Read Shekhawati याकूब 2 Bible Online

याकूब 2 - Shekhawati bible

याकूब 2

¹मेमाभर्या परबु ईसु मसी प बिस्वास करबाळा मेरा लाडला बिस्वास्यो, थारै मांय भेद-भाव नइ होणो चाए।

²थे अंय्यां मना करज्यो क, ज थारी सभा म कोई मिनख सोना की अँगूठी अर मेंगा गाबा पेर'र आवै अर बिकै गेलई कोई गरीब मिनख फाट्या पुराणा गाबा म बठै आवै,

³जणा ज थे सोना की अँगूठी अर मेंगा गाबा पेर'र आबाळानै तो चोखी झघा बिठाओ अर बि गरीबऊँ बोलो क, “तू मेरै पगा क कनैई तळै बेठज्या,”

⁴जणा थे आपसरी म भेद-भाव कोनी कर्या के? अर बुरी मनस्याऊँ भेवार कोनी कर्या के?

⁵मेरा लाडला बिस्वास्यो, ध्यानऊँ सुणो, के ईस्बर बानै कोनी टाळ्यो जखा इ जगत का मिनखा की नजर्या म गरीब ह? जिऊँ बे बिस्वास म अमीर होज्यावै अर बि राज का अधिकारी बणै जिनै परमेसर बिऊँ परेम करबाळानै देबा को बादो कर्यो ह।

⁶पण जणा बी थे बा गरीबा को अपमान कर्यो हो। के पिसाळा मिनख थार प जोर कोनी जिमावै अर थानै कचेरी म घिसर कोनी लेज्यावै?

⁷के बे मसी का बि चोखा नाम की बुराई कोनी करै जखो थानै दिओ गयो ह?

⁸पबितर सास्तर म सगळा हुकमा म स्याही हुकम ओ ह क, “थे थारा पड़ोसीऊँ खुदकी जंय्यांई प्यार करज्यो।” अर ज थे इनै मानो हो जणा चोखोई करो हो।

⁹पण ज थे भेद-भाव करो हो जणा पाप करो हो अर नेम-कायदा थानै दोसी बतावै ह।

¹⁰क्युं क ज कोई नेम-कायदा का सगळा नियमानै मानै पण ज एक बी बात म चूक ज्यावै जणा बो नेम-कायदा का सगळा नियमानै तोड़बाळो बाजै।

¹¹क्युं क जखो बोल्यो ह क, “कुकरम मना करज्यो” बोई आबी बोल्यो ह क, “हत्या मना करज्यो।” इ ताँई ज थे कुकरम तो कोनी करो पण हत्या करो हो, जणा अंय्यां कर थे नेम-कायदा का नियमानै तोड़बाळा बणग्या।

¹²थे बा मिनखा की जंय्यां बोलो अर भेवार करो जखा को न्याय अजाद करबाळा नेम-कायदा गेल होवै ह।

¹³क्युं क जखो दया कोनी करै बिको न्याय बी बिना दया होसी। पण दया न्यायनै जीतै ह।

¹⁴मेरा लाडला बिस्वास्यो, ज कोई खेवै क मनै बिस्वास ह पण बो बिकै गेल करम कोनी करै जणा बिनै काँई फाईदो। अंय्यां को बिस्वास बिको छुटकारो कर सकै ह के?

¹⁵अर मानल्यो कोई बिस्वासी भाई नहिस कोई बिस्वासी भाण भूखो तिसायो अर उघाड़ो होवै,

¹⁶अर थार मऊँ कोई बिनै बोलै क, “राजी-खुसी चल्योजा, धाप्यो-धुस्यो अर गरम रेह।” पण बिकी काया की जुर्त हाळी चिजा नइ दे जणा काँई फाईदो?

¹⁷अंय्यांई बिना करम क बिस्वास मतैई मर्यो समान ह।

¹⁸पण कोई खेवै, “तेरै कनै बिस्वास ह अर मेरै कनै करम।” तू मनै थाकाळो बिस्वास बिना करम क दिखा अर म तनै माखाळो बिस्वास करम क सागै दिखास्युं।

¹⁹तू बिस्वास करै ह क एकई परमेसर ह। चोखी बात ह! पण ओ बिस्वास तो ओपरी बलाय बी करै ह अर धुजै ह।

²⁰ओ बावळा मिनख, तू ओ जाणबो चावै ह के क, करम बिना बिस्वास बेकार ह ?

²¹जद आपणो बाप अब्राहम आपका छोरा इसाकनै बेदी प चढायो हो जणा के बो करम गेलई धरमी कोनी खुवायो?

²²थे जाणो हो क बिको बिस्वास अर बिका करम एक सागै मिलरई काम कर्या , बिका करमऊँई बिको बिस्वास सिद होयो।

²³अर सास्तर म मंडेड़ो बचन पूरो होयो क, “अब्राहम परमेसर प बिस्वास कर्यो अर बिस्वास की बजेऊँ बो धरमी गिण्यो गयो,” अर बो परमेसर को भाईलो खुवायो।

²⁴जणा थे आ जाणल्यो क, मिनख करमऊँ धरमी बणै ह खाली बिस्वासऊँ मिनख धरमी कोनी खुवावै।

²⁵अंय्यांई राहाब रंडी बी आपका करमाऊँई धरमी बणी, क्युं क बा इजरायल का भेदियानै खुदका घर म सरण दि अर बानै बचाबा बेई दुसरा गेलाऊँ बिदा करी।

²⁶अर जंय्यां काया आत्मा क बिना मरेड़ी ह बंय्यांई बिस्वास करम बिना मरेड़ो ह।