Read Shekhawati 1 यहून्ना 4 Bible Online

1 यहून्ना 4 - Shekhawati bible

1 यहून्ना 4

¹लाडलो, हरेक मिनख की बाता को बिस्वास मना करो जखो खेवै ह क, म, आत्माऊँ बोलुँ हूँ। पण सदाई बाकी आत्मानै परखो अर देखो क बामै परमेसर ह क कोनी। म थारूँ अंय्यां इ ताँई खेर्यो हूँ, क्युं क इ दुनिया म बोळा झूठा परमेसर की खेबाळा घुमर्या हीं।

²थे परमेसर की पबितर आत्मानै अंय्यां जाण सको हो: जिकी बी आत्मा आ खेवै ह क, “ईसु मसी, मिनख काया म इ धरती प आयो।” बिकी आत्मा परमेसर क कानिऊँ ह।

³अर हरेक बा आत्मा जखी ईसु मसी क बारां म इ बातनै कोनी मानै बा परमेसर क कानिऊँ कोनी। बा मसी का बेरी की आत्मा ह, जिकै बारां म थे पेल्याऊँई सुण चुक्या हो क बो आबाळो ह। बो आबाळो के ह बो तो इब बी इ दुनिया मई ह।

⁴ओ टाबरो, थे परमेसर का हो। इ ताँई थे झूठा परमेसर की खेबाळानै जीत लिआ हो। क्युं क थारै मांयनै रेह्बाळो परमेसर, इ दुनिया म रेह्बाळा सेतानऊँ बडो ह।

⁵बे झूठा परमेसर की खेबाळा इ दुनिया का हीं, अर इकै बारां मई बात करीं हीं अर आ दुनियाई बाकी बाता सुणै ह।

⁶पण आपा परमेसर का हां अर जखो बी परमेसरनै जाणै ह बो आपणी बाता सुणै ह। पण जखो परमेसर को कोनी बो आपणी कोनी सुणै। अर इ बातऊँ आपा आ जाण सकां हां क, कूणसी आत्मा सच की ह अर कूणसी आत्मा भंगराबाळी ह।

⁷लाडलो, आपा एक दुसराऊँ प्यार-परेम करां। क्युं क परमेसरई परेम ह अर जखा बी प्यार-परेम करै ह बे परमेसर का बेटा-बेटी बणग्या हीं अर बे परमेसरनै जाणी हीं।

⁸जखोबी मिनख परेम कोनी करै बो परमेसरनै कोनी जाण्यो। क्युं क परमेसरई परेम ह।

⁹परमेसर आपका एकलोता बेटानै इ दुनिया म भेजर आपको परेम परगट कर्यो जिऊँ आपानै बिका बेटा की बजेऊँ जीवन मिल सकै।

¹⁰सचो परेम इमै कोनी क आपा परमेसरऊँ परेम करां हां पण इमै ह क परमेसर आपणाऊँ परेम कर्यो अर आपका बेटानै आपणा पाप ताँई बलिदान होबानै भेज दिओ।

¹¹लाडलो, जदकी परमेसर आपणाऊँ अंय्यां को परेम कर्यो ह जणा पाछै आपानै बी एक दुसराऊँ प्यार-परेम करबो चाए।

¹²परमेसरनै कोईबी कदैई कोनी देख्यो, पण ज आपा एक दुसराऊँ प्यार-परेम करां जणा परमेसर आपणा म बास करै ह अर बिको परेम आपणै मांयनै पूरी तर्या ह।

¹³अर आपानै पूरो बिस्वास बी ह क बो आपणा म बास करै ह अर आपा बी बिकै सागै चालां हां क्युं क बो आपानै खुदकी पबितर आत्मा दिओ ह।

¹⁴परम-पिता आपका बेटानै इ जगत का मिनखा को छुटकारो करबा ताँई भेज्यो। अर म्हें बिनै देख्या अर बिका गुवा बी हां।

¹⁵अर जखो बी इ बातनै मानै ह क, “ईसु परमेसर को बेटो ह,” जणा परमेसर बिकै मांयनै बास करै ह अर बो परमेसर को होज्यावै ह।

¹⁶जंय्यां को परेम परमेसर आपाऊँ करै ह बिनै आपा जाणा हां अर आपा बिपै बिस्वास बी करां हां। परमेसर परेम ह, अर जखो बी मिनख परेम करै ह बो परमेसर म बण्यो रेह्‍वै ह अर परमेसर बिमै बास करै ह।

¹⁷इऊँ आपणा म परेम साबित होयो ह क, जद न्याय होसी जणा बिस्वास म बण्या रेह्‍वां, क्युं क आपा बंय्यांई इ दुनिया म जीवन जीवां हां जंय्यांकी मसी जीवन जियो हो।

¹⁸जखो मिनख परेम करै ह बो डरै कोनी क्युं क परेम डरनै दूर करै ह। डर को सागो सजाऊँ ह, इ ताँई जखोबी मिनख डरै ह बिमै परेम कदैई कोनी हो सकै।

¹⁹म्हें इ ताँई परेम करां हां क्युं क परमेसर पेल्या आपणाऊँ परेम कर्यो ह।

²⁰अर ज आपा खेवां क, “म्हानै परमेसरऊँ परेम ह।” पण मेरा भाईऊँ नफरत ह जणा आपा झूठा हां, क्युं क जि पाड़ोसी भाईड़ानै आपा देखां हां बिऊँई परेम कोनी करां, जणा बि परमेसरऊँ जिनै कदै देख्याई कोनी कंय्यां परेम कर सकां हां?

²¹मसी आपानै ओ हुकम दिओ ह क, ज आपा परमेसरऊँ[2] परेम करां हां जणा आपानै पाड़ोसी भाईड़ाऊँ बी परेम करबो चाए।