Read Shekhawati 1 पतरस 5 Bible Online

1 पतरस 5 - Shekhawati bible

1 पतरस 5

¹इब म, थारै माला बिस्वासी मंडळी का मुखियाऊँ अरदास करूं हूँ। म खुद एक बिस्वासी मंडळी को मुखियो हूँ अर मसी जखो दुख भोग्यो हो बिको म गुवा हूँ अर आबाळी मेमा को म पाँतीवाळ हूँ।

²म थानै समजाऊँ हूँ क परमेसर की बिस्वासी मंडळी की जखी थारी देखरेख म ह बिकी रूखाळी करो। अर ओ काम कोईकै दबाव म आर मना करो पण परमेसर की इंछ्याऊँ राजी होर करो, अर धन का लालच की बजेऊँ ओ काम मना करो पण मन लगार इ कामनै करो।

³अर जखी बिस्वासी मंडळी थारी देखरेख म ह बिपै जोर मना जमायो। पण बा ताँई सीख बणो।

⁴क्युं क जद बो रूखाळो मसी जखो सकै उपर परधान ह परगट होसी, जणा थानै मेमा को मुकट मिलसी अर इ मुकट की रंगत कदैई कोनी जावै।

⁵अंय्यांई ओ जवानो थे बिस्वासी मंडळी का मुखिया क खया म चालो, थे छोटा बणर एक दुसरा की सेवा करो, क्युं क, “परमेसर गुमान करबाळा क खिलाप ह, पण जखो मिनख खुदनै छोटो बणावै ह बिकै उपर परबु दया करै ह।”

⁶इ ताँई परमेसर का सक्‍तिसाली हाता क तळै छोटा बणर रेह्‍वो जिऊँ बो थानै ठिक टेम प उचो उठावै।

⁷अर थे थारी सगळी चिंत्या बिनै देद्‍यो, क्युं क बिनै थारो ध्यान ह।

⁸थे चेता म रह्यो अर जागता रह्यो; क्युं क थारो बेरी सेतान धाड़बाळा सेर की जंय्यां इ खोज म रेह्‍वै ह क किनै पाड़ खाऊँ।

⁹बिस्वास म मजबूत होर सेतान को सामनो करो , क्युं क थे ओ जाणो हो की थारा भाईड़ा जखा इ दुनिया म च्यारूमेर फेलर्या हीं बे थारोसो दुख भोगर्या हीं।

¹⁰परमेसर जखो दया को दाता ह। बोई थानै मसी म जुग-जुग ताँई आपकी की मेमा ताँई बुलायो ह। अर थारै थोड़ोसोक दुख भोगबा क पाछै बो खुदई थानै मजबूत, ताकतबर अर पक्को बणासी।

¹¹परमेसर को राज जुग-जुग रेह्‍वै। अंय्यांई होवै।

¹²म बिस्वासी भाईड़ा सिवानुसनै बिस्वास जोगो जाणू हूँ, बिकै हात चिठी मंडवार थानै समजायो हूँ, अर आ गुवाई दिनी ह क परमेसर की सची दया आई ह। थे इमई मजबूत रेहज्यो।

¹³अर थारी जंय्यां टाळेड़ा बेबिलोन का मिनखा को थानै नमस्कार। बे परमेसर का टाळेड़ा मिनख हीं। मरकुस जखो मेरा छोरा की जंय्यां ह बो बी थानै नमस्कार खेवै ह।

¹⁴परेमऊँ एक दुसरानै हात जोड़र नमस्कार करो। म अरदास करूं हूँ क थानै सगळानै जखा मसी का हो परमेसर राजी-खुसी राखै।