Read Shekhawati दरसाव 16 Bible Online

दरसाव 16 - Shekhawati bible

दरसाव 16

¹जणा म सुण्यो क बा सात्यु ईस्बर नगरी दुतानै मनदर मऊँ कोई जोरको हेलो देर बोल्यो, “जाओ, अर परमेसर का परकोपऊँ भरेड़ा आ सात्यु प्यालानै धरती प उंदकाद्‍यो।”

²जणा पेलो ईस्बर नगरी दुत गयो अर धरती प आपको प्यालो उंदका दिओ, जिऊँ जखा मिनख बि डरावना जानबरनै अर बिकी मूरतीनै धोक्या हा अर बिको आंक लिआ हा बाकै राद हाळा सूगला गुमड़ा निकळ्याया।

³बिकै पाछै दुसरो ईस्बर नगरी दुत आपको प्यालो समदर प उंदका दिओ, जिऊँ समदर को पाणी मरेड़ा मिनखा का लोय की जंय्यां होगो अर समदर क मांयनै जत्ता बी जीवता जानबर हा बे सगळा मरगा।

⁴तीसरो ईस्बर नगरी दुत आपको प्यालो नद्‍या अर झरना प उंदका दिओ जिऊँ बाको पाणी बी लोय होगो।

⁵जणा म पाणी प अधिकार राखबाळा ईस्बर नगरी दुतनै ओ बोलता सुण्यो, “ओ पबितर, थे सई न्याय करो हो। थे हा अर हो,

⁶क्युं क अ मिनख थारा मिनखा अर परमेसर की खेबाळा को लोय भुआया हीं। थे बानै पीबानै लोय दिओ ह बे इ जोगाई ह।”

⁷बिकै पाछै म बेदीऊँ उवाज सुण्यो, “ओ परबु परमेसर थे सऊँ सक्‍तिसाली हो। थारो न्याय सचो अर सई ह।”

⁸चोथो ईस्बर नगरी दुत आपको प्यालो सूरज प उंदका दिओ, अर मिनखानै गरमीऊँ बाळबा ताँई सूरजनै सक्‍ति दे दि।

⁹जिऊँ बे मिनख भेंकर गरमीऊँ तपगा अर परमेसर का नाम की बुराई करबा लाग्या जिकै बस म आ म्हामारी ही , पण बे तौबा कोनी कर्या अर नइ परमेसर की मेमा करी।

¹⁰बिकै पाछै पाचवो ईस्बर नगरी दुत आपको प्यालो बी डरावना जानबर का सिंघासन प उंदका दिओ, जिऊँ बिका राजपाट म अँधकार छागो। पिड़ा क मार्या मिनख आपका दांताऊँ आपकी जीब काट ली।

¹¹बे मिनख दरद अर गुमड़ा की बजेऊँ ईस्बर नगरी का परमेसर की बुराई करर्या हा, पण बे आपका कामाऊँ तौबा कोनी कर्या।

¹²छठो ईस्बर नगरी दुत आपको प्यालो बडोड़ी नदि फरात प उंदका दिओ, जिऊँ बिको पाणी सूकग्यो। अर बिको पाणी सूकबाऊँ अगुणी दिसा का देसा का राजा ताँई गेलो बणगो।

¹³इकै पाछै म काँई देख्यो क बी बडासारका अजगर क मुंडाऊँ, अर बी डरावना जानबर क मुंडाऊँ अर बाका झूठा परमेसर की खेबाळा का मुंडाऊँ मिंडका सारकी तीन सूगली आत्मा निकळी।

¹⁴अ सेतानी ओपरी बलाय ही आकै मांयनै चमत्कार करबा की सक्‍ति ही। अ सगळा जगत का राजानै भेळा करबा ताँई चाल पड़ी जिऊँ अ सऊँ सक्‍तिसाली परमेसर का न्याय का दिन लड़ाई लड़ै।

¹⁵“चेता म रेह्‍वो, क्युं क म चोर की जंय्यां चाणचुक आऊँ हूँ! भागहाळा हीं बे जखा जागता रेह्‍वै ह, अर आपका गाबानै समाळै ह, जिऊँ बे सरमा नइ मरै।”

¹⁶बे ओपरी बलाय बा सगळा राजानै भेळा कर बि झघा लिआई जिनै इबरानी भासा म हरमगिदोन बोलै ह।

¹⁷इकै पाछै सातुओ ईस्बर नगरी दुत आपको प्यालो भाळ प उंदका दिओ, अर मनदर का सिंघासनऊँ जोरको हेलो सुणाई दिओ, “सक्यु पूरो होगो!”

¹⁸जणा बिजळी कड़कर चमकबा लागी, बादळ गरजबा लाग्या अर जोरको भूचाळ आयो। अंय्यां को भूचाळ इऊँ पेल्या धरती प कदैई कोनी आयो। ओ भूचाळ बोळो भेंकर हो।

¹⁹अर बडी नगरी का तीन टुकड़ा होगा, अर पापी मिनखा की सगळी नगर्या नास होगी। परमेसर बाबुल नगरीनै सजा देबा ताँई याद कर्यो जिऊँ क बो बिनै आपका परकोपऊँ भरेड़ो अँगूरी को प्यालो पिलावै।

²⁰सगळा टापू लापता होगा। एक डूँगर बी नजर कोनी आर्यो हो।

²¹आसमानऊँ मण-मण का ओळा मिनखा प पड़र्या हा। अर इ म्हामारी की बजेऊँ मिनख परमेसर की बुराई करर्या हा। क्युं क आ म्हामारी बोळी भेंकर ही।