Read Bhaibheri Dzvene MuChiShona Chanhasi Jobho 19 Bible Online

Jobho 19 - Bhaibheri Dzvene MuChiShona Chanhasi bible

Jobho 19

¹Ipapo Jobho akapindura akati:

²“Mucharamba muchinditambudza uye muchindipwanya namashoko kusvikira riniko?

³Zvino kava kagumi kose muchingonditsoropodza; munondirwisa musina nenyadzi dzose.

⁴Kana chiri chokwadi kuti ndakatsauka, kukanganisa kwangu kuchava dambudziko rangu ndoga.

⁵Kana zvechokwadi mungada henyu kuzvikudza pamusoro pangu mukashandisa kuderedzwa kwangu pakundirwisa,

⁶zvino muzive imi kuti Mwari akandikanganisira uye akandikomberedza nomumbure wake.

⁷“Kunyange ndikachema ndichiti, ‘Ndakakanganisirwa we-e!’ handiwani mhinduro; kunyange ndikadanidzira kuti ndibatsirwe, kururamisirwa hakupo.

⁸Akadzivira nzira yangu kuti ndikonewe kupfuura; akaisa rima munzira dzangu.

⁹Akandibvisira kukudzwa kwangu, uye akabvisa korona mumusoro mangu.

¹⁰Anondibvamburanya kumativi ose kusvikira ndapera; anodzura tariro yangu kunge muti,

¹¹Kutsamwa kwake kunopfuta pamusoro pangu; anondiverenga pakati pavavengi vake.

¹²Mauto ake anouya nesimba; anovaka muchinjiziri wokurwa neni, anokomba tende rangu.

¹³“Akaisa hama dzangu kure neni; vazikani vangu vakaparadzaniswa neni zvachose.

¹⁴Hama dzangu dzepedyo dzakaenda kure neni; shamwari dzangu dzandikanganwa.

¹⁵Vaenzi vangu navarandakadzi vangu vava kundiita mubvakure; vanondiona somutorwa.

¹⁶Ndinodana muranda wangu, asi haapinduri, kunyange ndikamukumbirisa nomuromo wangu chaiwo.

¹⁷Kufema kwangu kunonyangadza kumukadzi wangu; ndinosemesa kuhama dzangu chaidzo.

¹⁸Kunyange nezvikomana zviduku zvinondiseka; pandinosvika vanondituka.

¹⁹Shamwari dzangu dzepedyo dzinondisema; vaya vandinoda vandishandukira.

²⁰Handisati ndichiri chinhu asi ndangova hangu ganda namapfupa; ndangopunyuka napaburi retsono.

²¹“Ndinzwirei urombo, shamwari dzangu, ndinzwirei urombo nokuti ruoko rwaMwari rwandirova.

²²Seiko muchindidzingirira sezvinoita Mwari? Ko, hamungaguti nenyama yangu here?

²³“Haiwa, dai mashoko angu ainyorwa hawo, dai ainyorwa hawo mubhuku,

²⁴dai ainyorwa nechinyoreso chesimbi pamutobvu, kana kuti ainyorwa padombo nokusingaperi!

²⁵Ndinoziva kuti mudzikinuri wangu mupenyu, uye kuti pakupedzisira achamira pamusoro penyika.

²⁶Uye shure kwokunge ganda rangu raparara, kunyange zvakadaro ndichaona Mwari munyama yangu;

²⁷ini pachangu ndichamuona nameso angu pachangu, iyeni kwete mumwe. Haiwa, mwoyo wangu unopanga sei mukati mangu!

²⁸“Kana muchiti, ‘Haiwa tichamutambudza sei, sezvo mudzi wenhamo uri maari,’

²⁹munofanira kutya munondo imi pachenyu, nokuti hasha dzichauyisa kurangwa nomunondo, ipapo muchaziva kuti pano kutongwa.”