Read Bhaibheri Dzvene MuChiShona Chanhasi Genesisi 5 Bible Online

Genesisi 5 - Bhaibheri Dzvene MuChiShona Chanhasi bible

Genesisi 5

¹Iyi ndiyo rondedzero yakanyorwa yorudzi rwaAdhamu. Mwari paakasika munhu akamuita nomufananidzo waMwari.

²Akavasika murume nomukadzi uye akavaropafadza. Uye vakati vasikwa, akavatumidza kuti “munhu.”

³Adhamu akati agara makore zana namakumi matatu, akabereka mwanakomana akafanana naye, akanga akamutodza; akamutumidza zita rokuti Seti.

⁴Shure kwokuberekwa kwaSeti, Adhamu akararama kwamakore mazana masere uye akaberekazve vamwe vanakomana navanasikana.

⁵Pamwe chete, Adhamu akararama kwamakore mazana mapfumbamwe namakumi matatu, uye ipapo akafa.

⁶Seti akati agara makore zana namashanu, akabereka Enoshi.

⁷Uye shure kwokubereka kwake Enoshi, Seti akararama kwamakore mazana masere namanomwe uye akavazve navamwe vanakomana navanasikana.

⁸Pamwe chete, Seti akararama kwamakore mazana mapfumbamwe negumi namaviri, uye ipapo akafa.

⁹Enoshi akati ararama kwamakore makumi mapfumbamwe, akabereka Kenani.

¹⁰Uye shure kwokubereka kwake Kenani, Enoshi akararama kwamakore mazana masere ane gumi namashanu uye akavazve navamwe vanakomana navanasikana.

¹¹Pamwe chete, Enoshi akararama kwamakore mazana mapfumbamwe namashanu, uye ipapo akafa.

¹²Kenani akati ararama kwamakore makumi manomwe, akabereka Maharareri.

¹³Uye mushure mokubereka kwake Maharareri, Kenani akagara kwamakore mazana masere namakumi mana uye akavazve navamwe vanakomana navanasikana.

¹⁴Pamwe chete, Kenani akararama kwamakore mazana mapfumbamwe negumi, uye ipapo akafa.

¹⁵Maharareri akati agara kwamakore makumi matanhatu namashanu, akabereka Jaredhi.

¹⁶Uye mushure mokubereka kwake Jaredhi, Maharareri akararama kwamakore mazana masere namakumi matatu uye akavazve navamwe vanakomana navanasikana.

¹⁷Pamwe chete, Maharareri akararama kwamakore mazana masere namakumi mapfumbamwe namashanu, uye ipapo akafa.

¹⁸Jaredhi akati ararama kwamakore zana namakumi matanhatu namaviri, akabereka Enoki.

¹⁹Uye mushure mokubereka kwake Enoki, Jaredhi akararama kwamakore mazana masere akavazve navamwe vanakomana navanasikana.

²⁰Pamwe chete, Jaredhi akararama kwamakore mazana mapfumbamwe namakumi matanhatu namaviri, uye ipapo akafa.

²¹Enoki akati ararama kwamakore makumi matanhatu namashanu, akabereka Metusera.

²²Uye mushure mokubereka kwake Metusera, Enoki akafamba naMwari kwamakore mazana matatu uye akavazve navamwe vanakomana navanasikana.

²³Pamwe chete, Enoki akararama kwamakore mazana matatu namakumi matanhatu namashanu.

²⁴Enoki akafamba naMwari; ipapo akasazovapo, nokuti Mwari akamutora.

²⁵Metusera akati ararama kwamakore zana namakumi masere namanomwe, akabereka Rameki.

²⁶Uye mushure mokubereka kwake Rameki, Metusera akararama kwamakore mazana manomwe namakumi masere namaviri uye akavazve navamwe vanakomana navanasikana.

²⁷Pamwe chete, Metusera akararama kwamakore mazana mapfumbamwe namakumi matanhatu namapfumbamwe, uye ipapo akafa.

²⁸Rameki akati ararama kwamakore zana namakumi masere namaviri, akabereka mwanakomana.

²⁹Akamutumidza zita rokuti Noa uye akati, “Achativaraidza pabasa uye napakurwadziwa kwokubata kwamaoko edu zvinobva pavhu rakatukwa naJehovha.”

³⁰Mushure mokuberekwa kwaNoa, Rameki akararama kwamakore mazana mashanu namakumi mapfumbamwe namashanu uye akavazve navamwe vanakomana navanasikana.

³¹Pamwe chete, Rameki akararama kwamakore mazana manomwe namakumi manomwe namanomwe, uye ipapo akafa.

³²Mushure mokunge Noa ava namakore okuberekwa mazana mashanu, akabereka Shemu, Hamu naJafeti.