Read Shekhawati 1 पतरस 3 Bible Online

1 पतरस 3 - Shekhawati bible

1 पतरस 3

¹जंय्यां दास आपका मालिक क बस म रेह्‍वै ह बंय्यांई ओ लूगायो, थे बी थारा मोट्यारा की मानो। जिऊँ ज कोईसी को मोट्यार परमेसर का बचन प नइ चालबाळो होवै जणा बिऊँ कोईनै क्युं बोलबा की जुर्त कोनी पण बो आपकी लूगाई का बरतावनै देखरई परमेसर का बचन प चालबा लागज्या।

²क्युं क बो देखसी क थे परमेसर को आदरमान करो हो अर पबितर चाल-चलन राखो हो।

³थे इ सोच म मना रेहज्यो क, जद थे बाळ गुथस्यो, सोना का गेणा अर मेंगा गाबा पेरस्यो जणाई सोवणी लागस्यो।

⁴पण थे स्यांत अर सुदी बणो जिऊँ थे मांयऊँ सोवणी होस्यो। अंय्यां को सोवणोपूणो सदाई बण्यो रेह्‍वै ह अर परमेसर की नजर्या म इको बोळो मोल ह।

⁵क्युं क पेलड़ा जुग म पबितर लूगाया जखी परमेसर म आस राखती ही, बे बी खुदनै अंय्यांई सोवणी बणाती ही। अर आप-आपका मोट्यारा की हर बात मान्या करती ही।

⁶जंय्यां, सारा अब्राहम की मान्या करती ही अर बा बिनै आपको मालिक बोलती ही। इ ताँई ज थे बी जखो सई ह बो करो अर ख्याऊँई मना डरो जणा थे बिकी बेट्या खुवास्यो।

⁷अंय्यांई ओ मोट्यारो, थे बी थारी लूगाया क सागै समजदारीऊँ जीवन जीओ। अर लूगायानै थारूँ कम मजबूत अर जीवन का बरदान म थारी पाँतीवाळ मानर बाकी ईज्जत करो। जिऊँ थारी अरदास म कोई आट नइ आवै।

⁸मेरी आखरी हिदायत आ ह क, थे सगळा मेळमिलापऊँ रेह्ओ, भलाई करो, प्यार-परेमऊँ भाईचारो राखो, तरस खाओ अर खुदनै छोटा बणाओ।

⁹थे बुराई क बदलै बुराई मना करो, गाळी क बदलै गाळी मना द्‍यो पण आकै बदलै आसिरबादई द्‍यो। क्युं क थानै अंय्यां करबा ताँई बुलायो गयो ह जिऊँ थे आसिरबाद का वारिस होवो। जंय्यां सास्तर म मंडर्यो ह,

¹⁰“जखो जीवन की इंछ्या राखै ह, अर चोखा दिन देखबो चावै ह। बो आपकी जबानऊँ बुरा बोल बोलबाऊँ अर होठानै छळ की बाता करबाऊँ रोकै।

¹¹बुराई करबो छोडर भलाई करै, अर इ कोसिस म लाग्यो रेह्‍वै क मेळमिलापऊँ कंय्यां रेह्ऊँ।

¹²क्युं क धरम्या प परबु की नजर रेह्‍वै ह, अर बाका कान बाकी अरदास सुणबा म लाग्या रेह्‍वै, पण परबु बुराई करबाळा क खिलाप रेह्‍वै ह।”

¹³अर ज थे भलाई करबा ताँई भूख राखो हो जणा थारो बुरो कूण करसी?

¹⁴अर ज थे भलाई करबा बेई दुख भोगो हो, जणा थे भागहाळा हो। इ ताँई बाऊँ डरबो छोड द्‍यो अर इकी बी चिंत्या मना करो क मिनख काँई कर सकै ह।

¹⁵पण मसीनै थारा हिया को मालिक मानो अर ज कोई थारूँ थारी आस क बारां म क्युं बुजै, जणा थे बिनै मान अर कदर क सागै जुबाब देबा ताँई सदाई त्यार रेह्‍ओ।

¹⁶अर थारी अन्तर-आत्मानै बी सुद राखो, अंय्यां थे बा मिनखानै सरमा मार देस्यो जखा मसी म थारै भला करमा क बारां म बुरो बोलीं हीं।

¹⁷अर ज परमेसर की इंछ्या ह क थे भलाई करबा की बजेऊँ दुख भोगो, जणा बुराई करबाऊँ तो चोखो दुख भोगबो ह।

¹⁸क्युं क मसी सगळा का पाप ताँई एकर मर्यो जखो धरमी होर बी पाप की बजेऊँ दुख भोग्यो जिऊँ आपानै परमेसरऊँ मिलावै। बो काया म मर्यो पण आत्मा म जीवायो गयो।

¹⁹मर्या पाछै अर मरेड़ा मऊँ जिंदो होबाऊँ पेली बो मरेड़ा मिनखा की आत्मा जखी न्याय होबानै केद म ही बामै चोखा समचार को हेलो पाड़्यो।

²⁰अ बा मिनखा की आत्मा ही जखी नूह का टेम म जद बो झाज बणार्यो हो बे परमेसर का कह्यानै कोनी मान्या पण परमेसर बा बेई थ्यावस राख्यो। बस आठ मिनख झाज म बड़्या अर पाणी म डूबबाऊँ बचाया गया हा।

²¹अर बा पाणी की बाढ बतिस्मा की जंय्यां ही, बतिस्मो जखो थारो छुटकारो करै ह पण इ बतिस्मा को मतबल काया का मेलनै धोबो कोनी पण अन्तर-आत्मानै सुद कर खुदनै परमेसर कानि मोड़बो ह। क्युं क ईसु मसी मरेड़ा मऊँ ओज्यु जीवायो गयो ह।

²²बो ईस्बर नगरी जार परमेसर क दायणै हात बेठगो, अर ईस्बर नगरी दुत, उपरी सक्‍तिया का अधिकारी, सगळी सक्‍तिया बिकै बस म कर दिनी गई।