Read Bhaibheri Dzvene MuChiShona Chanhasi Ekisodho 37 Bible Online

Ekisodho 37 - Bhaibheri Dzvene MuChiShona Chanhasi bible

Ekisodho 37

¹Bhezareri akaita areka yamatanda omuunga, yakareba makubhiti maviri nehafu[43], kubhiti rimwe nehafu[44] paupamhi, uye kubhiti rimwe chete nehafu pakukwirira.

²Akaifukidza negoridhe rakaisvonaka, zvose mukati nokunze, uye akaita hata yegoridhe yakaipoteredza.

³Akaiumbira mhete dzegoridhe ina akadziisa pamakumbo ayo mana, nemhete mbiri pano rumwe rutivi uye dzimwe mbiri kuno rumwezve rutivi.

⁴Ipapo akaita mapango omuti womuunga uye akaafukidza negoridhe.

⁵Uye akapinza mapango mukati memhete parutivi rweareka okuitakura nawo.

⁶Akagadzira chifunhiro chokuyananisa chegoridhe rakaisvonaka, makubhiti maviri nehafu[45] pakureba uye kubhiti rimwe chete nehafu[46] paupamhi.

⁷Ipapo akaita makerubhi maviri negoridhe rakapambadzirwa kumacheto echifunhiro.

⁸Akaita kerubhi rimwe chete kurutivi rumwe chete rwokumucheto uye kerubhi rechipiri kuno rumwezve rutivi, mativi okumucheto ari maviri akaaita chinhu chimwe chete nechifunhiro.

⁹Mapapiro amakerubhi akanga akatambanudzirwa kumusoro, achifukidza chifunhiro nomumvuri wawo. Makerubhi akanga akatarisana, akatarisa kuchifunhiro.

¹⁰Vakagadzira tafura namatanda omuunga, yakareba makubhiti maviri[47], uye kubhiti rimwe chete[48] paupamhi, uye kubhiti rimwe chete nehafu[49] pakukwirira.

¹¹Ipapo vakaifukidza negoridhe rakaisvonaka uye vakagadzira hata yegoridhe yakaipoteredza.

¹²Vakaiitirawo mukombero wakaipoteredza une upamhi hwakaita sechanza choruoko[50] ndokuisa hata yegoridhe pamukombero.

¹³Vakaumba mhete ina dzegoridhe dzetafura uye vakadzisungirira pamakona mana, paya pakanga pana makumbo.

¹⁴Mhete dzakaiswa pedyo nomukombero kuti dzibate mapango aishandiswa pakutakura tafura.

¹⁵Mapango okutakura tafura akagadzirwa namatanda omuunga uye akanga akafukidzwa negoridhe.

¹⁶Uye vakaita nhumbi dzetafura negoridhe rakaisvonaka, ndiro dzayo, madhishi nemikombe uye nezvirongo zvayo zvokudururira zvipiriso zvinonwiwa.

¹⁷Vakagadzira chigadziko chomwenje chegoridhe rakaisvonaka uye vakaripambadzira, chigadziko nerwiriko; mikombe inenge maruva, mabukira namaruva zvaiva chinhu chimwe chete nacho.

¹⁸Mapazi matanhatu akaiswa kubva kumativi echigadziko chomwenje, matatu kurutivi rumwe chete uye mamwe matatu kuno rumwe rutivi.

¹⁹Mikombe mitatu yakanga yakaumbwa seruva remuarimondi namabukira namaruva makuru zvakanga zviri pane rimwe davi, matatu padavi raitevera uye zvakanga zvakaita saizvozvo pamatavi ose ari matanhatu aibva pachigadziko chomwenje.

²⁰Uye pamusoro pechigadziko chomwenje paiva nemikombe mina yakanga yakaumbwa seruva romuarimondi namabukira uye namaruva makuru.

²¹Bukira rimwe chete rakanga riri pasi pamatavi maviri okutanga aibva pachigadziko chomwenje, bukira rechipiri rakanga riri pasi pamatavi maviri aitevera, uye bukira rechitatu rakanga riri pasi pamatavi mamwezve maviri, ose ari matanhatu pamwe chete.

²²Mabukira namatavi zvaiva chinhu chimwe chete nechigadziko chomwenje, chegoridhe rakaisvonaka rakapambadzirwa.

²³Vakaita mwenje yacho minomwe, pamwe chete nembato dzacho uye nendiro dzacho, dzegoridhe rakaisvonaka.

²⁴Vakaita chigadziko chomwenje nenhumbi dzacho dzose kubva patarenda rimwe chete[51] regoridhe rakaisvonaka.

²⁵Vakaita aritari yezvinonhuhwira namatanda omuunga. Yakanga yakaenzana mativi ose ari mana, yakareba kubhiti rimwe chete[52] uye kubhiti rimwe chete paupamhi, uye makubhiti maviri[53] pakukwirira kwayo, nyanga dzayo dziri chinhu chimwe chete nayo.

²⁶Vakafukidza pamusoro payo nokumativi ose uye nenyanga, negoridhe rakaisvonaka, uye vakagadzira hata yakaipoteredza.

²⁷Vakaita mhete dzegoridhe mbiri pasi pehata, mbiri kuno rumwe rutivi, kuti dzibate mapango aishandiswa pakuitakura.

²⁸Vakagadzira mapango omuti womuunga uye vakaafukidza negoridhe.

²⁹Vakagadzirawo mafuta matsvene okuzodza uye nezvinonhuhwira kwazvo zvakaisvonaka, basa romuvhenganisi wezvinonhuhwira.