Read Bhaibheri Dzvene MuChiShona Chanhasi Jobho 3 Bible Online

Jobho 3 - Bhaibheri Dzvene MuChiShona Chanhasi bible

Jobho 3

¹Shure kwaizvozvo, Jobho akashamisa muromo wake ndokutuka zuva rokuberekwa kwake.

³“Zuva rokuberekwa kwangu ngariparare, uye nousiku hwakanzi, ‘Kwaberekwa mwanakomana!’

⁴Zuva iroro ngarishanduke rive rima; Mwari wokudenga ngaarege kuva nehanya naro; Chiedza ngachirege kuvhenekera pamusoro paro.

⁵Rima nomumvuri wakasviba ngazviritore zvakare; gore ngarigare pamusoro paro; kusviba ngakufukidze chiedza charo.

⁶Usiku uhwo rima guru ngaribate; ngahurege kuverengwa pakati pamazuva egore kana kunyorwa pamwedzi ipi zvayo.

⁷Usiku uhwo ngahushaye chibereko; ngaparege kunzwika kupembera kwomufaro mahuri.

⁸Vanotuka mazuva ngavatuke zuva iro, vaya vakagadzirira kumutsa Chikara Chikuru cheGungwa.

⁹Nyeredzi dzahwo dzamangwanani ngadzisvibe; ngahumirire chiedza chamasikati pasina uye ngahurege kuona hwerazuva hwamambakwedza;

¹⁰nokuti hahuna kundipfigira mikova yechizvaro kuti huvanze dambudziko pamberi pangu.

¹¹“Ko, ndakaregererei kufa pakuberekwa kwangu, nokufa pandaibuda mudumbu?

¹²Mabvi akavapo seiko kuti andigamuchire namazamu kuti ndinwe?

¹³Nokuti zvino ndingadai ndakavata murugare; ndingadai ndivete uye ndakazorora

¹⁴namadzimambo namakurukota enyika, vakazvivakira nzvimbo dzava matongo zvino,

¹⁵navatongi vakanga vane goridhe, vakazadza dzimba dzavo nesirivha.

¹⁶Kana kuti sei ndisina kuvigwa muvhu somwana asina kusvika, somucheche asina kumboona chiedza chezuva?

¹⁷Ikoko vakaipa vanorega kutambudza, uye ikoko vakaneta vakazorora.

¹⁸Nhapwa dzinofarirawo rugare rwadzo; havachanzwizve kudanidzira kwomuchairi wenhapwa.

¹⁹Vaduku navakuru variko, uye nhapwa yakasunungurwa kubva pana tenzi wayo.

²⁰“Chiedza chinopirweiko vaya vari kusurukirwa, uye upenyu kune ane shungu pamwoyo,

²¹kuna vaya vanoshuva kufa irwo rusingauyi, vanorutsvaka kupfuura pfuma yakavanzika,

²²vazere nomufaro uye vanofara pavanosvika muguva?

²³Upenyu hunopirweiko munhu ane nzira yakavanzika, iye akakomberedzwa naMwari noruzhowa?

²⁴Nokuti mafemo anosvika kwandiri pachinzvimbo chezvokudya, kugomera kwangu kunodururwa semvura.

²⁵Zvandaitya zvakandivinga; zvandaizeza zvaitika kwandiri.

²⁶Handina rugare, handina runyararo; handina zororo, asi nhamo chete.”