर-अमर जीवन जीत, जि ताँई तनै परमेसर बुलायो हो, जद तू रोब क सागै तेरा बिस्वासनै बोळा सारका गुवा क सामै दिखायो हो।

¹³सगळानै जीवन देबाळा परमेसर क सामै अर मसी ईसु जखो पीळातुस क सामै हिमत क सागै आपका बिस्वासनै दिखायो बिमै, म तनै आदेस देऊँ हूँ,

¹⁴आपणा परबु ईसु मसी क परगट होबाळा दिन ताँई अ आदेस मानबा म बेदाग रेह।

¹⁵बिनै परमेसर सई टेम प परगट करसी, परमेसर धने अर एकई राज करबाळो, राजा-म्हराजा को राजा अर परबुआ को परबु ह।

¹⁶बो एकलोई अजर-अमर ह! बो बि च्यानणा म बास करै ह जिकनै कोई कोनी पुग सकै। नइ कोई बिनै कदै देख्यो ह! अर नइ कोई कदै देख सकै। बिको मान-समान अर राज जुग-जुग होतो रेह्‍वै! अंय्यांई होवै।

¹⁷जखा मिनख इ दुनिया म पिसाळा हीं बानै आदेस दे बे इपै गुमान नइ करै, पण बाकी आस, नास होबाळा धन की बजाय परमेसर म हो, जखो आपानै आपणा सुक ताँई सगळी चिजा देवै ह।

¹⁸चोखा काम करबा ताँई बानै आदेस दे, जिऊँ बे चोखा काम करबाळा, दान देबाळा अर हियाऊँ देबाळा होवीं।

¹⁹अंय्यां कर बे खुद ताँई अंय्यां को धन भेळो करसी जखो आबाळा टेम ताँई एक मजबूत निम म्हेलसी। अर जणा बे बि जीवननै जीतबा जोगा होसी, जखो सचो ह।

²⁰ओ तिमूतियूस, जखो तनै सोप्यो गयो ह बिनै समाळर राख। दुनियादारी की बात अर बकवास जिरैऊँ खुदनै परै राख जिनै क्युंक मिनख गळतीऊँ “ज्ञान” बोलै ह।

²¹क्युंक मिनख इ झूठा ज्ञान प बिस्वास करबा को दावो कर्या, अर जिको नतिजो ओ होयो क, बे सचा बिस्वास का गेलाऊँ भटकगा। थारै सगळा प परमेसर की दया होवै।