Read Shekhawati इबरानीआ 1 Bible Online

इबरानीआ 1 - Shekhawati bible

इबरानीआ 1

¹पुराणा टेम म परमेसर आपणा बडकाऊँ आपकी खेबाळा क जरिए टेम-टेम प भात-भात का तरिकाऊँ बतळायो।

²पण आ आखरी दिना म परमेसर आपका बेटा क जरिए आपणाऊँ बातचित करी। बिनै बो सगळी चिजा को वारिस बणायो अर बिकै जरिए बो सगळी सरस्टिनै रच्यो।

³परमेसर को बेटो परमेसर की मेमा को उजाळो अर बिमै बिकोसोई सुभाव ह। बोई आपका बचना की सक्‍तिऊँ सरस्टि की सगळी चिजानै थाम राखी ह। बो मिनखा का पापनै धोर ईस्बर नगरी म सऊँ सक्‍तिसाली परमेसर क दायणै हात जार बेठगो।

⁴जणा बो ईस्बर नगरी दुताऊँ बडो बणगो अर जखो नाम बिनै बापोत म दिओ गयो बो बाका नामऊँ बडो ह।

⁵क्युं क परमेसर कदैई कोई बी ईस्बर नगरी दुताऊँ आ कोनी बोल्यो क, “तू मेरो बेटो ह; म आज तेरो बाप बण्यो हूँ!” अर नइ कोई ईस्बर नगरी दुताऊँ अंय्यां बोल्यो, “म बिको बाप होस्युं, अर बो मेरो बेटो होसी!”

⁶अर जद परमेसर आपका पेलीपोत का बेटानै जगत म भेज्यो ह, जणा बो बोलै ह क, “सगळा ईस्बर नगरी दुत बिकै आगै धोक खावै।”

⁷अर बो ईस्बर नगरी दुता क बारां म अंय्यां खेवै ह क, “बो ईस्बर नगरी दुतानै आत्मा बणायो, अर आपका दासनै आग की लपटा बणायो।”

⁸पण बो आपका बेटा क बारां म खेवै ह क, “ओ परमेसर तेरो सिंघासन जुग-जुग ताँई रेह्सी, अर तेरा राज म सदाई न्याय होसी।

⁹तू धरमीऊँ प्यार अर नियमानै नइ मानबाळाऊँ नफरत करी, इ बजेऊँ परमेसर, तेरो परमेसर, तेर प आनंद का तेलऊँ अभिसेक कर तनै तेरा सात्याऊँ उचो कर्यो।”

¹⁰अर बो अंय्यां बी खेवै ह क, “ओ परबु, सरूआत मई थे इ सरस्टि की निम धरी, अर आ ईस्बर नगरी बी थारा हाता की कारिगरी ह।

¹¹आको बी नास होज्यासी, पण थे जुग-जुग ताँई रेहस्यो। ओ सक्यु गाबा की जंय्यां पुराणो होज्यासी।

¹²अर थे आनै चादरा की जंय्यां पळेट देस्यो। बे गाबा की जंय्यां बदल ज्यासी। पण थे तो बंय्यां का बंय्यांई रेहस्यो, अर थारो जुग कदैई कोनी मिटै।”

¹³परमेसर कदैई कोई ईस्बर नगरी दुतऊँ अंय्यां कोनी बोल्यो क, “तू मेरै दाया हात बेठ, जद ताँई म तेरा बेरीयानै तेरै पगा तळै की चोकी नइ कर द्‍युँ।”

¹⁴इ ताँई सगळा ईस्बर नगरी दुत छुटकारो पाबाळा मिनखा की सेवा करबा ताँई भेजेड़ी आत्मा हीं।