Read Bhaibheri Dzvene MuChiShona Chanhasi Genesisi 13 Bible Online

Genesisi 13 - Bhaibheri Dzvene MuChiShona Chanhasi bible

Genesisi 13

¹Saka Abhurama akakwidza achibva kuIjipiti akaenda kuNegevhi, nomukadzi wake uye nezvinhu zvose zvaakanga anazvo, uye Roti akaenda naye.

²Abhurama akanga apfuma kwazvo pamombe nesirivha uye negoridhe.

³Kubva kuNegevhi akafamba nzvimbo nenzvimbo kudzamara asvika kuBheteri, kunzvimbo iri pakati peBheteri neAi kwaimbova netende rake kare

⁴uye kwaakanga atanga kuvaka aritari. Abhurama akadana kuzita raJehovha ikoko.

⁵Zvino Roti, uyo akanga achifamba naAbhurama, akanga ana makwai nemombewo namatende.

⁶Asi nyika haina kugona kuvaringana kuti vagare pamwe chete, nokuti pfuma yavo yakanga yakawanda kwazvo zvokuti vakanga vasisakwanisi kugara pamwe chete.

⁷Uye gakava rakamuka pakati pavafudzi vaAbhurama navafudzi vaRoti. VaKenani navaPerizi vakanga vachigarawo munyika panguva iyoyo.

⁸Saka Abhurama akati kuna Roti, “Ngaparege kuva negakava pakati pako neni, kana pakati pavafudzi vako nevangu, nokuti tiri hama.

⁹Ko, nyika yose iyi haisi pamberi pako here? Ngatiparadzane. Kana ukaenda kuruboshwe, ini ndichaenda kurudyi; kana ukaenda kurudyi, ini ndichaenda kuruboshwe.”

¹⁰Roti akatarira kumusoro akaona bani rose reJorodhani kuti rakanga rakanyatsonyorova, sebindu raJehovha, kufanana nenyika yeIjipiti, kwakanangana neZoari. (Panguva iyi Jehovha akanga achigere kuparadza Sodhomu neGomora.)

¹¹Saka Roti akazvisarudzira bani rose reJorodhani uye akasimuka akananga kumabvazuva. Varume vaviri ava vakaparadzana:

¹²Abhurama akagara munyika yeKenani, Roti akagara pakati pamaguta omumapani uye akadzika matende ake pedyo neSodhomu.

¹³Zvino varume veSodhomu vakanga vakaipa uye vaitadzira Jehovha kwazvo.

¹⁴Jehovha akati kuna Abhurama shure kwokubva kwaRoti, “Simudza meso ako uri pauri ipapo uye utarire kumusoro nezasi, kumabvazuva nokumavirira.

¹⁵Nyika yose yauri kuona ndichakupa iwe navana vako nokusingaperi.

¹⁶Ndichaita kuti vana vako vave seguruva renyika, zvokuti kana pano munhu angagona kuverenga guruva, naizvozvo vana vako vachagona kuverengwawo.

¹⁷Enda, famba munyika, muurefu nomuupamhi hwayo, nokuti ndichaipa kwauri.”

¹⁸Saka Abhurama akabvisa matende ake uye akandogara pedyo nemiti mikuru yeMamure paHebhuroni, uye akavakira Jehovha aritari ipapo.