Read Bhaibheri Dzvene MuChiShona Chanhasi Ekisodho 25 Bible Online

Ekisodho 25 - Bhaibheri Dzvene MuChiShona Chanhasi bible

Ekisodho 25

¹Jehovha akati kuna Mozisi,

²“Taurira vaIsraeri kuti vandivigire chipiriso. Unofanira kugamuchira chipiriso changu kubva kumunhu upi noupi anosundwa nomwoyo wake kuti ape.

³“Izvi ndizvo zvipiriso zvaunofanira kugamuchira kubva kwavari: “goridhe, sirivha, ndarira;

⁴wuru yebhuruu, pepuru netsvuku uye nemicheka yakaisvonaka; makushe embudzi;

⁵matehwe amakondobwe akapendwa zvitsvuku namatehwe emombe dzomugungwa; matanda omuunga;

⁶mafuta omuorivhi emwenje; zvinonhuhwira zvemafuta okuzodza anonhuhwira uye nezvimwe zvinonhuhwira;

⁷mabwe eonikisi nezvimwe zvinokosha zvinofanira kuiswa paefodhi napachidzitiro chechipfuva.

⁸“Ipapo uite kuti vaite nzvimbo yangu tsvene, uye ini ndichagara pakati pavo.

⁹Muite tabhenakeri iyi nemidziyo yayo yose nomufananidzo wandichakuratidza.

¹⁰“Uite kuti vaite bhokisi ramatanda omuunga, rakareba makubhiti maviri nehafu[4], upamhi kubhiti nehafu[5], uye kubhiti nehafu pakukwira.

¹¹Murifukidze negoridhe rakaisvonaka, mukati nokunze, uye muite hata yegoridhe yakaripoteredza.

¹²Muiumbire mhete ina dzegoridhe mugodzisungira pamakumbo aro mana, nemhete mbiri pano rumwe rutivi uye mhete mbiri kuno rumwe rutivi.

¹³Ipapo mugoita matanda omuunga uye negoridhe.

¹⁴Muise matanda aya mukati memhete dziri parutivi rwebhokisi kuti mutakure bhokisi nawo.

¹⁵Matanda anofanira kugara ari mumhete dzebhokisi iri; haafaniri kubviswa.

¹⁶Ipapo mugoisa muareka chipupuriro, chandichakupai.

¹⁷“Muite chifunhiro chokuyananisa chegoridhe rakaisvonaka, makubhiti maviri nehafu[6] pakureba uye kubhiti nehafu[7] paupamhi.

¹⁸Uye muite makerubhi maviri egoridhe rakapambadzirwa kumacheto echifunhiro.

¹⁹Muite kerubhi rimwe chete kuno rumwe rutivi uye kerubhi rechipiri kuno rumwe rutivi; muite bandi rimwe chete rekerubhi nechifukidzo, pamativi maviri.

²⁰Mapapiro amakerubhi anofanira kutambanudzirwa kumusoro, akafukidzira chifunhiro. Makerubhi anofanira kutarisana, akatarira kuchifunhiro.

²¹Muise chifunhiro pamusoro peareka uye mugoisa muareka, Chipupuriro chandichakupai.

²²Ipapo, pamusoro pechifunhiro chiri pakati pamakerubhi maviri ari pamusoro peareka yeChipupuriro, ndichasangana newe ndigokupa mirayiro yangu yose yavaIsraeri.

²³“Uite tafura namatanda omuunga yakareba makubhiti maviri[8], kubhiti rimwe chete[9] paupamhi uye kubhiti nehafu[10] pakukwirira.

²⁴Muifukidzire negoridhe rakaisvonaka uye mugoipoteredza nezvakaumbwa zvegoridhe.

²⁵Uyewo uite vhiri rinoipoteredza rino upamhi hwakaita sechanza choruoko[11] ugoisa goridhe rakaumbwa pamusoro pevhiri.

²⁶Uite mhete ina dzegoridhe dzetafura ugodzisungira kumakona mana, pane makumbo ayo.

²⁷Mhete idzi dzinofanira kuva pedyo nevhiri kuti dzibate matanda anoshandiswa kutakura tafura.

²⁸Uite matanda omuunga, uafukidze negoridhe uye mugotakura tafura nawo.

²⁹Uye uite ndiro dzayo namadhishi negoridhe rakaisvonaka, uyewo namatende ayo nembiya dzokudirisa zvipiriso.

³⁰Uise chingwa choKuratidza patafura iyi kuti chive pamberi pangu nguva dzose.

³¹“Uite chigadziko chomwenje chegoridhe rakaisvonaka uye ugoipambadzira pasi payo pamwe chete nerwiriko rwayo; mbiya dzayo, mabukira namaruva acho zvichava chinhu chimwe chete nacho.

³²Matavi matanhatu anofanira kutambarara achibva mumativi echigadziko chomwenje, matatu kuno rumwe rutivi uye matatu kuno rumwezve.

³³Mikombe mitatu yakaumbwa samaruva omuarimondi namabukira uye namaruva zvinofanira kuva padavi rimwe chete, matatu kune rimwe davi, uye zvimwe chetezvo kumativi matanhatu ose anotambarara kubva pachigadziko chomwenje.

³⁴Uye pachigadziko chomwenje panofanira kuva nemikombe mina yakaumbwa samaruva omuarimondi ane mabukira namaruva.

³⁵Bukira rimwe chete richava pasi pamatavi maviri okutanga anotambarara kubva pachigadziko chomwenje, bukira rechipiri riri pasi pamamwe matavi maviri, uye bukira rechitatu riri pasi pamamwezve pamatavi maviri, mativi ose ari matanhatu.

³⁶Mabukira namatavi achava ebandi rimwe chete nechigadziko chomwenje, negoridhe rakaisvonaka rakapambadzirwa.

³⁷“Ipapo ugoita mwenje yacho minomwe uye ugoigadzika pamusoro pacho kuitira kuti zvigovhenekera nzvimbo iri mberi kwacho.

³⁸Mbato dzacho nendiro dzacho zvinofanira kuva zvegoridhe rakaisvonaka.

³⁹Tarenda[12] regoridhe rakaisvonaka rinofanira kushandiswa pachigadziko chomwenje nemimwe midziyo yose iyi.

⁴⁰Uone kuti wazviita zvichienderana nomufananidzo wawakaratidzwa pagomo.