Read Shekhawati दरसाव 15 Bible Online

दरसाव 15 - Shekhawati bible

दरसाव 15

¹इकै पाछै म ईस्बर नगरी म एक ओर ताजूबभरी निसाणी देखी, इबकै म देख्यो क सात ईस्बर नगरी दुत आखरी सात म्हामार्या क सागै हा। क्युं क आकै होबा क सागैई परमेसर को परकोप बी पूरो होज्यासी।

²इकै पाछै मनै काच की जंय्यां को समदर दिख्यो बो अंय्यां दिखै हो जंय्यां क बिकै मांयनै आग बळरी हो। जखा मिनख बि डरावना जानबर की मूरती अर बिका नाम का आंकऊँ जीतगा हा बानै बी काच का समदर क सारै खड़्या देख्या। बे परमेसर की देयड़ी बीणा ले राखी ही

³बे मिनख परमेसर का दास मूसा अर उन्या का गीत गावा हा, “परबु परमेसर थे सऊँ सक्‍तिसाली हो। थारा काम बडा अर ताजूबभर्या हीं। ओ जुग-जुग का राजा। थारो गेलो सचो अर धारमिक ह।

⁴ओ परबु, बस थेई पबितर हो! देस-देस का मिनख थारै कनै आसी अर थारी जे-जैकार करसी। सगळा थारूँ डरसी अर थारो मान करसी, क्युं क थारी धारमिक्‍ता परगट होई ह।”

⁵इकै पाछै म ईस्बर नगरी म मनदरनै देख्यो जखो बि तम्मूनै दिखावै ह जिमै दस हुकम धरेड़ा हा। इ मनदर का कुआड़ खोल्या गया।

⁶बिकै मांयनैऊँ बे सात ईस्बर नगरी दुत बा सात म्हामार्या क सागै बारनै आया। बे साप अर चमकीला धोळा गाबा पेरमाल्या हा अर आपका सीना प सोना का पटा बांद माल्या हा।

⁷जणा बा च्यारू जीवता पराण्या मऊँ एक जणो बा सात्यु ईस्बर नगरी दुतानै एकेक सोना को प्यालो दिओ जखो अमर परमेसर का परकोपऊँ भरेड़ा हा।

⁸बो मनदर परमेसर की मेमा अर सक्‍ति का धुँआऊँ भरेड़ो हो। अर जद ताँई बे सात ईस्बर नगरी दुत बा सात म्हामार्यानै पूरी होबा ताँई कोनी भेजी बि मनदर म कोई कोनी बड़ सक्यो।