Read Bhaibheri Dzvene MuChiShona Chanhasi Jobho 15 Bible Online

Jobho 15 - Bhaibheri Dzvene MuChiShona Chanhasi bible

Jobho 15

¹Ipapo Erifazi muTemani akapindura akati:

²“Ko, munhu akachenjera angapindura zvisina njere here, kana kuzadza dumbu rake nemhepo inopisa yokumabvazuva?

³Ko, angakakavara namashoko asina maturo, kana namashoko asina basa here?

⁴Asi unotorwisa umwari uye unodzivisa kunamata Mwari.

⁵Chivi chako chinorunzira muromo wako; uye unotevera rurimi rwavanyengeri.

⁶Muromo wako pachako ndiwo unokupa mhosva, kwete wangu, miromo yako pachako inokupupurira zvakaipa.

⁷“Ko, ndiwe munhu wakatanga kuzvarwa here? Ko, iwe wakazvarwa makomo asati avapo here?

⁸Unoteererawo here panokurukurwa mazano aMwari? Unoti uchenjeri ndohwako woga kanhi?

⁹Chiiko chaunoziva chatisingazivi isu? Kunzwisisa kwaunako ndokweiko kwatisinawo isu?

¹⁰Vane bvudzi rakachena navatana vakwegura vari kudivi redu, varume vatochembera kupinda baba vako.

¹¹Ko, kunyaradza kwaMwari hakuna kukukwanira here, iro shoko rakataurwa kwauri zvine unyoro?

¹²Ko, mwoyo wako wakurasireiko, uye meso ako anobwairireiko,

¹³zvokuti unoitira Mwari hasha ugobudisa mashoko akadai kubva mumuromo mako?

¹⁴“Munhu chiiko, zvokuti angava akanaka, kana munhu akazvarwa nomukadzi, kuti angava akarurama?

¹⁵Kana Mwari akasavimba navatsvene vake, kunyange dai matenga akasava akachena pamberi pake,

¹⁶ko, kuzoti munhu, ane uori uye akaora, anonwa zvakaipa semvura!

¹⁷“Nditeerere ndigokutsanangurira; rega ndikuudze zvandakaona,

¹⁸zvakataurwa navanhu vakachenjera, vasingavanzi chinhu chavakagamuchira kubva kumadzibaba avo,

¹⁹ivo voga vakapiwa nyika pasina mutorwa akapfuura napakati pavo:

²⁰Murume akaipa anotambudzika nokurwadziwa pamazuva ake ose, makore ose outsinye akachengeterwa iye.

²¹Maungira anotyisa anozadza nzeve dzake; pazvinenge zvaita sezvakanaka, vapambi vanomurwisa.

²²Anorasikirwa netariro yokupunyuka parima; munondo ndiwo waakatarirwa.

²³Anofamba-famba achiita sechokudya zvamagora; anoziva kuti zuva rerima raswedera.

²⁴Kutambudzika nokurwadziwa zvinomuzadza nokutya; zvinomukunda, samambo agadzirira kurwisa,

²⁵nokuti anokungira Mwari chibhakera chake uye anozvikudza pamusoro paWamasimba Ose,

²⁶achimhanyira kwaari asingatyi ane nhoo hobvu, yakasimba.

²⁷“Kunyange chiso chake chakafukidzwa namafuta uye chiuno chake chakafuta nenyama,

²⁸iye achagara mumaguta akaparadzwa nomudzimba dzisingagarwi nomunhu, dzimba dzokoromoka kuva marara.

²⁹Haachazovazve mupfumi uye pfuma yake haingagari, kana nepfuma yake haingazadzi nyika.

³⁰Haangapunyuki rima; murazvo uchasvavisa mabukira ake, uye kufema kwomuromo waMwari kuchamurasira kure.

³¹Ngaarege kuzvinyengera nokuvimba nezvisina maturo, nokuti haana chaachawana pazviri.

³²Acharipirwa zvakazara nguva yake isati yasvika, uye matavi ake haangawandi.

³³Achafanana nomuzambiringa wabvisirwa mazambiringa asati aibva, kufanana nomuti womuorivhi wodonhedza maruva awo.

³⁴Nokuti ungano yavasingadi Mwari ichashaya zvibereko, uye moto uchaparadza matende avaya vanofarira fufuro.

³⁵Vanobata mimba yokutambudzika vagozvara zvakaipa; dumbu ravo rinogadzira kunyengera.”