Read Shekhawati इबरानीआ 13 Bible Online

इबरानीआ 13 - Shekhawati bible

इबरानीआ 13

¹भाईचारा का प्यार-परेम म बण्या रेह्ओ।

²अर अणजाण की आवभगत करबो मना भूलज्यो, क्युं क अंय्यां करर कई मिनख अणभोळ म ईस्बर नगरी दुता की आवभगत करीं ह।

³केदिआनै अंय्यां याद राखो जंय्यां थे बी बिकै सागै केद म रिह्या हो। अर जाकै सागै बुरो बरताव कर्यो गयो ह बाकी आ जाणर सुदी ल्यो क जंय्यां थे खुद पिड़ा म हो।

⁴ब्या सगळा ताँई आदर की बात समजी जाणी चाए। अर ब्याईड़ा लूगाई मोट्यार एक दुसरा बेई पबितर रेह्‍वै, क्युं क परमेसर दुसरा लूगाई मोट्यार क सागै नाजायज समंद राखबाळा अर कुकरमीनै सजा देसी।

⁵थारो सुभाव धन को लालची नइ होवै, अर जोक्युबी थारै कनै ह, बिमई सबर राखो, क्युं क परमेसर बोल्यो ह, “म तनै कदैई कोनी छोडूँ, अर कदैई कोनी तजूं।”

⁶इ ताँई म्हें बेधड़क खेवां हां क, “परबु मेरी मदद करबाळो ह, म कोनी डरूँ; मिनख मेरो काँई बिगाड़ सकै ह?”

⁷थे बा मुखियानै याद राखो जखा थानै परमेसर को बचन सुण्या हीं। अर ध्यानऊँ बाका चाल-चलन का फळनै देखर बाकी जंय्यांई बिस्वास करो।

⁸ईसु मसी काल अर आज अर सदाई एकसो ह।

⁹भात-भात की अणजाणी सीख की भंगर्या म मना आज्यो, क्युं क थारा हिया ताँई ओ चोखो ह क बे खाबा-पीबा का नियमा क बजाय दया की बजेऊँ मजबूत बणै। अर जखा खाबा-पीबा का नियमानै मान्या बाऊँ बाको कदैई भलो कोनी होयो।

¹⁰आपणै कनै अंय्यां की बेदी ह जिकै उपर चढाईड़ा बलिदानानै खाबा की छुट बानै कोनी जखा पबितर तम्मू की सेवा करीं हीं।

¹¹म्हायाजक पबितर झघा म पापबली चढाबा ताँई जिनावरा को लोय तो लेर जावै ह, पण बा ज्यानबरा की लोथनै डेरा क परै बाळ दिओ जावै ह।

¹²इ ताँई, ईसु मिनखानै आपका लोयऊँ पबितर करबा ताँई नगरी क बारनैई दुख भोग्यो।

¹³जणा आओ आपाबी बिकी बेजतीनै लेर, डेरा क बारनै बिकन चालां।

¹⁴क्युं क अठै आपणै ताँई सदाई रेह्बाळी नगरी कोनी, पण आपा तो बि आबाळी नगरीनै उडिकर्या हां।

¹⁵इ ताँई आपा ईसु क जरिए परमेसरनै बडाई का बलिदान मतबल होठा का फळ जखा बिको नाम लेवीं हीं हमेसा चढावां।

¹⁶अर भलाई करबो अर खुदकी चिजानै दुसरा क सागै बांटबो मना भूलज्यो। क्युं क परमेसर अंय्यां का बलिदानाऊँई राजी होवै ह।

¹⁷थे थारा आत्मिक मुखिया प भरोसो करो अर बाकै बस म रेह्‍वो, क्युं क बे बाकी जंय्यां जानै लेखो देणो पड़ै ह थारा पिराणा ताँई जागता रेह्‍वै ह। अंय्यांई कर्या करो जिऊँ बाका काम थारै ताँई बोज नइ पण राजी होबा की बजे बणै। क्युं क बोज समज्या तो थारो क्युंई फाईदो कोनी होवै।

¹⁸थे म्हारै ताँई अरदास करता रेह्‍वो। अर म्हानै पक्को बेरो ह क म्हारी अन्तर-आत्मा सुद ह। अर म्हें हरतर्याऊँ चोखी जिंदगी जिबो चावां हां।

¹⁹म ओज्यु थारूँ बोळी अरदास कर खेऊँ हूँ क, थे अरदास कर्या करो, जिऊँ क म थारै कनै तावळोई आ सकूँ।

²⁰स्यांती देबाळो परमेसर थानै हर भली बात म भर्योपूरो करै। जिऊँ थे बिकी इंछ्या पूरी करो, अर ईसु मसी क जरिए आपणै मांयनै बी काम करै जंय्यां क बिनै चोखो लागै। परमेसर, आपणा परबु ईसुनै नइ मिटबाळा नया करार का लोय क जरिए मोतऊँ ओज्यु जीवायो जखो लल्ड्या को म्हान गुवाळ्यो ह। परमेसर की मेमा जुग-जुग ताँई होती रेह्‍वै। अंय्यांई होवै।

²²ओ मेरा लाडला बिस्वास्यो, म थारूँ अरदास करूं हूँ क थे आ हिमत बंधाबाळा बचना प चालो, क्युं क म थानै थोड़ीई बाता मांडी ह।

²³अर म चाऊँ हूँ क थानै खबर लागै क आपणो बिस्वासी भाई तिमूतियूस छुटगो ह। अर ज बो तावळोई मेरै कनै आसी जणा म बी बिकै सागै थारूँ मिलबा आस्युं।

²⁴मेरै कानिऊँ थारा सगळा मुखियानै अर परमेसर का मिनखानै नमस्कार बोलज्यो। इटली म रेह्बाळा पबितर मिनख थानै नमस्कार खयां हीं।

²⁵थारै सगळा प परमेसर की दया होती रेह्‍वै।