Read Bhaibheri Dzvene MuChiShona Chanhasi Jobho 18 Bible Online

Jobho 18 - Bhaibheri Dzvene MuChiShona Chanhasi bible

Jobho 18

¹Ipapo Bhiridhadhi muShuhi akapindura akati:

²“Muchapedza kutaura uku riiniko? Chimbonyatsofungai, ipapo tigotaurirana hedu.

³Tinobatirweiko semombe uye tichionekwa samapenzi pamberi penyu?

⁴Iyewe unozvibvamburanya mukutsamwa kwako, nyika ingasiyiwa nokuda kwako here? Kana matombo angafanira kubviswa panzvimbo yawo here?

⁵“Mwenje weakaipa unodzimwa; murazvo womoto wake unopera kupisa.

⁶Chiedza chiri mutende rake chinova rima; mwenje uri parutivi pake unodzima.

⁷Simba renhambwe dzake rinorukutika; mano ake pachake anomuwisira pasi.

⁸Tsoka dzake dzinomuwisira mumumbure, uye anodzungaira ari mumaburi awo.

⁹Musungo unomubata chitsitsinho; rugombe runomubatisisa.

¹⁰Chishwe chakavanzwa muvhu nokuda kwake; musungo wakaradzikwa munzira yake.

¹¹Kutyisa kunomuvhundutsa kumativi ose, uye kunomuteverera panhambwe dzake dzose.

¹²Pfumvu inomudokwairira; njodzi yakamugaririra paanowa.

¹³Inodya zvikamu zveganda rake; dangwe rorufu rinopedza mitezo yake.

¹⁴Anodzurwa kubva patende raanovimba naro agoendeswa kuna mambo anotyisa kwazvo.

¹⁵Moto unogara mutende rake; safuri inopisa inoparadzirwa pamusoro pougaro hwake.

¹⁶Moto unogara mutende rake; uye matavi ake anosvava kumusoro.

¹⁷Kurangarirwa kwake kunopera panyika; haana zita munyika.

¹⁸Anobviswa pachiedza achiendeswa murima, uye anodzingwa panyika.

¹⁹Haana mwana kana chizvarwa chinotevera pakati pavanhu vokwake, hakuna akasara kwaaimbogara.

²⁰Varume vokumavirira vakakatyamara namagumo ake; varume vokumabvazuva vakabatwa nokutya kukuru.

²¹Zvirokwazvo, ndizvo zvakaita ugaro hwomurume akaipa; iyoyi ndiyo nzvimbo yomunhu asingazivi Mwari.”