Read Bhaibheri Dzvene MuChiShona Chanhasi 1 Makoronike 16 Bible Online

1 Makoronike 16 - Bhaibheri Dzvene MuChiShona Chanhasi bible

1 Makoronike 16

¹Vakauya neareka yaMwari vakaiisa mukati metende rayakanga yagadzirirwa naDhavhidhi, vakapa zvipiriso zvinopiswa nezvipiriso zvokuwadzana pamberi paMwari.

²Dhavhidhi akati apedza kubayira zvipiriso zvinopiswa, akaropafadza vanhu muzita raJehovha.

³Ipapo akapa mumwe nomumwe womudzimai nomurume wechiIsraeri rofu rechingwa, keke romuchero womuchindwe nekeke ramazambiringa akaoma.

⁴Akagadza vamwe vavaRevhi kuti vashumire pamberi peareka yaJehovha, vakumbirire, vavonge uye kuti varumbidze Jehovha, Mwari waIsraeri:

⁵Asafi ndiye aiva mukuru wavo, Zekaria wechipiri, kuchitevera Jeyeri Shemiramoti, Jehieri, Matitia, Eriabhi, Bhenaya, Obhedhi-Edhomu naJeyeri. Vaizoridza mitengeranwa nembira; Asafi aizoridza makandira

⁶uye Bhenaya naJahazieri vaprista vaizoridza hwamanda nguva dzose pamberi peareka yesungano yaMwari.

⁷Zuva iroro Dhavhidhi akapa kwokutanga Asafi navamwe vake pisarema iri rokuvonga Jehovha:

⁸Vongai Jehovha, danai kuzita rake; zivisai pakati pendudzi dzose zvaakaita.

⁹Muimbirei, muimbirei nziyo dzokurumbidza; taurai zvose zvamabasa ake anoshamisa.

¹⁰Zvirumbidzei muzita rake dzvene; mwoyo yaavo vanotsvaka Jehovha ngaifare.

¹¹Tarisai kuna Jehovha nokusimba rake; tsvakai chiso chake nguva dzose.

¹²Rangarirai zvishamiso zvaakaita, zviratidzo zvake uye nemitongo yaakareva.

¹³Haiwa, imi zvizvarwa zvaIsraeri muranda wake, haiwa imi vanakomana vaJakobho vasanangurwa vake.

¹⁴Ndiye Jehovha Mwari wedu; mitongo yake iri munyika yose.

¹⁵Anorangarira sungano yake nokusingaperi, shoko raakarayira, kwechiuru chezvizvarwa.

¹⁶Sungano yaakaita naAbhurahama, mhiko yaakapika kuna Isaka.

¹⁷Akasimbisa kuna Jakobho somutemo, kuna Israeri sesungano isingaperi, achiti:

¹⁸“Kwauri ndichapa nyika yeKenani, sechikamu chenhaka yako.”

¹⁹Pavakanga vari vashoma, vari vashoma kwazvo, vari vatorwa mairi,

²⁰vakadzungaira kubva kuno rumwe rudzi kusvika kuno rumwe, kubva kuno humwe umambo kusvika kuno humwe.

²¹Haana kutendera munhu kuti avadzvinyirire; nokuda kwavo akatuka madzimambo.

²²“Musabata vazodziwa vangu; musaitira vaprofita vangu zvakaipa.”

²³Imbirai Jehovha, pasi pose; paridzai ruponeso rwake zuva nezuva.

²⁴Zivisai kubwinya kwake pakati pendudzi, mabasa ake anoshamisa pakati pavanhu vose.

²⁵Nokuti Jehovha mukuru uye anofanira kwazvo kurumbidzwa; anofanira kutyiwa pamusoro pavamwari vose.

²⁶Nokuti vamwari vose vendudzi zvifananidzo, asi Jehovha akasika matenga.

²⁷Kubwinya nokukudzwa zviri pamberi pake; simba nomufaro zviri munzvimbo yougaro hwake.

²⁸Ipai kuna Jehovha, imi mhuri dzendudzi, ipai Jehovha kukudzwa nesimba,

²⁹ipai Jehovha kukudzwa kunofanira zita rake. Uyai nezvipiriso uye muuye pamberi pake; namatai Jehovha mukubwinya kwoutsvene hwake.

³⁰Dederai pamberi pake, imi nyika yose! Nyika yakasimbiswa kwazvo; haingazungunuswi.

³¹Matenga ngaafare, nyika ngaifare; ngavati pakati pendudzi, “Jehovha anotonga!”

³²Gungwa ngaritinhire nezvose zviri mariri; minda ngaifarisise nezvose zviri mairi.

³³Ipapo miti yesango ichaimba, ichaimba nomufaro pamberi paJehovha, nokuti anouya kuzotonga nyika.

³⁴Vongai Jehovha nokuti akanaka; rudo rwake runogara nokusingaperi.

³⁵Danidzirai muchiti, “Tiponesei, imi Mwari Muponesi wedu; tiunganidzei uye mutirwire pandudzi, kuti tigovonga zita renyu dzvene kuti tifarisise mukukurumbidzai.”

³⁶Rumbidzai Jehovha, Mwari waIsraeri, kubva pakusingaperi kusvikira pakusingaperi. Ipapo vanhu vose vakati, “Ameni” uye vakarumbidza Jehovha.

³⁷Dhavhidhi akasiya Asafi navamwe vake pamberi peareka yesungano yaJehovha kuti ashumirepo nguva dzose maererano nezvaidiwa zuva rimwe nerimwe.

³⁸Akasiya Obhedhi-Edhomu navamwe vake makumi matanhatu navasere kuti vashumire navo. Obhedhi-Edhomu mwanakomana waJedhutuni naHosa vaiva vatariri vamasuo.

³⁹Dhavhidhi akasiya Zadhoki muprista navamwe vaprista pamberi petabhenakeri yaJehovha panzvimbo yakakwirira muGibheoni

⁴⁰kuti vape zvipiriso zvinopiswa, kuna Jehovha paaritari yezvipiriso zvinopiswa, nguva dzose, mangwanani namanheru maererano nezvose zvakanga zvakanyorwa muMurayiro waJehovha waakanga apa Israeri.

⁴¹Pakati pavo paiva naHemani naJedhutuni navamwe vose vaiva vakasarudzwa namazita kuti vavonge Jehovha, “Nokuti rudo rwake runogara nokusingaperi.”

⁴²Hemani naJedhutuni vaiva nebasa rokuridza hwamanda namakandira uye nokuridza zvimwe zviridzwa parwiyo rutsvene. Vanakomana vaJedhutuni vakaitwa vatariri vamasuo.

⁴³Ipapo vanhu vose vakabvapo, mumwe nomumwe akaenda kumba kwake, uye Dhavhidhi akadzokera kumba kwake kundoropafadza mhuri yake.