Read Shekhawati 1 यहून्ना 2 Bible Online

1 यहून्ना 2 - Shekhawati bible

1 यहून्ना 2

¹ओ मेरा टाबरो, म थानै अ बाता इ ताँई मांडूँ हूँ क, थे पाप नइ करो। पण ज कोई मिनख पाप करै ह बिका पाप धोबा ताँई धरमी ईसु मसी आपणै अर परम-पिता क बिचमै बकिल ह जखो आपणानै परमेसर क सामै सई बणावै ह।

²बो आपणो मेळमिलाप परमेसरऊँ कराबा ताँई खुदनै एक बलिदान क रूप म दे दिओ। बो आपणा सगळा पाप धोवै ह , बो आपणाई नइ पण सगळा जगत का मिनखा का पाप धोवै ह।

³परमेसरनै सचमई जाणबा ताँई एकई गेलो ह क, आपा बिका हुकमानै माना, अर ज आपा अंय्यां करां हां, जणा बिनै सचमई जाण लिआ हां।

⁴पण ज कोई मिनख अंय्यां खेवै ह क, “म परमेसरनै जाणू हूँ,” पण बिका हुकमानै कोनी मानै जणा बो मिनख झूठो ह अर बिका हिया म सचाई कोनी।

⁵पण जखोबी मिनख परमेसर को खयो करै ह, जणा बिकै मांयनै परमेसर को परेम सचमई बास करै ह। क्युं क ओई एक गेलो ह जिऊँ आपा परमेसर म मजबूत बण्या रेह सकां हां।

⁶अर जखोबी मिनख आ खेवै ह क, बो परमेसर म मजबूत ह, जणा बिनै ईसु मसी क जंय्यां जीवन जिबो चाए।

⁷ओ लाडलो, म थानै कोई नयो आदेस कोनी देर्यो हूँ, पण जखो म थानै बताऊँ हूँ बो जुगादऊँ थानै सुणायो गयो ह। ओ पुराणो हुकम जखो चोखो समचार ह जिनै थे सुण चुक्या हो।

⁸म थानै एक ओर नयो आदेस मांडूँ हूँ। इकी सचाई मसी का जीवन म अर थारा जीवन म परगट होई ह। क्युं क अँधेरो मिटर्यो ह अर सचो च्यानणो चमकबा लागगो ह।

⁹अर जखो बी मिनख अंय्यां खेवै क, बो च्यानणा म चालै ह पण आपका बिस्वासी भाण भायाऊँ नफरत करै ह, जणा बो इब बी अँधेरा मई ह।

¹⁰जखो बी मिनख आपका बिस्वासी भाण भायाऊँ परेम करै ह बो च्यानणा म ह , अर बिकै जीवन म अंय्यां की कोईबी बात कोनी घटसी जिऊँ क बो पाप करै।

¹¹पण जखो बी मिनख आपका बिस्वासी भाण भायाऊँ नफरत करै ह बो इब बी अँधेरा मई हात मारतो भटकै ह अर अँधेरा मई जीवन जीवै ह। अर बो आबी कोनी जाणै क इ अँधेरा क मांयनै कठै जार्यो ह। क्युं क अँधेरो बिनै आँदो कर दिओ ह।

¹²ओ मेरा टाबरो, म थानै मांडू हूँ, क्युं क ईसु मसी की बजेऊँ थारा पाप धोया गया हीं।

¹³ओ बूडा ठेरो, म थानै मांडूँ हूँ, क्युं क थे बिनै जाणो हो जखो जुगादऊँ ह। ओ मोट्यारो म थानै मांडूँ हूँ, क्युं क थे बुराईनै हराया हो।

¹⁴ओ मेरा टाबरो म थानै मांडूँ हूँ, क्युं क थे पिता परमेसरनै जाण लिआ हो। ओ बूडा ठेरो म थानै मांडू हूँ, क्युं क थे बिनै जाणो हो जखो जुगादऊँ ह। ओ मोट्यारो म थानै मांडू हूँ, क्युं क थे ताकतबर हो, अर परमेसर को बचन थारै म बास करै ह, अर थे बुराईनै हराया हो।

¹⁵थे नइ तो इ दुनियाऊँ अर नइ इ दुनिया की चिजाऊँ परेम करज्यो। क्युं क जखो बी इ दुनियाऊँ परेम करै ह, बिकै हिया म परम-पिता बेई परेम कोनी ह।

¹⁶क्युं क इ दुनिया म बुरी इंछ्या, घमंड, काया की बुरी लालसा ह अ बाता परम-पिता क कानिऊँ कोनी पण इ दुनिया क कानिऊँ आवै ह।

¹⁷आ दुनिया अर इकी बुरी इंछ्या नास होज्यासी, पण जखो बी मिनख परमेसर की इंछ्या प चालै ह बिको कदैई नास कोनी होसी।

¹⁸ओ मेरा टाबरो, जंय्यांकी थे जाणो हो क, आखरी घड़ी आगी ह अर मसी को बेरी बी आबाळो ह, अर आबाळो काँई ह जदकी मसी का बोळा बेरी आग्या हीं। इ बात की बजेऊँई आपा जाण सकां हां क आ आखरी घड़ी ह।

¹⁹मसी का बेरी आपणाऊँ निकळ्या हीं पण बे आपणा कोनी। क्युं क ज बे आपणा होता जणा आपणो संगरो कोनी छोडता, पण बे अंय्यां कर दिखा दिओ क बे आपणा मऊँ कोनी।

²⁰पण थारो अभिसेक मसीऊँ होयो ह, जखो पबितर ह। इ ताँई थे सचाईनै जाणो हो।

²¹के थानै अंय्यां लागै क म आ चिठी इ ताँई मांडूँ हूँ क, थे सचनै कोनी जाणो ? पण थे तो सचनै जाणो हो अर आबी जाणो हो क जठै सच होवै बठै झूठ कोनी खटावै।

²²क्युं क झूठो बो ह जखो अंय्यां खेवै ह क, ईसु, मसी कोनी ह। अंय्यां खेबाळो मिनख मसी को बेरी ह। बो बेटा क सागै परम-पितानै बी नकारै ह।

²³जखो बेटानै नकारै ह बो परम-पितानै बी नकारै ह, पण जखो बेटानै मानै ह बो बिकै सागै परम-पितानै बी मानै ह।

²⁴जखी बाता थे जुगादऊँ सुण्या हा बानै मानता रेहस्यो जणाई बेटो अर परम-पिता बी थारै म बास करसी,

²⁵अर मसी खुद आपानै अजर-अमर जीवन देबा को बादो कर्यो ह।

²⁶म अ बाता बा मिनखा बेई थानै मांडी ह जखा थानै भंगराबा की कोसिस करीं हीं।

²⁷अर जठै ताँई थारी बात ह थारो अभिसेक बिऊँ होयो ह, थार म बण्यो रेह्‍वै ह। इ ताँई थानै तो आ जुर्तई कोनी क कोई थानै सीखावै। पण थानै जखी आत्मा दिनी गई ह बा सक्यु सीखावै ह। बा आत्मा सची ह, बा झूठी कोनी जंय्यां बा थानै सीखावै बंय्यांई करो अर मसी म बण्या रेह्ओ।

²⁸ओ टाबरो, इ ताँई थे ईसु मसी म बण्या रेह्ओ, जिऊँ बो परगट होसी जणा आपा बिस्वास म मजबूत रेह्‍वां अर जद बो ओज्यु आसी बि टेम का आपानै बिकै सामै सरमिंदा नइ होणो पड़ै।

²⁹अर ज थे आ जाणो हो क बो धरमी ह जणा थे आबी जाणल्यो क जखो मिनख धरम का काम करै ह बो बिऊँ जलम्यो ह।