Read Bhaibheri Dzvene MuChiShona Chanhasi Jobho 20 Bible Online

Jobho 20 - Bhaibheri Dzvene MuChiShona Chanhasi bible

Jobho 20

¹Ipapo Zofari muNaamati akapindura akati:

²“Ndangariro dzangu dzokutambudzika dzinondikurumidzisa kuti ndipindure nokuti ndakanganisika kwazvo.

³Ndiri kunzwa kutsiura kunondizvidza, uye kunzwisisa kwangu kunondikurudzira kuti ndipindure.

⁴“Zvirokwazvo unoziva zvazvakanga zvakaita kubva kare, kubvira pakaiswa munhu panyika,

⁵kuti kufara kwavakaipa kupfupi, mufaro wavasina Mwari ndowenguva duku.

⁶Kunyange kuzvikudza kwake kuchisvika kudenga, uye musoro wake uchindobata makore,

⁷achaparara nokusingaperi, setsvina yake pachake; vaya vaichimbomuona vachati, ‘Aripiko?’

⁸Anobhururuka sokurota, haachawanikwizve, adzingwa sechiratidzo chousiku.

⁹Ziso rakamuona harichazomuonazve; nzvimbo yake haichazomuonazve.

¹⁰Vana vake vanofanira kutsvaka nyasha kuvarombo; maoko ake chaiwo anofanira kudzorera pfuma yake.

¹¹Simba roujaya rakazadza mapfupa ake richaumburuka naye muguruva.

¹²“Kunyange chakaipa chichitapira mumukanwa, uye achichiviga pasi porurimi rwake,

¹³kunyange asingagoni kuchiregedza achichichengeta mumukanwa make,

¹⁴asi chokudya chake chichashanduka chikavava mudumbu make; chichava uturu hwenyoka mukati make.

¹⁵Achapfira pasi upfumi hwaakamedza; Mwari achaita kuti dumbu rake rizvirutse.

¹⁶Achasveta uturu hwenyoka; mazino emvumbi achamuuraya.

¹⁷Haangafadzwi nehova, idzo nzizi dzinoyerera uchi noruomba.

¹⁸Zvaakatamburira anofanira kuzvidzosazve zvisina kudyiwa; haangafadzwi nezvaakawana pakutengesa kwake.

¹⁹Nokuti akamanikidza varombo akavasiya vava vachena; akatora dzimba dzavasina chavanacho.

²⁰“Zvirokwazvo haangamiri kubva pahavi yake; haangazviponesi nepfuma yake.

²¹Hapana chaakasiyirwa kuti adye; upfumi hwake hahungagari nokusingaperi.

²²Pakati pezvakawanda zvake, kuremerwa nepfungwa kuchamukunda; kuzara kwenjodzi kuchauya pamusoro pake.

²³Paanenge agutsa dumbu rake, Mwari achatuma kutsamwa kwake kunopisa pamusoro pake, uye achanayisa kurova kwake pamusoro pake.

²⁴Kunyange akatiza chombo chesimbi, museve unopinza wendarira unomubaya.

²⁵Anoudzura kubva kumusana kwake, muromo wawo unovaima uchibva pachiropa chake. Kutya kuzhinji kuchauya pamusoro pake;

²⁶rima guru richavandira pfuma yake. Moto usina anopfutidzira uchamupisa uye uchaparadza zvichasara mutende rake.

²⁷Matenga achaisa pachena mhaka yake; nyika ichamumukira.

²⁸Mafashamu achakukura imba yake, mvura zhinji ichaerera pazuva rehasha dzaMwari.

²⁹Aya ndiwo magumo anogoverwa vakaipa naMwari, iyo nhaka yavakatemerwa naMwari.”