Read Bhaibheri Dzvene MuChiShona Chanhasi Jobho 22 Bible Online

Jobho 22 - Bhaibheri Dzvene MuChiShona Chanhasi bible

Jobho 22

¹Ipapo Erifazi muTemani akapindura akati:

²“Ko, munhu angabatsira Mwari here? Kunyange munhu akachenjera angamubatsira here?

³Wamasimba Ose angawana mufaro weiko dai iwe wakarurama? Aibatsirwa neiko dai nzira dzako dzaiva dzakarurama?

⁴“Imhaka yokumunamata kwako here zvaanokutsiura uyewo achikupa mhosva?

⁵Zvakaipa zvako hazvina kukura here? Handiti zvivi zvako hazviperi?

⁶Wakakumbira rubatso kuhama dzako pasina; wakatorera vanhu nguo dzavo, uchivasiya vasina kupfeka.

⁷Wakanyima mvura vakaneta uye wakanyima vane nzara zvokudya,

⁸kunyange wakanga uri munhu ane simba, ane minda yake, uri munhu anokudzwa, agere pairi.

⁹Wakadzinga chirikadzi dzisina chinhu uye wakavhuna simba renherera.

¹⁰Ndokusaka misungo yakakukomberedza, ndokusaka njodzi ichikuvhundutsa,

¹¹ndokusaka kuine rima usingakwanisi kuona, uye mafashamu emvura achikufukidza.

¹²“Ko, Mwari haazi kumusoro kwokudenga here? Tarira kukwirira kwakaita nyeredzi dzokumusoro-soro!

¹³Asi imi munoti, ‘Mwari anoziveiko? Ko, anotonga murima rakadai here?

¹⁴Makore matema anomufukidza, saka haationi paanofamba-famba padenderedzwa ramatenga.’

¹⁵Ko, iwe ucharambira munzira yakare iya yakatsikwa navanhu vakaipa here?

¹⁶Ivo vakabvutwa nguva yavo isati yasvika, hwaro hwavo hwakakukurwa namafashamu.

¹⁷Vakati kuna Mwari, ‘Tisiyei takadaro! Wamasimba Ose angaiteiko kwatiri?’

¹⁸Sezvo ari iye akazadza dzimba dzavo nezvinhu zvakanaka, ndinomira kure namano avakaipa.

¹⁹“Vakarurama vanoona kuparadzwa kwavo vagofara, vasina mhaka vanovaseka vachiti,

²⁰‘Zvirokwazvo vadzivisi vedu vaparadzwa, uye moto unopedza pfuma yavo.’

²¹“Zviise pasi paMwari ugova norugare naye, nenzira iyi kubudirira kuchasvika kwauri.

²²Gamuchira kurayira kunobva mumuromo make uye uchengete mashoko ake mumwoyo.

²³Kana ukadzokera kuna Wamasimba Ose, uchadzoredzerwa: Kana ukabvisa zvakaipa uchizviisa kure netende rako,

²⁴uye ukaisa goridhe rako paguruva, iro goridhe rako rokuOfiri kumatombo okunzizi,

²⁵ipapo Wamasimba Ose achava goridhe rako, iyo sirivha yako yakanyatsosanangurwa.

²⁶Zvirokwazvo ipapo uchawana mufaro muna Wamasimba Ose, uye uchasimudzira chiso chako kuna Mwari.

²⁷Uchanyengetera kwaari, uye achakunzwa, uye iwe uchazadzisa zvawakapika.

²⁸Zvaunotaura sechirevo zvichaitika, uye chiedza chichavhenekera panzira dzako.

²⁹Vanhu pavanodzikiswa iwe ukati, ‘Vasimudzei!’ ipapo vakaderedzwa vachaponeswa.

³⁰Achadzikinura kunyange uyo ane mhosva, acharwirwa kubudikidza nokuchena kwamaoko ako.”