Read Bhaibheri Dzvene MuChiShona Chanhasi Jobho 28 Bible Online

Jobho 28 - Bhaibheri Dzvene MuChiShona Chanhasi bible

Jobho 28

¹“Mugodhi wesirivha uripo, nenzvimbo inonatswa goridhe.

²Simbi inocherwa pasi, uye ndarira inonyautswa ichibva pamhangura.

³Munhu anoita kuti rima ripere; anotsvakisisa kusvikira kumucheto chaiko, mhangura iri murima rakasviba kwazvo.

⁴Anovhura mugodhi kure nokunogara vanhu, kunzvimbo dzakakanganikwa norutsoka rwomunhu; kure navanhu anorezuka ndokuzeya uku nokuku.

⁵Iyo nyika, zvokudya zvichibva mairi, inoshandurwa nechapasi seinoshandurwa nemoto,

⁶safire inobva mumatombo ayo, uye guruva rayo rine upfu hwegoridhe,

⁷Hakuna gondo rinoziva nzira iyo yakavanzika, hakuna ziso rorukodzi rakaiona.

⁸Mhuka dzinozvikudza hadziisi rutsokapo, uye hakuna shumba inofambapo.

⁹Ruoko rwomunhu runorova dombo romusarasara uye ronoisa midzi yamakomo pachena.

¹⁰Anochera mugero nomumatombo; meso ake anoona pfuma yawo yose.

¹¹Anotsvakisisa panotangira nzizi uye anobudisa zvinhu zvakavanzika pachena.

¹²“Asi uchenjeri hungawanikwepiko? Kunzwisisa kunogarepiko?

¹³Munhu haanzwisisi kukosha kwahwo; hahungawanikwi munyika yavapenyu.

¹⁴Pakadzika panoti, ‘Hahuzi mandiri.’ Gungwa rinoti, ‘Hahuzi pandiri.’

¹⁵Hahungatengwi negoridhe yakaisvonaka, uye mutengo wahwo haungayerwi nesirivha.

¹⁶Hahungatengwi negoridhe reOfiri, namatombo anokosha eonikisi kana esafire.

¹⁷Hahungaenzaniswi negoridhe kana kristari, uye hahungatsinhaniswi nezvishongo zvegoridhe.

¹⁸Korari nejasipa hazvingatongorehwi; mutengo wouchenjeri unokunda maparera.

¹⁹Topazi yeEtiopia haingaenzaniswi nahwo; hahungatongotengwi negoridhe rakaisvonaka.

²⁰“Zvino uchenjeri hunobvepiko? Kunzwisisa kunogarepiko?

²¹Kwakavanzirwa meso ezvipenyu zvose, zvakavigwa kunyange kushiri dzedenga.

²²Kuparadza noRufu zvinoti, ‘Runyerekupe rwahwo chete ndirwo rwakasvika munzeve dzedu.’

²³Mwari oga ndiye anonzwisisa nzira inoenda kwahuri, uye ndiye oga anoziva kwahunogara,

²⁴nokuti anoona magumo enyika, uye anoona zvinhu zvose zviri pasi pamatenga.

²⁵Paakasimbisa simba remhepo uye akayera mvura,

²⁶paakaita chirevo chemvura negwara rokutinhira wemheni,

²⁷ipapo akatarira kuuchenjeri akahunzvera; akahusimbisa uye akahuedza.

²⁸Zvino akati kumunhu, ‘Kutya Ishe, ndihwo uchenjeri, uye kusiya zvakaipa ndiko kunzwisisa.’ ”