Read Shekhawati 2 तिमूतियूस 2 Bible Online

2 तिमूतियूस 2 - Shekhawati bible

2 तिमूतियूस 2

¹परबु म मेरा बेटा तिमूतियूस, मसी ईसु म परमेसर जखी दया तेर प करी ह, बिकी बजेऊँ मजबूत बण्यो रेह।

²जखी बाता तू मेरूँ बोळा सारका गुवाई देबाळा की मोजूदगी म सुणी ह बा बातानै बिस्वास जोगा मिनखानै सूप दे, जखा दुसरानै सीखाबा जोगा हीं।

³मसी ईसु का बफादार सिपाई की जंय्यां दुख म मेरो पाँतीवाळ बण।

⁴एक सिपाई जद खुदका काम म लाग्यो रेह्‍वै ह जणा बो खुदऊँ उपला अधिकार्यानै खुदका कामाऊँ राजी राखबो चावै ह अर इ बजेऊँई बो खुदनै दुसरा झंझटामै कोनी गेरै।

⁵अर अंय्यांई कुस्ति को पेलवान बिना नेम-कायदा गेल दाव-पेचऊँ लड़ै जणा बो इनाम कोनी जीत सकै।

⁶मेनत करबाळा किसाननै सऊँ पेली धरती को फळ मिलणो चाए।

⁷जोक्यु म बोलुँ हूँ बिपै गोर धर, क्युं क परबु तनै सगळी बातानै समजबा की बुदी देसी।

⁸जंय्यां की चोखा समचार म सीखायो गयो ह, म बंय्यांई परचार करूं हूँ क, दाऊद का कूणबा को ईसु मसी जखो मरेड़ा मऊँ जी उठ्यो बिपै तेरा हियानै लगा।

⁹अर इ चोखा समचारनै परचार करबा की बजेऊँई म दुख उठार्यो हूँ अर एक मुलजिम की जंय्यां साकळा म बंदर्यो हूँ, पण परमेसर का बचना प कोई बंदण कोनी।

¹⁰जणाई म टाळेड़ा मिनखा ताँई सक्यु भोगज्याऊँ हूँ जिऊँ बे बि जीवननै जखो मसी ईसु म ह, अर बिकै सागै जुग-जुग की मेमानै लीं।

¹¹आ बिस्वास जोगी बात ह, “ज आपा बिकै सागै मरेड़ा हां, जणा बिकै सागै जिस्यां।

¹²ज आपा थ्यावस क सागै दुख भोगस्यां, जणा आपा बिकै सागै राज बी करस्यां। ज आपा बिऊँ मुंडो फेरां, जणा बो बी आपणाऊँ मुंडो फेरसी।

¹³ज आपा बिस्वास जोगा कोनी होवां, जणाबी बो बिस्वास जोगो बण्यो रेह्‍वै ह, क्युं क बो खुदऊँ कोनी मुकर सकै।”

¹⁴मिनखानै अ बाता याद दिवातो रेह। अर बानै परमेसर क सामै चेतार बोल क बे बेकार की बाता प नइ लड़ीं। अंय्यां करबो चोखो कोनी क्युं क बे बाता बानै सुणबाळा ताँई बिनास की जड़ ह।

¹⁵परमेसर की नजर्या म खुदनै काम करबाळो मिनख बणबा ताँई मेनत कर, जिऊँ तनै सरमिन्दो नइ होणो पड़ै, पण परमेसर क सच का बचनानै सई-सई सीखावै।

¹⁶मिनखनै परमेसरऊँ दूर लेज्याबाळी दुनियादारी अर बकवास बाताऊँ खुदनै दूर राख।

¹⁷अंय्यां की बाता खुला घाव की जंय्यां फेलै ह, हमनुस अर फिलेतुस बामैऊँई ह।

¹⁸बे सच को गेलो छोड दिओ अर अंय्यां खेर क, आपानै ओज्यु जिंदगी पेल्याई मिलगी ह क्युंक बिस्वास्या का बिस्वासनै भंगरा दिआ हीं।

¹⁹पण परमेसर की पक्की निम हालै कोनी, जिपै आ छाप लागरी ह, “परबु खुदका मिनखानै जाणै ह,” अर, “जखो कोई परबु को नाम लेवै ह बिनै चाए क बो बुरा करमाऊँ बच्यो रेह्‍वै।”

²⁰बडा घर म भात-भात का बरतन होवीं हीं, क्युं लकड़ी अर चिकणी माटी का बणेड़ा अर क्युं सोना अर चाँदी का, क्युं खास मोका ताँई अर क्युं घर म रोजकी बरतबा ताँई।

²¹ज मिनख खुदनै बुरायाऊँ सुद करले जणा बो खास काम म आबाळो बणसी अर पबितर बणर खुदका मालिक परमेसर क काम आबाळो बणज्यावै ह। जिऊँ बो हर भला काम ताँई त्यार करेड़ो होसी।

²²जुवानी की बुरी इंछ्याऊँ भाज अर जखा पबितर मनऊँ परबु को नाम लेवीं हीं बाकै सागै खुदनै धरम, बिस्वास, परेम अर मेळमिलाप क सागै संगरो राख।

²³बकवास अर बेतुक की बाताऊँ खुदनै दूर राख क्युं क तू खुद जाणै ह अ बाता राड़-झगड़ा करावै ह।

²⁴परमेसर को दास लड़बाळो नइ पण सगळा प दया दिखाबाळो, थ्यावस राखबाळो अर चोखो सीखाबाळो होणो चाए।

²⁵अर जखा खिलाप होवीं बानै नरमाईऊँ समजाबाळो होणो चाए; काँई बेरो परमेसर बानै बाकी गळती मानर माफी माँगबा को मन देवै अर बेबी सच जाण जावै।

²⁶अर चेतो कर सेतान का जाळऊँ बच ज्यावीं, जखो बानै खुदकी इंछ्या मनवाबा ताँई पकड़ राख्यो ह।