Read Shekhawati 3 यहून्ना 1 Bible Online

3 यहून्ना 1 - Shekhawati bible

3 यहून्ना 1

¹म, बिस्वासी मंडळी को मुखियो, आ चिठी लाडला गयुसनै मांडू हूँ , जिऊँ म बिकै सचाई प चालबा की बजेऊँ परेम करूं हूँ।

²मेरा लाडला, म अरदास करूं हूँ क, तेरी काया निरोगी रेह्‍वै अर तेरै सागै भलोई होवै, जंय्यांकी तू आत्मिक बाता म आगै बढर्यो ह।

³अर जद तेरै बारां म आपणा भाईड़ा मऊँ क्युं क जणा मनै बताया क तू सचाई प चालै ह अर सचनैई मानै ह जणा म आ सुणर बोळो राजी होयो।

⁴मनै इऊँ बेत्ती राजी कोई बात कोनी करै क मेरा टाबर सचाई प चालै ह।

⁵मेरा लाडला, तू तेरा बिस्वासी भाया का हित म काम करबा ताँई बिस्वास जोगो ह , अठै ताँई क बे तेरूँ अणजाणई क्युं नइ हो।

⁶जणाई तो बे बिस्वासी मंडळी क सामै तेरै बारां म आ गुवाई दिनी ह क तू बाऊँ कंय्यां को परेम राख्यो ह। इ ताँई जद तू बानै बिदा करै जणा अंय्यां करजे जिऊँ परमेसरनै मान मिलै।

⁷क्युं क बे मसी की सेवा करबा ताँई जार्या हीं अर बे परमेसरनै नइ ध्यारबाळा मिनखाऊँ मदद कोनी लेवीं।

⁸इ ताँई आपानै जखा बिस्वासी हीं बाकी खातरदारी करनी चाए , जिऊँ क आपाबी बाकै सागै सचाई फेलाबा म सामिल हो सकां।

⁹इकै बारां म, म, बिस्वासी मंडळीनै बी मांड्यो हो, पण दियुतीफेस जखो नेतो बण्यो घूमै ह , बो म्हारी आवभगत कोनी करी।

¹⁰इ ताँई जद म आस्युं जणा बतास्युं क बो काँई-काँई करै ह। बो म्हारै बारां म भड़काबाळी बाता फेलावै ह। बो आई कोनी करै पण बिस्वासी भाया की बी आवभगत कोनी करै। अर जखो कोई बाकी आवभगत करबो बी चावै ह बानै बो करबा कोनी देवै अर बो बानै बिस्वासी मंडळी क बारनै काड देवै ह।

¹¹मेरा लाडला, तू तो बुराई क गेलै नइ पण भलाई क गेलै चालजे। क्युं क जखो बी मिनख भलाई करै ह, बो परमेसर को ह। अर जखो बुराई करै ह बो परमेसरनै कोनी जाणै।

¹²दिमेतीयुसनै जाणबाळा बिस्वासी बिकै बारां म चोखो बोलीं हीं अर ओ सच बी ह। अर म्हें खुदबी बिनै भलो मिनख बतावां हां अर थे तो जाणोई हो क म्हारी गुवाई सची ह।

¹³थानै मांडबा ताँई तो मेरै कनै ओर बी बोळो क्युं ह, पण म बानै कागद प स्याईऊँ मांडबो कोनी चाऊँ।

¹⁴म आ आस करूं हूँ क, म थारै कनै आर आमै-सामै बतळाऊँ।

¹⁵तनै सुक-स्यांती मिलती रेह्‍वै। बिस्वासी भाईड़ा क कानिऊँ तनै राजी-खुसी का समचार। म्हारै कानिऊँ तू बठै का हरेक बिस्वासी भाईड़ा क कनै जार राजी-खुसी समचार बोलजे।