Read Bhaibheri Dzvene MuChiShona Chanhasi Jobho 12 Bible Online

Jobho 12 - Bhaibheri Dzvene MuChiShona Chanhasi bible

Jobho 12

¹Ipapo Jobho akapindura akati:

²“Zvirokwazvo imi muri vanhu, uye uchenjeri huchafa nemi!

³Asi neniwo ndinonzwisisa semi; handisi muduku kwamuri. Ndianiko asingazivi zvinhu zvose izvi?

⁴“Ndava chiseko kushamwari dzangu, kunyange ndakadana kuna Mwari akapindura, ndava chiseko zvacho, kunyange ndakarurama uye ndisina chandingapomerwa!

⁵Varume vagere zvakanaka vanoshora nhamo, vachiti ndiwo magumo avaya vane tsoka dzinotedzemuka.

⁶Matende amakororo haakanganiswe, uye vaya vanotsamwisa Mwari vagere zvakanaka, ivo vanotakura mwari wavo mumaoko avo.

⁷“Asi bvunza mhuka, uye dzichakudzidzisa, kana shiri dzedenga, idzo dzichakuudza;

⁸kana taura kunyika, ichakudzidzisa, kana hove dzegungwa ngadzikuzivise.

⁹Ndechipiko pane zvose izvi chisingazivi kuti ruoko rwaJehovha rwakaita izvi?

¹⁰Upenyu hwezvisikwa zvose huri muruoko rwake, nokufema kwavanhu vamarudzi ose.

¹¹Ko, nzeve haiedzi mashoko sorurimi runoravira chokudya here?

¹²Ko, uchenjeri hahuwanikwi pakati pavatana here? Ko, kuwanda kwoupenyu hakuuyisi kunzwisisa here?

¹³“Uchenjeri nesimba ndezvaMwari; kudzidzisa nokunzwisisa ndezvake.

¹⁴Zvaanenge akoromora hakuna anozvivakazve; murume waanenge apfigira mujeri haangasunungurwi.

¹⁵Kana akadzivisa kunaya kwemvura, kuoma kunovapo; kana akairegedzera, nyika inoparadzwa.

¹⁶Simba nokukunda ndezvake; anonyengerwa nomunyengeri vose ndevake.

¹⁷Anodzinga makurukota asina nguo uye anoita kuti vatongi vave mapenzi.

¹⁸Anobvisa zvisungo zvakaiswa namadzimambo agosunga zviuno zvavo nomucheka.

¹⁹Anodzinga vaprista vasina nguo uye anobvisa pachigaro vanhu vakanguri vadzika midzi.

²⁰Anofumbira miromo yavapi vamazano vavanovimba navo, uye anobvisa kunzwisisa kwavakuru.

²¹Anodurura kushorwa pamakurukota uye anokutunura zvombo zvavane simba.

²²Anobudisa pachena zvinhu zvakadzama zverima, uye anouyisa mimvuri mikuru kuchiedza.

²³Anoita kuti ndudzi dzive huru, uye anodziparadza; anowanza ndudzi, uye anodziparadzira.

²⁴Anotorera vatungamiri venyika kunzwisisa kwavo; anovaendesa vachingodzungaira pasina nzira.

²⁵Vanotsvanzvadzira murima vasina chiedza; anoita kuti vadzedzereke sezvidhakwa.