Read Bhaibheri Dzvene MuChiShona Chanhasi Jobho 14 Bible Online

Jobho 14 - Bhaibheri Dzvene MuChiShona Chanhasi bible

Jobho 14

¹“Munhu akazvarwa nomukadzi ane mazuva mashoma azere nokutambudzika.

²Anobuda seruva agosvava; anotiza somumvuri, haagari.

³Ko, munotarisisa munhu akadai here? Ko, muchamuuyisa kuzotongwa pamberi penyu here?

⁴Ndianiko angabudisa chinhu chakachena kubva pane chine tsvina? Hakuna!

⁵Mazuva omunhu akatarwa; makatema kuwanda kwemwedzi yake, mukamutarira miganhu yaasingagoni kudarika.

⁶Naizvozvo regai kumutarisa uye mumusiye ari oga, kusvikira apedza nguva yake somunhu anoshanda.

⁷“Asi kumuti kune tariro: Kana ukatemwa, unobukirazve, uye mabukira awo matsva haasvavi.

⁸Midzi yawo ingava yakwegura hayo muvhu uye hunde yawo ichifa muvhu,

⁹asi uchabukira pakunhuhwira kwemvura ugomera somuti uchangotanga kumera.

¹⁰Asi munhu anofa agoradzikwa pasi; anofema kokupedzisira uye haazovapozve.

¹¹Sokupera kunoita mvura mugungwa, kana kupwa nokuoma kworwizi,

¹²saizvozvo munhu anovata pasi asingazomuki; kusvikira matenga asisiko, vanhu havazomukizve kana kumutswa pakuvata kwavo.

¹³“Haiwa, dai mandiviga henyu muguva chete, uye mandiviga kusvikira kutsamwa kwenyu kwapfuura! Dai chete manditarira nguva, uye ipapo mugondirangarira!

¹⁴Kana munhu akafa, angazoraramazve here? Mazuva ose okushanda kwangu kwakaoma, ndicharindira kusvikira kuvandudzwa kwangu kwasvika.

¹⁵Muchadana uye ini ndichakupindurai; muchashuva chisikwa chamakaita namaoko enyu.

¹⁶Zvirokwazvo muchaverenga nhambwe dzangu ipapo, asi musingarondi chivi changu.

¹⁷Kudarika kwangu kuchasungirwa musaga; muchafukidzira chivi changu.

¹⁸“Asi sokupfupfunyuka kunoita gomo rigoondomoka, uye sokubviswa kwedombo panzvimbo yaro,

¹⁹semvura inochera mabwe, uye sokuyerera kwemvura zhinji inokukura ivhu, saizvozvo munoparadza tariro yomunhu.

²⁰Munomukunda kamwe chete zvachose, uye akasazovapo; munoshandura chiso chake mobva mamudzinga.

²¹Kana vanakomana vake vachikudzwa, iye haazvizivi; kana vakadzikisirwa pasi, iye haazvioni.

²²Anongonzwa kurwadza kwomuviri wake chete, agozvichema iye pachake bedzi.”