Read Shekhawati दरसाव 10 Bible Online

दरसाव 10 - Shekhawati bible

दरसाव 10

¹इकै पाछै, म ईस्बर नगरीऊँ एक ताकतबर ईस्बर नगरी दुतनै तळै उतरता देख्यो। बिकै च्यारूमेर बादळ हा। बिकै सीर क कनै मेघ धनुस हो। बिको मुंडो सूरज की जंय्यां चमकर्यो हो अर बिका पग आग का खम्बा की जंय्यां हा।

²बो हात म एक खुलेड़ी छोटीसी पोथी ले माली ही। बो आपका दाया पगनै समदर प अर बाया पगनै सूकी धरती प धर्यो,

³अर बो नार की जंय्यां दहाड़ मारी। जणा सात बर गरजन गुंजी।

⁴अर जद सात बर गरजन गुंजी जणा म मांडबा ताँई त्यार होयो, पण म ईस्बर नगरीऊँ हेलो सुण्यो, “जखी बाता बा गरजनऊँ गुंजी ह बानै ओला म राख बानै मना मांड।”

⁵जणा जि ईस्बर नगरी दुतनै, म समदर अर सूकी धरती प खड़्यो देख्यो हो, बो आपका दाया हातनै ईस्बर नगरी कानि उठायो।

⁶बो बि परमेसर की जखो ईस्बर नगरी अर धरती, समदरनै अर आकै मांयनै जखी चिजा ह बा सगळ्यानै रच्यो ह बिकी सोगन खार बोल्यो, “इब ओर मोड़ो कोनी होसी।

⁷पण जद सातुओ ईस्बर नगरी दुत को तूताड़ी फूंकबा को टेम आसी बि दिन परमेसर का बे भेद पूरा होसी जिनै बे आपका दासा अर परमेसर की खेबाळानै बताया हा।”

⁸जखो ईस्बर नगरीऊँ हेलो आयो हो, बो एकर ओर आयो, “जा, अर जखो ईस्बर नगरी दुत समदर अर सूकी धरती प खड़्यो ह, बिकै हात मऊँ बा खुलेड़ी पोथी लेले।”

⁹जणा म बि ईस्बर नगरी दुत क कनै गयो अर बिऊँ बोलो, “मनै बा छोटी पोथी दे दे।” बो मेरूँ बोल्यो, “ले अर इनै खाज्या। इऊँ तेरो पेट खराब होसी पण तेरो मुंडो सहदऊँ बी मिठो होज्यासी।”

¹⁰म बी ईस्बर नगरी दुत क हातऊँ बा पोथी लेली अर खागो। अर बिऊँ मेरो मुंडो सहदऊँ बी मिठो होगो पण पेट म गळदाई होगी।

¹¹जणा मेरूँ बोल्यो गयो, “तनै परमेसर को समचार सगळा देसानै, सगळा राजानै, सगळी बोली बोलबाळा मिनखानै सुणाणो ह।”