Read Shekhawati 1 पतरस 4 Bible Online

1 पतरस 4 - Shekhawati bible

1 पतरस 4

¹जदकी मसी काया म दुख भोग्यो जणा थे बी बिकी लीक प चालता होया जीवन जीओ, क्युं क जखो काया म दुख भोग्यो बिनै पापऊँ छुटकारो मिलगो।

²इको ओ मतबल ह क थे थारा बचेड़ा जीवन भर थारी इंछ्यानै नइ पण जखो परमेसर चावै ह बिनै मानस्यो।

³थे बिस्वास म आबाऊँ पेली परमेसरनै नइ ध्यारबाळा मिनखा की जंय्यां खूब जीवन जीआ हो। थे कुकरमी हा, अर थे थारी बुरी इंछ्या गेल चालता हा। थे दारू म धुत्त, मेफलबाज्या अर उदफेली म लाग्या रेह्ता हा। अठै ताँई क थे सूगली मूरतानै पूजता हा।

⁴पण इब जद थे बाका बा बुरा कामा म सामिल कोनी होवो जणा बानै ताजूब होवै ह। अर बे थारी बुराई करै ह।

⁵पण बानै, बिनै जखो जीवता अर मरेड़ा को न्याय करसी, लेखो देणो पड़सी।

⁶मरेड़ानै तो इ ताँई चोखो समचार सुणायो गयो हो क काया म तो मिनखा क कह्या गेल बाको न्याय हो, पण आत्मा म बे परमेसर क कह्या गेल जिवीं।

⁷बा घड़ी सांकड़ैई ह जद सक्यु नास होज्यासी। इ ताँई स्याणा बणो अर खुदनै बस म राखो जिऊँ थानै अरदास करबा म मदद मिलै।

⁸अर सऊँ बडी बात आ ह क थे एक दुसराऊँ प्यार-परेम राखो, क्युं क परेम बोळा पापनै ढकै ह।

⁹थे बिना बड़बड़ाया एक दुसरा की आवभगत कर्या करो।

¹⁰अर जिनै बी परमेसर कानिऊँ आत्मिक बरदान मिलेड़ो ह। बिनै चाए क बो परमेसर का चोखा भंडारी की जंय्यां बि आत्मिक बरदाननै एक दुसरा की सेवा करबा ताँई सूल काम म लेवै।

¹¹अर ज कोईनै बोलबा को, परमेसर का बचननै परचार करबा को अर कोईकी मदद करबा को बरदान होवै जणा बो बिनै बि ताकत क सागै काम म लेवै जखी परमेसर बिनै देवै ह। अर अ सगळी बाता अंय्यां होणी चाए जिऊँ परमेसरनै ईसु मसी की बजेऊँ जखो जुग-जुग ताँई मेमा म अर ताकतबर ह मान मिलै। अंय्यांई होवै!

¹²ओ मेरा लाडलो, थारो बिचास्यो जाबो लाय प चालबा की जंय्यां ह, पण थे इऊँ ताजूब मना करो क थारै सागै क्युं अनोरो होर्यो ह।

¹³पण राजी होवो क थानै मसी की जंय्यां दुख भोगबा को मोको मिल्यो। आ बात थानै बि बडी खुसी ताँई त्यार करसी जखी मसी जि दिन आपकी मेमा क सागै आसी जणा होसी।

¹⁴ज मसी क नाम की बजेऊँ थानै दुख अर बेजती सेणी पड़ै जणा बिनै सोभाग मानो। आ बात इनै दिखावै ह क परमेसर की मेमा भरी आत्मा थारै सागै ह।

¹⁵ज थे दुख उठाओ जणा थारो दुख उठाबो चोरी, हत्या, बुराई अर दुसरा का कामा म आट देबा की बजेऊँ नइ होणो चाए।

¹⁶पण ज थे मसी होबा की बजेऊँ दुख उठाओ हो जणा थानै सरमिंदा होबा की जुर्त कोनी, पण थानै इ बजेऊँ परमेसर की मेमा करबो चाए।

¹⁷क्युं क बा घड़ी आबाळी ह जद पेल्या तो परमेसर का मिनखा को न्याय कर्यो ज्यासी; अर न्याय की सरूआत आपणाऊँई होसी जणा बाको काँई होसी जखा परमेसर का चोखा समचारनै कोनी मानी?

¹⁸अर जंय्यां सास्तर बोलै ह, “ज धरमी मिनखई बडी मुसकीलाऊँ बचसी, जणा पाप्या अर जखा भगतीऊँ न्यारा रेह्‍वै ह बाको काँई होसी?”

¹⁹इ ताँई जखो परमेसर की इंछ्या गेल दुख उठावै ह, बे भला काम करता होया खुदनै बिस्वास जोगा परमेसरनै सूप दे जखो थानै बणायो ह।