Read Shekhawati यहूदा 1 Bible Online

यहूदा 1 - Shekhawati bible

यहूदा 1

¹म, यहूदा जखो ईसु मसी को दास अर याकूब को भाई हूँ। आ चिठी थानै मांडूँ हूँ, जानै परम-पिता परमेसर बुलायो ह अर जिऊँ बो लाड करै ह, अर थानै जखानै ईसु मसी बचा राख्यो ह।

²थार प सुक-स्यांती, दया अर परेम खूब होवै।

³लाडलो म तो घणोई चातो हो क, थानै बि छुटकारा क बारां म मांडूँ, जिका आपा बराबर का पाँतीवाळ हां। अर मनै अंय्यां बी लाग्यो क, म थानै अ बाता मांडर बढाओ द्‍युँ जिऊँ थे बिस्वास म बढता रेह्‍ओ, ओ बो बिस्वास ह जखो परमेसर का मिनखानै दिओ गयो ह।

⁴पण थारै म अंय्यां का मिनख घुसगा हीं, जिकै बारां म सास्तर म पेल्याऊँई मांडेड़ो ह क, बानै सजा मिलसी। बे परमेसरनै कोनी मानी अर आपणा परमेसर की दयानै कुकरम करबा ताँई हरी झंडी मानी हीं। बे आपणा परबु जखो आपणो मालिक ह बि ईसु मसीनै मानबाऊँ बी मना करीं हीं।

⁵थे तो बा बातानै जाणोई हो, पण म थानै ओज्यु याद दिलाबो चाऊँ हूँ, क परबु आपका मिनखानै मिसर देसऊँ निकाळर बचार ल्यायो हो। पण बा मिनखा मऊँ कई बिस्वासऊँ मुकरगा इ ताँई बोई बा मिनखानै नास कर दिओ जखा बिस्वासऊँ मुकरगा हा।

⁶म थानै बा दुता क बारां म बी याद दिलाबो चाऊँ हूँ, जखा आपका अधिकार का पदनै समाळर कोनी राख्या पण बि झघानै छोडर भाग्या जिनै परमेसर बानै रेह्बानै दिओ हो। जणा परमेसर बानै सदा ताँई की आग की भटी म न्यायहाळै दिन ताँई बंद कर दिओ, जिऊँ न्याय क दिन बानै सजा दे।

⁷परमेसर इजरायल का बा मिनखा अर बा ईस्बर नगरी दुता की जंय्यां, सदोम अर अमोरानै अर बिकै कनै की नगर्या का मिनखानै जखा कुकरम करता हा, अर बुरा कामा क गेल भागता हा, बानै कदैई नइ बुत्तबाळी आग म झोकर सजा दिनी। जिऊँ अ बाता ओरा ताँई सबक होवै।

⁸अंय्यांई बे मिनख हीं जखा थारी मंडळ्या म घुसगा हीं। बे बाकी जंय्यांई कुकरम कर आपकी कायानै सूगली करीं हीं, अर खेवीं हीं, “अंय्यां करबा ताँई परमेसर म्हानै दरसाव देर खयो ह।” अंय्यां कर बे आपणा परबु का अधिकारनै कोनी मानी अर ईस्बर नगरी दुता की बुराई करीं।

⁹थानै याद होवै तो ईस्बर नगरी को दुत मीकाईल जखो दुता को मुखियो ह। बिकी जद मूसा की लास ताँई सेतानऊँ जिरै होई, क बिकी लासनै लेज्याबा को हक किको ह। जणा बी बो सेतान की बुराई कोनी करी, बस अत्तोई बोल्यो, “तनै परबुई सजा देवै!” क्युं क बिमै बी न्याय करबा का परबु का अधिकारनै हड़पबा की हिमत कोनी ही।

¹⁰पण अ मिनख तो जखी बाता क बारां म जाणैई कोनी बाकै बारां म भावै जंय्यां बोलीं हीं। अ तो बिना समज का ज्यानबरा की जंय्यां हीं, जणाई बिना सोच्या समज्या भाऊँ बंय्यां करीं हीं। आ बुरी बाता की बजेऊँ बाको नास कर दिओ ज्यासी।

¹¹बापै स्यामत पड़सी! अ मिनख तो कैन[1] की जंय्यांई बुराई का गेला प चालीं हीं, अर अ धन का लालच म बिलाम की जंय्यांई पाप करीं हीं। अ मिनख परमेसर क सामै होगा हीं जंय्यां कोरह होयो हो। जणा आ सगळी बाता बेई आको बी नास कर्यो जासी।

¹²बिस्वासी मंडळी म जद कदै दावत होवै जणा बि टेम अ मिनख थारै सागै रेह्‍वै, जणा अ गेला का बा खाडा की जंय्यां हीं जखा पत्ताऊँ ढकेड़ा होवै। बिस्वासी मंडळी म रोटी खाती टेम अ आपका बेसरमी भर्या कामा प नइ तो सरमिंदा होवीं अर नइ आनै डर लागै। अ बा गुवाळ्या की जंय्यां हीं जानै लल्ड्याऊँ क्युंई मतबल कोनी, पण बे खुदको पेट भरबो सूल जाणी हीं। जंय्यां रेगीस्तान म बिना पाणी का बादळ भाळऊँ उनै का उनै होता रेह्‍वै ह पण छांटई कोनी गेरै, बंय्यांई अ मिनख बात तो बोळी लामी-लामी करीं हीं पण देबानै आकै कनै क्युंई कोनी। अ बि दरखत की जंय्यां हीं जखो आपकी रुत म बी कोनी फळै अर जिनै उपाड़ दिओ गयो ह। आऊँ क्युंई भलो कोनी होवै।

¹³अ मिनख आपका करमाऊँ गंदगी फेलावीं हीं जंय्यां तौफान म समदर की झाल झाग फेकै ह। थानै आ मिनखा का दिखाया गेला प नइ चालबो चाए क्युं क अ बा तारा की जंय्यां हीं जखा नित नई-नई दिसा म जावीं हीं। आ ताँई नरक म अँधेरीयो खाडो सदाई त्यार ह जिमै आनै पटक्यो जासी।

¹⁴आ मिनखा ताँई हनोक जखो आदम की सातवी पिडी मऊँ हो बो बी खयो हो, “देखो! परबु आपका हझारा-हझारा पबितर ईस्बर नगरी दुता क सागै आर

¹⁵सगळा को न्याय करसी। बो बा सगळा मिनखानै जखा परमेसरनै कोनी मानी बाका बुरा करमा की सजा देसी, जखा बे कर्या हीं। परबु पक्काईऊँ परमेसरनै नइ मानबाळा मिनखानै बाका हरेक बुरा बोल ताँई सजा देसी जखा परबु बेई बे बोल्या ह।”

¹⁶क्युं क अ मिनख बड़बड़ाबाळा, दुसरा मिनखा म दोस ढुंढबाळा, आपकी इंछ्यानै पूरी करबा बेई जिबाळा, बडा-बडा बोल बोलबाळा अर आपका फायदा ताँई दुसरा की चमचागरी करबाळा हीं।

¹⁷लाडलो, थे बा बातानै याद करो, जखी थानै चेताबा ताँई परबु ईसु मसी का भेजेड़ा चेला पेल्याऊँई बता दिनी ह।

¹⁸बे थानै खया हा क, “आखरी दिना म अंय्यां का मिनख बी आसी जखा परबु अर बिका मिनखा को तमासो बणासी, परमेसरनै नइ मानबाळा बे मिनख आपकी बुरी इंछ्या गेल मन मरजी करसी।”

¹⁹अ मिनख बेई हीं, जखा थारै म फूट गेरीं हीं। बे इ धरती का जीवन बेई सोचीं हीं, बामै पबितर आत्मा कोनी।

²⁰पण लाडलो, थे बिस्वास की पबितर निम प मजबूत होता जाओ अर पबितर आत्मा की मददऊँ अरदास करो।

²¹आपणा परबु ईसु मसी की दयानै उडिकता रेह्‍ओ, जखो थानै अजर-अमर जीवन देसी। अंय्यां कर थे खुदनै परमेसर का परेम म बचार राखस्यो।

²²अर जखा मिनख डावांडोळ ह बाकै उपर दया करज्यो।

²³थे आगै बढर बा मिनखानै बचाल्यो जखा बचबो चावीं हीं। बानै बंय्यां बचाल्यो जंय्यां थे कोईनै लायऊँ बचाया हो। बापै परबु को डर मानर दया करो। पण बाका बा गाबाऊँ जापै बाकी बुरा करमा की गंदगी लागरी ह नफरत करो, मतबल बाका पाप भर्या करमाऊँ नफरत करो।

²⁴परबु ईसु मसी की बजेऊँ आपानै बचाबाळा परमेसर की जे-जैकार हो। परमेसरई थानै बचा सकै ह, अर पापऊँ धो सकै ह। अर बोई ह जखो थानै आपकी मेमाभरी मोजूदगीऊँ राजी कर सकै ह अर खुद क सामै निरदोस खड़्यो कर सकै ह। जुगादऊँ इब ताँई अर आबाळा जुग-जुग ताँई मेमा, मान, ताकत अर अधिकार परमेसर कोई ह। अंय्यांई होवै।