Read Shekhawati 2 तिमूतियूस 4 Bible Online

2 तिमूतियूस 4 - Shekhawati bible

2 तिमूतियूस 4

¹मसी ईसु जखो राजा क रूप म आसी अर सगळा जीवता अर मरेड़ा को न्याय करसी बिनै अर परमेसरनै गुवा मानर म तनै आदेस देऊँ हूँ,

²परमेसर का बचना को परचार कर। टेम बेटेम मिनखानै सुदारबा ताँई त्यार रेह। तू मिनखानै सई कर अर बाका पाप प बाकै दकाल लगा। सागैई बानै उदास बी मना होबा दे, बानै हिदायत देती टेम सदाई थ्यावस राखजे।

³अंय्यां को टेम आर्यो ह जद मिनख चोखी सीखनै कोनी सुणसी, पण इकी झघा बे खुद ताँई अंय्यां का सीखाबाळा ढुंढलेसी। अंय्यां का सीखाबाळा बानै बे बाताई बतासी जखी सुणबो बानै चोखो लागै ह।

⁴बे खुदका कानानै सच सुणबाऊँ बंद करलेसी अर बेतुक की क्हाण्या म ध्यान लगा लेसी।

⁵तू स्यांतीऊँ टिक्यो रेह अर दुख भोगबा ताँई त्यार रेह। चोखा समचारनै बोलबा ताँई कड़ी मेनत कर अर तेरी जुबाबदारीनै चोखा ढंगऊँ निभा।

⁶म मेरी इ जिंदगीनै परबु की सेवा ताँई दे दिओ हूँ, मेर ताँई बा घड़ी आगी ह जद मनै मेरी आ खोळ छोडणी पड़सी।

⁷म चोखो लड़लिओ, म मेरी दोड़ पूरी करली अर म बिस्वास जोगो रिह्यो।

⁸अर इब ईस्बर नगरी म जीत को इनाम मनै उडिकर्यो ह, जिनै धरमी न्यायी परबु आखरी दिन मनै देसी। मनै एकलानैई नइ पण बा सगळानै बी जखा परेम क सागै बिकै परगट होबानै उडिकीं हीं।

⁹तावळोई मेरै कनै आबा की कोसिस कर,

¹⁰क्युं क देमास तो इ दुनियादारी का मो म पड़र मनै छोडर थिसलूनिकी नगरी चलेगो ह, करेसकन्स गलातिया अर तितूस दलमतिया नगरी चलेगो।

¹¹मेरै सागै खाली लूकाई रिह्यो ह। चोखा समचारनै सुणाबा का काम म मरकुस मेरो बोळो मददगार हो सकै ह, इ ताँई बिनै टोर तेरै सागै लेतो आजे।

¹²तुखीकुसनै म इफिसुस भेज्यो हूँ।

¹³जद तू आवै जणा तरोआस का रेह्बाळा करपुस क घराऊँ मेरो चोळो, पोथ्या अर चमड़ा को पतर तो खासकर याद कर ल्याजे।

¹⁴धातु को काम करबाळो सिकन्दर मनै बोळो दिन घाल्यो ह। परबु बिकी करनी गेल बिनै फळ दे।

¹⁵तू बी बिऊँ समळर रेह्जे, क्युं क बो आपा जखो चोखो समचार सुणावां हां बिको बोळो बिरोद कर्यो ह।

¹⁶जद पेली बर कचेरी म मनै लेर गया, जणा मेरा बचाव म मेरो सागो कोई कोनी दिओ, पण सगळा का सगळा मनै तज दिआ। ज हो सकै तो परमेसर बाऊँ इको हिसाब नइ लेवै।

¹⁷पण परबु मेरै सागै खड़्यो रिह्यो अर मनै ताकत दिओ, जणाई तो म सगळा गैर-यहूदिआनै सुणाबा ताँई चोखा समचार को खूब हेलो पाड़ सक्यो अर म मोत की सजाऊँ बचायो गयो।

¹⁸अर परबु मनै सगळी बुरी बाताऊँ बचासी अर बचार ईस्बर नगरी राज म लेज्यासी। बिकी मेमा जुग-जुग होती रेह्‍वै। अंय्यांई होवै!

¹⁹परसकीला, अकविला अर उनेसिफुरूस का कूणबानै मेरा राजी-खुसी का समचार बोलजे।

²⁰इरास्तुस कुरन्थी म रेहग्यो, अर तरोफेमुसनै, म बिमारी की बजेऊँ मिलेतूस नगरी मई छोड्यायो।

²¹स्याळाऊँ पेल्या-पेल्या आबा की पूरी-पूरी कोसिस करजे। इबलुस, पुदेंस, लिनुस, कलौदिआ अर सगळा बिस्वासी भाई तनै राजी-खुसी का समचार बोल्या ह।

²²परबु तेरी आत्मा क सागै रेह्‍वै। थारै सगळा प परमेसर की दया होती रेह्‍वै।