Read Bhaibheri Dzvene MuChiShona Chanhasi Jobho 21 Bible Online

Jobho 21 - Bhaibheri Dzvene MuChiShona Chanhasi bible

Jobho 21

¹Ipapo Jobho akapindura akati:

²“Teereresa mashoko angu; uku ngakuve kunyaradza kwaunondipa.

³Ndiitire mwoyo murefu ndichitaura hangu, uye kana ndapedza kutaura, urambe uchiseka hako.

⁴“Ko, kunyunyuta kwangu kwakanangana nomunhu here? Ndingatadza seiko kuora mwoyo?

⁵Nditarire ushamiswe; ufumbire muromo wako noruoko.

⁶Ndinotya, pandinofunga izvi; kudedera kunobata muviri wangu.

⁷Nemhaka yeiko vakaipa vachirarama, vachikwegura uye vachiwedzerwa simba?

⁸Vanoona vana vavo vachikura ivo vachiri vapenyu, zvizvarwa zvavo pamberi pavo.

⁹Misha yavo igere zvakanaka uye haina chainotya; shamhu yaMwari haisi pamusoro pavo.

¹⁰Hando dzavo hadzikonewi kubereka, mhou dzavo dzinobereka mhuru dzisingasvodzi.

¹¹Vanobudisa vana vavo seboka ramakwai; vapwere vavo vanopembera vachitamba.

¹²Vanoimba vachiridzirwa tambureni nembira; vanofarira kurira kwenyere.

¹³Vanopedza makore avo mukubudirira uye vanopinda muguva nenguva isipi.

¹⁴Kunyange zvakadaro vanoti kuna Mwari, ‘Tisiyei takadaro! Hatina hanya nokuziva nzira dzenyu.

¹⁵Wamasimba Ose ndianiko, kuti timushumire? Tinowaneiko kana tikamunamata?’

¹⁶Asi kubudirira kwavo hakusi mumaoko avo, naizvozvo ndinomira kure nerangano yevakaipa.

¹⁷“Kunyange zvakadaro, kanganiko kanodzimwa mwenje wevakaipa? Kanganiko vachiwirwa nenjodzi, magumo anotarwa naMwari mukutsamwa kwake?

¹⁸Vanofanana namakoto anopeperetswa nemhepo runganiko, sehundi inokukurwa nedutu?

¹⁹Zvinonzi, ‘Mwari anochengetera vana vomunhu kutongwa.’ Ngaamutsive iye amene, kuitira kuti agozviziva!

²⁰Meso ake pachake ngaaone kuparadzwa kwake; iye ngaanwe kutsamwa kwoWamasimba Ose.

²¹Nokuti ane hanya yeiko nemhuri yaanosiya shure, mwedzi yaakagoverwa zvoyopera?

²²“Ko, pane munhu angagona kudzidzisa ruzivo kuna Mwari here, iye achitonga kunyange vari pamusoro-soro?

²³Mumwe munhu anofa achine simba rake rizere, akachengetedzeka uye akagadzikana,

²⁴muviri wake wakagwinya, mapfupa ake azere nomwongo.

²⁵Mumwe munhu anofa ane shungu dzomwoyo, asina kumbonakidzwa nezvipi zvazvo zvakanaka.

²⁶Vanovata muguruva pamwe chete, uye honye dzinovafukidza vose.

²⁷“Ndinoziva chose zvamunofunga, iwo mano amungandikanganisa nawo.

²⁸Imi munoti, ‘Imba yomunhu mukuru iripiko zvino, iwo matende aigarwa navanhu vakaipa?’

²⁹Hauna kumbobvunza vafambi vaya here? Hauna kuva nehanya nenhoroondo dzavo here,

³⁰dzokuti munhu akaipa anodarikwa pazuva renjodzi, kuti anorwirwa pazuva rokutsamwa?

³¹Ndianiko anotsoropodza mafambiro ake pachena? Ndianiko anomuripira pane zvaakaita?

³²Iye anotakurwa achiendeswa kuguva, uye rinda rake rinorindwa.

³³Ivhu romunhika rinotapira kwaari; vanhu vose vanomutevera, uye anotungamirirwa navazhinji vasingaverengeki.

³⁴“Saka mungandinyaradza sei nezvisina maturo? Hapana chasara pakupindura kwenyu asi nhema dzoga!”