Read Bhaibheri Dzvene MuChiShona Chanhasi Jobho 29 Bible Online

Jobho 29 - Bhaibheri Dzvene MuChiShona Chanhasi bible

Jobho 29

¹Jobho akapfuurira mberi nokutaura kwake achiti:

²“Haiwa ndinoshuva sei mwedzi yakapfuura, iwo mazuva andairindirwa naMwari,

³mwenje wake pawaivhenekera pamusoro pangu uye ndaivhenekerwa nechiedza chake ndichifamba murima!

⁴Haiwa, iwo mazuva andakanga ndichine simba, ushamwari hwaMwari chaihwo huchiropafadza imba yangu,

⁵Wamasimba Ose paakanga achineni uye vana vangu pavakanga vakandipoteredza,

⁶painyorovedzwa nzira yangu noruomba, uye dombo richindidururira hova dzamafuta omuorivhi.

⁷“Pandakaenda kusuo reguta ndikandogara muchivara,

⁸majaya akandiona akatsaukira parutivi uye vatana vakasimuka;

⁹vakuru vakaramba kutaura vakafumbira miromo yavo namaoko avo;

¹⁰manzwi avakuru akanyararidzwa, uye ndimi dzavo dzikanamira kumusoro kwemiromo yavo.

¹¹Vose vakandinzwa vakataura zvakanaka pamusoro pangu, uye vose vakandiona vakandirumbidza,

¹²nokuti ndakanunura varombo vaichemera rubatsiro, uye nherera dzakanga dzisina anobatsira.

¹³Munhu akanga ofa akandiropafadza; ndakaita kuti mwoyo wechirikadzi uimbe.

¹⁴Ndakafuka kururama sechipfeko changu; kururamisira kwaiva nguo yangu nenguwani yangu.

¹⁵Ndakanga ndiri meso kumapofu namakumbo kuzvirema.

¹⁶Ndakanga ndiri baba kuna vanoshayiwa; ndaimiririra mhaka yomutorwa.

¹⁷Ndakavhuna meno emunhu akanga akaipa, ndikabvuta chaakanga akaruma.

¹⁸“Ndakafunga kuti, ‘Ndichafira mumba mangu, mazuva angu awanda sejecha.

¹⁹Midzi yangu ichasvika kumvura, uye dova richava pamatavi angu usiku hwose.

²⁰Kukudzwa kwangu kucharamba kuri kutsva pandiri, uta hucharamba huri hutsva muruoko rwangu.’

²¹“Vanhu vakanditeerera vachitarisira kwazvo, vanyerere vakamirira kurayira kwangu.

²²Shure kwokutaura kwangu, ivo havana kuzotaurazve; mashoko angu akawira panzeve dzavo zvinyoronyoro.

²³Vakandimirira kunge vakamirira mvura yomupfunhambuya, uye vakanwa mashoko angu kunge mvura yechirimo.

²⁴Pandakanyemwerera kwavari havana kuzvitenda; chiedza chechiso changu chaikosha kwavari.

²⁵Ndakavasarudzira nzira ini ndokugara saishe wavo; ndakagara samambo pakati pamauto ake; ndakanga ndakaita somunhu anonyaradza vanochema.