Read Bhaibheri Dzvene MuChiShona Chanhasi Jobho 11 Bible Online

Jobho 11 - Bhaibheri Dzvene MuChiShona Chanhasi bible

Jobho 11

¹Ipapo Zofari muNaamati akapindura akati:

²“Mashoko aya ose haangapindurwi here? Ko, mutauri uyu anofanira kushayirwa mhosva here?

³Ko, kubvotomoka kwako kunganyaradza vanhu here? Ko, pangashaya anokutsiura paunenge uchituka here?

⁴Iwe unoti kuna Mwari, ‘Zvandinotenda zvakarurama uye ndakachena pamberi penyu.’

⁵Haiwa, ndinoda sei kuti dai Mwari ataura, kuti dai ashamisa hake muromo wake pamusoro pako,

⁶uye akuzarurire zvakavanzika zvouchenjeri, nokuti uchenjeri hwechokwadi huri paviri. Uzive izvi: Mwari akatokanganwa kare zvimwe zvivi zvako.

⁷“Ko, unganzwisisa zvakavanzika zvaMwari here? Unganzwisisa panogumira Wamasimba Ose here?

⁸Zvakakwirira kupfuura matenga, iwe ungaiteiko? Zvakadzika kupfuura kudzika kwebwiro, iwe ungaziveiko?

⁹Chiero chazvo chakareba kupfuura nyika uye zvakapamhama kupfuura gungwa.

¹⁰“Kana iye akasvika akakupfigira mujeri uye akakoka dare remhosva, ndianiko angapikisana naye?

¹¹Zvirokwazvo anoziva vanhu vanonyengera; uye paanoona chakaipa, anoshaya hanya here?

¹²Asi munhu asina kuchenjera haangagoni kuva akangwara sezvo zvisingagoneki kuti mwana wembizi angaberekwa nomunhu.

¹³“Asi kana mwoyo wako ukazvipira kwaari, uye ukatambanudzira maoko ako kwaari,

¹⁴kana ukaisa kure chivi chiri muruoko rwako, uye ukasatendera chakaipa kugara mutende rako,

¹⁵ipapo uchasimudza chiso chako usina nyadzi, uchamira wakasimba uye usingatyi.

¹⁶Zvirokwazvo uchakanganwa nhamo yako, uchangoirangarira semvura yakaerera.

¹⁷Upenyu huchajeka kupfuura masikati makuru, uye rima richaita samangwanani.

¹⁸Iwe uchagara zvakanaka, nokuti tariro iriko; ucharinga-ringa ugozorora murugare.

¹⁹Uchavata hako pasi, pasina munhu anokuvhundutsa, uye vazhinji vachakumbira nyasha dzako.

²⁰Asi meso avakaipa achaneta, uye vachashayiwa kwokutizira; tariro yavo ichava yokufa.”