Read Bhaibheri Dzvene MuChiShona Chanhasi Jobho 17 Bible Online

Jobho 17 - Bhaibheri Dzvene MuChiShona Chanhasi bible

Jobho 17

¹Mweya wangu waputsika, mazuva angu aitwa mashoma, guva rakandimirira.

²Zvirokwazvo vaseki vakandipoteredza; meso angu anofanira kuramba akatarisa ruvengo rwavo.

³“Ndipei, imi Mwari, chitsidzo chamunoda. Ndianiko achandiisira rubatso?

⁴Makapofumadza ndangariro dzavo pakunzwisisa; naizvozvo hamungavatenderi kukunda.

⁵Kana munhu akaramba shamwari dzake nokuda kwomubayiro, meso avana vake achapofumara.

⁶“Mwari akandiita shumo kuvanhu vose, munhu anopfirwa mate kumeso kwake navanhu.

⁷Meso angu aneta nokuchema; muviri wangu wose wangova mumvuri zvawo.

⁸Vanhu vakarurama vanokatyamadzwa nazvo; vasina mhaka vachamukira vasingadi Mwari.

⁹Kunyange zvakadaro, vakarurama vachabatirira panzira dzavo, uye vana maoko akachena vachanyanya kusimba.

¹⁰“Asi uyai, imi mose, edzaizve! Handingawani murume ane uchenjeri pakati penyu.

¹¹Mazuva angu apfuura, urongwa hwangu hwaparadzwa, saizvozvowo zvishuvo zvomwoyo wangu.

¹²Vanhu ava vanoshandura usiku kuti huve masikati; mukati merima ivo vanoti, ‘Chiedza chiri pedyo.’

¹³Kana musha wandinotarisira uri guva chete, kana ndikawaridzira mubhedha wangu murima,

¹⁴kana ndikati kuuori, ‘Ndiwe baba vangu,’ nokuhonye ndikati, ‘Ndiwe mai vangu’ kana ‘Hanzvadzi yangu,’

¹⁵ko, tariro yangu iripi zvino? Ndianiko angaona tariro yangu?

¹⁶Ichaburukira kumasuo orufu here? Tichaburukira muguruva pamwe chete here?”