Read Shekhawati इबरानीआ 8 Bible Online

इबरानीआ 8 - Shekhawati bible

इबरानीआ 8

¹जोक्यु बी म्हें खेर्या हां बा सगळी बाता मऊँ बडी बात तो आ ह क आपणै कनै अंय्यां को म्हायाजक ह जखो ईस्बर नगरी म सऊँ सक्‍तिसाली क दायणै हात सिंघासन प बिराजमान ह।[2]

²ओ म्हापबितर झघा म सेवा करै ह, आ झघा सचा परमेसर को पबितर तम्मू[3] ह, जिनै कोई मिनख कोनी, पण परबु बणायो ह।

³क्युं क जिनै बी म्हायाजक बणायो जावै ह बो भेंट अर बलि चढाबा ताँई बणायो जावै ह। इ ताँई जरूरी हो क इ म्हायाजक क कनै बी चढावा ताँई क्युंनै क्यु होणो चाए हो।

⁴अर ज ओ इ धरती प होतो जणा याजक कोनी होतो, क्युं क नेम-कायदा गेल भेंट चढाबाळा तो पेल्याऊँई हां।

⁵अ, जखा परमेसर का पबितर तम्मू की सेवा करीं हीं बो, जखी ईस्बर नगरी म ह बिकिई नकल अर रूप म ह। इ ताँई जद मूसा पबितर झघा बणाबाळो हो जणा बिनै चेतायो गयो हो क, “याद राखजे हरेक चिज बंय्यांई होणी चाए जंय्यां तनै डूँगर प दिखायो गयो हो।”

⁶पण जखो सेवा को काम मसीनै मिल्यो बो बाकी सेवा का कामाऊँ उचो ह। क्युं क ईसु जि नया करार को बिचोलो ह बो करार पुराणा करारऊँ उचो ह अर बो चोखी चिजा का वादा का बळबूता प ह।

⁷क्युं क ज पुराणा करार म कोई खोट नइ होती जणा दुसरा करार की जुर्तई कोनी पड़ती।

⁸पण परमेसरनै बा मिनखा म खोट नजर आई जणा बो बोल्यो, “परबु घोसणा करै ह; बो टेम आर्यो ह, जद म इजरायल का कूणबाऊँ अर यहूदा का कूणबाऊँ एक नयो करार करस्युं।

⁹अर ओ करार बाका बडकाऊँ करेड़ा करार की जंय्यां कोनी, जद म बाका बडकानै मिसर देस की गुलामीऊँ बाका हातनै पकड़र निकाळ्यो हो। परबु घोसणा करै ह, म बाऊँ मुंडो फेर लिओ, क्युं क बे मेरा करार क बिस्वास जोगा कोनी रिह्या।

¹⁰परबु घोसणा करै ह, जखो करार म बा दिना क पाछै इजरायल का कूणबा क सागै बांदस्युं, बो नयो करार ओ ह क म मेरा नियमानै बाकै हिया म बिठास्युं, अर बानै बाका काळज्या प मांडस्युं, अर म बाको परमेसर होस्युं अर बे मेरा मिनख होसी।

¹¹अर इकै पाछै कोईबी आपका पाड़ोसी भाईनै सीख कोनी देसी, अर नइ आपका भाईऊँ खेसी क, ‘परबुनै जाण।’ क्युं क छोटाऊँ लेर बडा ताँई सगळा मनै जाण ज्यासी।

¹²क्युं क म बाका बुरा कामानै माफ करस्युं अर बाका पापनै आगैऊँ याद कोनी करस्युं।”

¹³अर अंय्यां बो इनै “नयो करार” खेर पुराणा करारनै बेकार बणा दिओ; अर जखो पुराणो अर बेकार ह बो तावळोई मिटज्यावै ह।