Read Shekhawati तितूस 2 Bible Online

तितूस 2 - Shekhawati bible

तितूस 2

¹तितूस तू बोई सीखा जखो सई ह।

²बूडा-ठेरानै हिदायत दे क बे सिदा-सादा, थ्यावस राखबाळा, खुदनै बस म राखबाळा लोगा म बुजहाळा, प्यार-परेम अर बिस्वास म मजबूत अर बरदास करबाळा हो।

³अंय्यांई बूडी-ठेरी लूगायानै बी सीखा क बे पबितर मिनखा की जंय्यां बरताव करबाळी हो। बे चुगली-चाळा करबाळी नइ हो अर नइ बामै पीबा की लत हो। पण बे चोखी सीख देबाळी हो।

⁴जिऊँ क बे जुवान लूगायानै बाका मोट्यार अर टाबरा-टिकराऊँ प्यार करबा, खुदनै बस म राखबा, खुदनै पबितर राखबा, मोट्यार क खया म चालबाळी अर घर बांदबाळी चोखी लूगाई बणबा की सीख दे। जिऊँ कोईबी परमेसरऊँ आबाळा संदेस क बारां म बुरा नइ बोलै।

⁶अंय्यांई तू जुवान छोरानै समजदारीऊँ जीबा ताँई समजा।

⁷तू खुद बोई कर जखो चोखो ह, जिऊँ दुसरानै बेरो पड़ै की बानै कंय्यां को बरताव करबो चाए। तू तेरी सीख म ईमानदार अर खरो बण्यो रेह।

⁸बोई बोल जिपै कोई आँगळी नइ उठा सकै, जिऊँ तेरा बेरी सरमिंदा होवीं अर बाकन आपानै बुरो बताबा की कोई बजै नइ होवै।

⁹दासानै सीखा क बे आपका मालिका की हर बातनै मानर बानै राजी राखै। बे बानै ओटो जुबाब नइ देवै,

¹⁰बे मालिक क घर म चोरी-चकारी नइ करीं, पण पूरी तर्या चोखा अर बिस्वास जोगा बण्या रेह्‍वै जिऊँ आपानै बचाबाळा परमेसर क बारां म जखो सीखायो गयो ह हर कोई बिको मान करै।

¹¹क्युं क परमेसर सगळा मिनखा का छुटकारा ताँई दया दिखाई ह।

¹²आ दया सीखावै ह क आपा बि जीवननै जिमै परमेसर कोनी अर दुनियादारी की बुरी इंछ्यानै छोडर इ जुग म खुद क बस म रेह्बाळो, खराईऊँ भर्यो जीवन जीवां जिमै परमेसर ह,

¹³अर आपा जखी भागहाळी आस राखां हां बिकै पूरो होबानै उडिकां हां, जद आपणो म्हान परमेसर अर छुटकारो देबाळो ईसु मसी मेमा म परगट होसी।

¹⁴बो आपणा ताँई खुदकी ज्यान दे दिनी। जिऊँ बो आपानै सगळा पापऊँ बचावै अर आपानै सुद कर खुद ताँई अंय्यां का मिनख बणावै जखा भला काम करबा ताँई उतावळा रेह्‍वै।

¹⁵तू अ सगळी बाता अधिकार क सागै तेरा सुणबाळानै सीखा, जुर्त पड़ै तो बाकै दकाल लगा अर जुर्त पड़ै तो हिमत बंधा। कोईकै सामैई तनै निचो नइ देखणो पड़ै।