Read Bhaibheri Dzvene MuChiShona Chanhasi Jobho 10 Bible Online

Jobho 10 - Bhaibheri Dzvene MuChiShona Chanhasi bible

Jobho 10

¹“Ndinosema upenyu hwangu chaihwo, naizvozvo ndicharega kunyarara pakunyunyuta kwangu ndigotaura mukushungurudzika kwemwoyo wangu.

²Ndichati kuna Mwari: Musandiwanira mhosva asi mundiudze mhaka yangu nemi.

³Ko, kundimanikidza kunokufadzai, kuti muzvidze basa ramaoko enyu, muchinyemwerera kurangano dzavakaipa here?

⁴Ko, imi muna meso enyama here? Munoona sokuona kunoita munhu anofa here?

⁵Ko, mazuva enyu akaita seavaya vanofa, kana makore enyu samakore omunhu,

⁶kuti muongorore mhosva yangu uye mutsvage chivi changu,

⁷kunyange muchiziva kuti handina mhosva, uye kuti hakuna anogona kundinunura paruoko rwenyu here?

⁸“Maoko enyu akandiumba uye akandigadzira. Zvino modzoka kuzondiparadza here?

⁹Rangarirai kuti makandiumba sevhu. Zvino mondidzoserazve kuvhu here?

¹⁰Hamuna kundidurura somukaka here uye mukandigwambisa sechizi,

¹¹mukandifukidza neganda nenyama mukandisonanidza pamwe chete namapfupa namarunda here?

¹²Makandipa upenyu mukandinzwira ngoni, uye nehanya yenyu mukachengeta mweya wangu.

¹³“Asi izvi ndizvo zvamakaviga mumwoyo menyu, uye ndinoziva kuti izvi zvaiva mupfungwa dzenyu.

¹⁴Kana ndakatadza, imi maizenge makanditarisa, uye hamaizotendera kudarika kwangu kuti kurege kurangwa.

¹⁵Kana ndine mhosva, ndine nhamo! Kunyange dai ndisina mhosva, handingasimudzi musoro wangu, nokuti ndizere nenyadzi uye ndakanyura mukutambudzika kwangu.

¹⁶Kana ndikasimudza musoro wangu, imi munondironda sezvinoita shumba, uyezve munoratidza simba renyu rinotyisa pamusoro pangu.

¹⁷Munouya nezvapupu zvenyu zvitsva kuzondipomera mhosva uye munowedzera hasha dzenyu pamusoro pangu, hondo dzenyu dzinondirwisa, mapoka namapoka.

¹⁸“Ko, zvino makandibudisirei mudumbu? Ndinoshuva kuti dai ndakafa hangu pasati pava neziso randiona.

¹⁹Dai chete ndakanga ndisina kumbovapo hangu, kana kuti ndakatakurwa ndichiendeswa kubwiro ndichangobva mudumbu ramai vangu!

²⁰Ko, mazuva angu haasi mashoma ava kutopera here? Ibvai kwandiri kuti ndimbofara hangu kwakanguva,

²¹ndisati ndaenda kusingadzokwi, kunyika yerima nomumvuri wakadzama,

²²kunyika yerima guru, yomumvuri wakadzama nenyonganyonga, iko kunoti kunyange chiedza chakangofanana nerima.”