Read Bhaibheri Dzvene MuChiShona Chanhasi Jobho 13 Bible Online

Jobho 13 - Bhaibheri Dzvene MuChiShona Chanhasi bible

Jobho 13

¹“Meso angu akaona izvi zvose, nzeve dzangu dzakanzwa dzikazvinzwisisa.

²Zvamunoziva imi, neniwo ndinozviziva; handisi muduku kwamuri.

³Asi ndinoshuva kutaura naWamasimba Ose uye ndigozvidavirira nyaya yangu kuna Mwari.

⁴Kunyange zvakadaro, imi munondizora nhema; muri varapi vasina maturo, imi mose!

⁵Haiwa, dai bedzi mainyarara henyu! Nokuti hungava uchenjeri kwamuri.

⁶Chinzwai zvino kuzvidavirira kwangu; teererai munzwe kudemba kwemiromo yangu.

⁷Ko, mungataura zvakaipa muchimiririra Mwari here? Ko, mungataura zvinonyengera muchiti matumwa naye here?

⁸Mungamuitira rusaruro here? Mungamiririra Mwari here?

⁹Ko, zvingabuda zvakanaka here kana akakuedzai? Ko, mungamunyengera sokunyengera kwamunoita vanhu here?

¹⁰Zvirokwazvo iye angakutsiurai kana mukaratidza rusaruro muchivande.

¹¹Ko, kubwinya kwake hakungakutyisei here? Ko, kutyisa kwake hakungawiri pamusoro penyu here?

¹²Mashoko enyu anotendwa itsumo dzamadota; nhare dzenyu inhare dzevhu.

¹³“Nyararai uye regai nditaure; ipapo chinouya kwandiri ngachiuye hacho.

¹⁴Ko, ndinozviisirei munjodzi ndichibatira upenyu hwangu mumaoko angu?

¹⁵Kunyange akandiuraya hake, asi ini ndichavimba naye; zvirokwazvo ndichadzivirira nzira dzangu pamberi pake.

¹⁶Zvirokwazvo, uku ndiko kuchava kuponeswa kwangu, nokuti hakuna munhu asina umwari achasvika pamberi pake!

¹⁷Teereresai kumashoko angu, nzeve dzenyu ngadzigamuchire zvandinoreva.

¹⁸Zvino ndagadzirisa nyaya yangu, ndinoziva kuti ndichashayirwa mhosva.

¹⁹Pane angagona kundipa mhaka here? Kana aripo, ndichanyarara ndigofa hangu.

²⁰“Haiwa Mwari, nditsidzirei hangu zvinhu zviviri izvi. Uye ipapo handingavandi pamberi penyu.

²¹Bvisai ruoko rwenyu rwuve kure neni, uye murege kundivhundutsa nokutyisa kwenyu.

²²Ipapo mukandidana ndichadavira. Kana kuti murege nditaure, imi mugopindura.

²³Zvivi zvandakaita nezvikanganiso zvangu zvinganiko? Ndiratidzei kudarika kwangu nechivi changu.

²⁴Munovanzireiko chiso chenyu muchindiona somuvengi wenyu?

²⁵Ko, muchatambudza shizha rinopeperetswa nemhepo here? Ko, muchadzingana nehundi yakaoma here?

²⁶Nokuti munonyora zvinhu zvinovava pamusoro pangu, uye munondigarisa nhaka yezvivi zvoujaya hwangu.

²⁷Munosunga tsoka dzangu nezvisungo; munocherechedza nzira dzangu dzose nokuisa mutaro panotsika tsoka dzangu.

²⁸“Saizvozvo munhu anopera kufanana nechinhu chakaora, senguo yakadyiwa nezvipfukuto.