Read Bhaibheri Dzvene MuChiShona Chanhasi Ekisodho 40 Bible Online

Ekisodho 40 - Bhaibheri Dzvene MuChiShona Chanhasi bible

Ekisodho 40

¹Ipapo Jehovha akati kuna Mozisi,

²“Dzika tabhenakeri, Tende Rokusangana, pazuva rokutanga romwedzi wokutanga.

³Uise areka yeChipupuriro mairi uye ugofukidza areka nechidzitiro.

⁴Upinze tafura ugoisa zvinhu zvayo pairi. Ipapo ugopinza chigadziko chomwenje ugomisa mwenje yacho.

⁵Uise aritari yezvinonhuhwira yegoridhe pamberi peareka yechipupuriro uye ugoisa chidzitiro pamukova wokupinda mutabhenakeri.

⁶“Uise aritari yezvipiriso zvinopiswa pamberi pomukova wokupinda kutabhenakeri, Tende Rokusangana;

⁷uise dhishi pakati peTende Rokusangana nearitari ugoisa mvura mariri.

⁸Ugadzire ruvazhe rwakaipoteredza uye ugoisa chidzitiro pamukova woruvazhe.

⁹“Utore mafuta okuzodza ugozodza tabhenakeri nezvinhu zvose zvirimo; uinatse nemidziyo yayo yose, uye ichava tsvene.

¹⁰Ipapo ugozodza aritari yezvipiriso zvinopiswa nemidziyo yayo yose; unatse aritari, uye ichava tsvene-tsvene.

¹¹Uzodze dhishi nechigadziko charo ugozvinatsa.

¹²“Uuye naAroni navanakomana vake kumukova weTende Rokusangana ugovashambidza nemvura.

¹³Ipapo ugopfekedza Aroni nguo tsvene, umuzodze uye ugomunatsa kuti agondishumira somuprista.

¹⁴Uuyise vanakomana vake ugovapfekedza majasi.

¹⁵Uvazodze sokuzodza kwawaita baba vavo, kuti vagondishumira savaprista. Kuzodzwa kwavo kuchava kwouprista hucharamba huripo kuzvizvarwa zvinotevera.”

¹⁶Mozisi akaita zvose sezvaakarayirwa naJehovha.

¹⁷Saka tabhenakeri yakamiswa pazuva rokutanga romwedzi wokutanga mugore rechipiri.

¹⁸Mozisi akati amisa tabhenakeri, akaisa zvigadziko panzvimbo yazvo, akadzika mapuranga, akapinza mbariro uye akamisa matanda.

¹⁹Ipapo akatambanudza tende akariisa pamusoro petabhenakeri ndokuisa chifukidzo pamusoro petende, sokurayirwa kwaakaitwa naJehovha.

²⁰Akatora Chipupuriro akachiisa muareka, akabatanidza mapango paareka uye akaisa chifunhiro chokuyananisa pamusoro payo.

²¹Ipapo akauyisa areka mutabhenakeri ndokuturika chidzitiro chokufukidzira akafukidza areka yeChipupuriro, sokurayira kwakaita Jehovha.

²²Mozisi akaisa tafura muTende Rokusangana nechokurutivi rwokumusoro kwetabhenakeri kunze kwechidzitiro

²³uye akaisa chingwa pamusoro payo pamberi paJehovha, sokurayirwa kwaakaitwa naJehovha.

²⁴Akaisa chigadziko chomwenje muTende Rokusangana chakatarisana netafura nechokurutivi rwezasi rwetabhenakeri

²⁵uye akamisa mwenje pamberi paJehovha, sokurayirwa kwaakaitwa naJehovha.

²⁶Mozisi akaisa aritari yegoridhe muTende Rokusangana pamberi pechidzitiro,

²⁷uye akapisa zvinonhuhwira pairi, sokurayirwa kwaakaitwa naJehovha.

²⁸Ipapo akaisa chidzitiro pamukova wetabhenakeri.

²⁹Akamisa aritari yezvipiriso zvinopiswa pedyo nomukova wetabhenakeri, Tende Rokusangana, akapa pairi zvipiriso zvinopiswa nezvipiriso zvezviyo, sokurayirwa kwaakaitwa naJehovha.

³⁰Akaisa dhishi pakati peTende Rokusangana nearitari uye akaisa mvura yokushamba mariri,

³¹uye Mozisi naAroni navanakomana vake vakaishandisa kushamba maoko avo netsoka dzavo.

³²Vaishamba pose pavaipinda muTende Rokusangana kana kuswedera paaritari, sokurayirwa kwakaitwa Mozisi naJehovha.

³³Ipapo Mozisi akaita ruvazhe rwakapoteredza tabhenakeri nearitari uye akaturika chidzitiro pamukova wokupinda muruvazhe. Nokudaro Mozisi akapedza basa.

³⁴Ipapo gore rakafukidza Tende Rokusangana, uye kubwinya kwaJehovha kwakazadza tabhenakeri.

³⁵Mozisi haana kugona kupinda muTende Rokusangana nokuti gore rakanga ragara pariri, uye kubwinya kwaJehovha kwakazadza tabhenakeri.

³⁶Mukufamba kwose kwavaIsraeri, pose paisimuka gore kubva pamusoro petabhenakeri, ivo vaisimuka vachienda;

³⁷asi kana gore risina kubva, vakanga vasingafambi, kusvikira pazuva rarinosimuka.

³⁸Saka gore raJehovha raiva pamusoro petabhenakeri masikati; uye moto wakanga uri mugore usiku, pamberi peimba yose yaIsraeri panguva yokufamba kwavo kwose.