Read Bhaibheri Dzvene MuChiShona Chanhasi Jobho 27 Bible Online

Jobho 27 - Bhaibheri Dzvene MuChiShona Chanhasi bible

Jobho 27

¹Zvino Jobho akapfuurira mberi nokutaura achiti:

²“Zvirokwazvo naMwari mupenyu, iye akaramba kundiruramisira, iye Wamasimba Ose, akaita kuti ndinzwe shungu pamwoyo wangu,

³chero ndichine upenyu mandiri, ndichine kufema kwaMwari mumhino dzangu,

⁴miromo yangu haingatauri zvakashata, uye rurimi rwangu harungatauri nokunyengera.

⁵Handingambobvumi kuti muri kutaura chokwadi; kusvikira ndafa, handizorambi kururama kwangu.

⁶Ndichachengetedza kururama kwangu uye handingakuregedzi; hana yangu haingandipi mhosva ndichiri mupenyu.

⁷“Vavengi vangu ngavaite savakaipa, navadzivisi vangu savasakarurama!

⁸Ko, munhu asina Mwari ane tariro yeiko kana afa, Mwari paanotora upenyu hwake?

⁹Ko, Mwari anoteerera kuchema kwake paanowirwa nenhamo here?

¹⁰Iye angawana mufaro muna Wamasimba Ose here? Ko, achadana kuna Mwari panguva dzose here?

¹¹“Ndichakudzidzisai nezvesimba raMwari; nzira dzaWamasimba Ose handingadzivanzi.

¹²Imi mose makazviona izvi pachenyu. Zvino munotaurireiko zvisina maturo?

¹³“Haano magumo anogoverwa vakaipa naMwari, iyo nhaka inogamuchirwa navanhu vano utsinye, kubva kuna Wamasimba Ose.

¹⁴Hazvinei kuti vana vake vakawanda sei, magumo avo munondo; zvizvarwa zvake hazvizombowani zvokudya zvakakwana.

¹⁵Denda richaviga vaya vanenge vasara, uye chirikadzi dzavo hadzingavachemi.

¹⁶Kunyange akaunganidza sirivha seguruva, uye zvokupfeka zvikaita somurwi wevhu,

¹⁷zvaanowana zvichapfekwa navakarurama, uye vasina mhaka vachagovana sirivha yake.

¹⁸Imba yaanovaka yakaita sedende rechipfukuto, sechirindo chakaitwa nomurindi.

¹⁹Anovata pasi akapfuma, asi haachazviitizve; paanosvinura meso ake, wanei zvose zvaenda.

²⁰Zvinotyisa zvinomubata kufanana namafashamu; dutu rinomubvutira kure panguva yousiku.

²¹Mhepo yokumabvazuva inomutakura ichimuendesa kure, achibva zvachose. Inomukukura kubva panzvimbo yake.

²²Inovhuvhuta paari isingamunzwiri ngoni, paanenge achitiza akati tande achitiza simba rayo.

²³Inomuomberera maoko ichimuseka, ichishinyira ichiita kuti abve panzvimbo yake.