Read Bhaibheri Dzvene MuChiShona Chanhasi Jobho 23 Bible Online

Jobho 23 - Bhaibheri Dzvene MuChiShona Chanhasi bible

Jobho 23

¹Ipapo Jobho akapindura akati:

²“Kunyange nanhasi ndinonyunyuta ndine shungu; ruoko rwake runondiremera kunyange ndiri pakugomera kwangu.

³Dai chete ndaiziva kwandingamuwana; dai chete ndaigona kuenda kwaanogara!

⁴Ndaitaura hangu mhaka yangu pamberi pake, uye ndaizadza muromo wangu nenharo.

⁵Ndaizoziva hangu zvaaizondipindura, uye ndaizocherechedza zvaaizoreva.

⁶Kuti aizondidzivisa nesimba guru here? Kwete, haaizondipomera mhaka.

⁷Ipapo munhu akarurama aigona kuzotaura mhaka yake pamberi pake, uye ndaizosunungurwa kubva pamutongi wangu nokusingaperi.

⁸“Asi kana ndikaenda kumabvazuva, iye haako; kana ndikaenda kumavirira, handimuwani.

⁹Paanenge ari pabasa nechokumusoro, handimuoni; paanotsaukira zasi, handikwanisi kumuona.

¹⁰Asi iye anoziva nzira yandinofamba nayo; kana apedza kundiedza, ndichabuda ndava segoridhe.

¹¹Tsoka dzangu dzakanyatsotevera paakatsika; ndakarambira panzira dzake ndisingambotsaukiri parutivi.

¹²Handina kumbobva pamirayiro yemiromo yake; ndakakoshesa mashoko omuromo wake kupfuura chingwa changu chamazuva ose.

¹³“Asi iye anomira oga, uye ndiani angapikisana naye? Anoita zvaanoda.

¹⁴Anoita zvaakatema pamusoro pangu, uye urongwa huzhinji hwakadai achinahwo mudura rake.

¹⁵Ndokusaka ndichitya pamberi pake; pandinofunga nezvose izvi, ndomutya.

¹⁶Mwari akaita kuti mwoyo wangu unete; Wamasimba Ose akandivhundutsa.

¹⁷Kunyange zvakadaro rima harina kuita kuti ndinyarare, iro rima guru rinofukidza chiso changu.