Read Shekhawati इबरानीआ 9 Bible Online

इबरानीआ 9 - Shekhawati bible

इबरानीआ 9

¹पेलड़ो करार जखो इजरायली मिनखा अर परमेसर क बिचमै हो, बिमै भगती करबा का नियम काईदा बी हा अर भगती करबा ताँई पबितर झघा बी बणाई गई ही।

²मतबल एक पबितर तम्मू खड़्यो कर्यो गयो हो, जिका दो भाग हा, पेलड़ा भाग म दिपदान, पाटियो अर चढावा म चढाईड़ी रोट्या ही; इ हिस्सानै पबितर झघा बोलता हा।

³इकै पाछै एक परदो हो, परदा क गेलड़ै नाकै एक भाग हो जिनै म्हापबितर झघा बोलता हा।

⁴इ भाग म सोना की धूप जळाबाळी बेदी जिपै सुगंद देबाळी चिजा चढाई जाती ही, सोनाऊँ मंढेड़ो करार को बक्सो अर इ बक्सा क मांयनै सोनाऊँ बणेड़ो बरतन हो जिकै मांयनै मन्ना हो, हारुण की कुपळ फूटेड़ी लाठी अर करार मांडेड़ा भाठा बी हा।

⁵अर करारहाळा बक्सा क उपर मेमा का तेजऊँ भर्या करूब ईस्बर नगरी दुता की मूरत्या ही अर अ माफी हाळी झघा प छाया करमाली ही। पण इब आ एकेक क बारां म बखान करबा को टेम कोनी।

⁶पबितर तम्मू क मांयनै सक्यु इ हिसाबऊँ जचेड़ो हो अर याजक रोजकी पबितर तम्मू क पेलड़ा भाग म जार आपका सेवा का कामनै करता हा।

⁷पण परदा क गेलड़ै नाकै का भाग म खाली म्हायाजकई जा सकतो हो, अर बो बी बरस म खाली एकबर। अर म्हायाजक बी बिना बि लोय क कोनी जा सकतो हो जखो बो खुदका अर मिनखा का अणभोळ म करेड़ा पाप क बदलै चढायो जातो हो।

⁸इकै जरिए पबितर आत्मा आ दिखावै ह क, जद ताँई पबितर झघा का पेलड़ा भाग म सेवा को काम होर्यो ह जणा ताँई म्हापबितर हाळा भाग म जाबा को गेलो कोनी खोल्यो गयो।

⁹अर ओ पबितर तम्मू आज का जुग ताँई मिसाल ह, जखो आ दिखावै ह क जखी भेंट अर बलिदान चढायो जार्यो ह बो भगती करबाळा मिनखा की अन्तर-आत्मानै समुळी सुद कोनी कर सकै।

¹⁰क्युं क अ नियम तो बारला हीं जखा खाबा-पीबा अर भात-भात का सुद होबा का रिती-रिवाज ह अर अ जद ताँई रेह्सी जद ताँई नयो सिरो लागू नइ होज्यावै।

¹¹पण इब मसी जखो चोखी बाता को म्हायाजक बणर आयो ह, बो हात का बणाएड़ा तम्मू म कोनी पण इऊँ बी बडा अर सिद तम्मू क मांयनै सेवा करै ह इको मतबल ओ ह क बो पबितर तम्मू इ सरस्टि को भाग कोनी।

¹²बो बकरा अर बाछ्या का लोयऊँ नइ पण खुदका लोयऊँ एकबर मई म्हापबितर झघा क मांयनै गयो। अर जुग-जुग को छुटकारो पक्को कर दिओ।

¹³क्युं क बकरा अर सांड को लोय अर बछड़ा की भगूती छिड़कर मिनखानै बारनैऊँ रिती-रिवाजा गेल सुद कर्यो जावै ह।

¹⁴ज अ बाता साची ह जणा मसी को लोय कतो सक्‍तिसाली ह। अर अजर-अमर पबितर आत्मा क जरिए बो खुदनै निरदोस चढावा क रूप म परमेसरनै चढा दिओ, अंय्यां करबाऊँ अर लोयऊँ आपानै बो, मोत क गेलै लेज्याबाळा कामाऊँ सुद कर दिओ जिऊँ आपा जीवता परमेसर की सेवा कर सकां।

¹⁵इ बजेऊँ मसी नया करार को बिचोलिओ ह जिऊँ जखा बुलाईड़ा हीं बानै बा बादो करेड़ी जुग-जुग ताँई की बापोत दि जावै। अर बा पापऊँ जखा पेलड़ा करार क तळै आता हा बाकी मर'र किमत चुकाई अर बानै अजाद कर्यो।

¹⁶जठै ताँई बसियतनामा को सुवाल ह, जणा बि ताँई बसियतनामानै मंडाबाळा की मोत को सबूत मिलबो जरूरी ह।

¹⁷क्युं क कोई बी बसियतनामो जदई पक्को होवै ह जद बिनै मंडाबाळा की मोत होज्यावै ह। अर जद ताँई, बिनै मंडाबाळो जीताजी ह, बि वसियतनामा को कोई मतबल कोनी।

¹⁸आई बजे ह क पेलड़ा करारनै बिना लोय क लागू कोनी कर्यो गयो।

¹⁹क्युं क मूसा नेम-कायदा का सगळा हुकमानै मिनखानै सुणाबा क पाछै बकरा अर बछड़ा को लोय पाणी म मिलार लाल ऊन अर जूफा की डाळ्याऊँ बा सगळा मिनखा प अर बि पोथी प छिड़क दिओ।

²⁰अर बो बोल्यो, “ओ बि करार को लोय ह जिनै मानबा को हुकम परमेसर दिओ ह।”

²¹अर अंय्यांई मूसा पबितर तम्मू अर भगती क काम म आबाळी सगळी चिजा प लोय छिड़क्यो।

²²सचमई नेम-कायदा चावै ह क सगळी चिजानै लोयऊँ सुद कर्यो जावै। क्युं क बिना लोय बहाया माफी हई कोनी।

²³इ ताँई आ जरूरी ह क जखी चिजा ईस्बर नगरी की नकल ह, बानै ज्यानबरा का बलिदानऊँ सुद कर्यो जाणो चाए। पण ईस्बर नगरी की चिजा तो आऊँ चोखा बलिदानऊँ पबितर करी जाणी चाए।

²⁴क्युं क मसी बि पबितर झघा म कोनी गयो जखी हातऊँ बणाएड़ी अर असली परमेसर का पबितर तम्मू की नकल ह पण बो तो ईस्बर नगरी मई गयो, जिऊँ क बो आपणै कानिऊँ परमेसर क सामै बिचोली करै।

²⁵अर नइ बो आपको बलिदान चढाबा ताँई बार-बार ईस्बर नगरी म गयो जंय्यांकी म्हायाजक लोय क सागै जखो बिको कोनी बिनै लेर म्हापबितर झघा म हर बरस जावै ह।

²⁶अर ज अंय्यां होतो जणा मसीनै इ सरस्टि की सरूआतऊँ लेर कई बार पिड़ा भोगणी पड़ती; पण इब बो इ जुग क आखरी म सगळा ताँई एकबरई परगट होगो, जिऊँ बो खुदई बलिदान होर पाप को नास कर दे।

²⁷अर जंय्यां मिनखा ताँई एकर मरबो अर बिकै पाछै बिको न्याय होबो जरूरी ह,

²⁸बंय्यांई मसी बी बोळा मिनखा का पापनै धोबा ताँई एकर बलिदान होयो; अर मसी बा मिनखा ताँई जखा बिनै उडिकै ह बाका पाप धोबा ताँई नइ पण बाका छुटकारा ताँई दुसरकै परगट होसी।