Read Bhaibheri Dzvene MuChiShona Chanhasi Jobho 30 Bible Online

Jobho 30 - Bhaibheri Dzvene MuChiShona Chanhasi bible

Jobho 30

¹“Asi zvino vanondiseka, varume vaduku kwandiri, vane madzibaba andaishora zvokuti handaivaisa pakati pembwa dzinofudza makwai angu.

²Ko, simba ramaoko avo raizondibatsirei, sezvo simba ravo rakanga rapera?

³Vapererwa nokuda kwokushayiwa uye nenzara, vakadzivaira usiku munyika yakaoma, mumatongo nomunyika yakaparara.

⁴Vakaunganidza miriwo inovavira kubva mumakwenzi, uye zvokudya zvavo zvakanga zviri mudzi womuti womurara.

⁵Vakabviswa pakati pavanhu vokwavo, vachitukwa kunge vakanga vari mbavha.

⁶Vakamanikidzwa kuti vagare mukati mehova dzakaoma, pakati pamatombo nomumakomba, muvhu.

⁷Vakarira samakwai pakati pamakwenzi, uye vakamanikidzana pasi porukato.

⁸Vakanga vari vanhu vakazvidzika vasina zita, vakadzingwa kubva munyika.

⁹“Uye zvino vanakomana vavo vanondiseka munziyo; ndava shumo pakati pavo.

¹⁰Vanondisema uye vanomira kure neni; havazezi kundipfira mate kumeso.

¹¹Sezvo zvino Mwari akatsudunura uta hwangu uye akanditambudza, havazvidzori pamberi pangu.

¹²Kurudyi rwangu rudzi runondirwisa; vanoisira makumbo angu misungo, vanovaka michinjiziri yokurwa neni.

¹³Vanoparadza mugwagwa wangu; vanobudirira pakundiparadza, pasina munhu anovabatsira.

¹⁴Vanofamba zvavo kunge vanopinda napakakoromoka; pakati pamatongo vanongopinda zvavo.

¹⁵Zvinotyisa zvinondibata; kukudzwa kwangu kwabviswa sokunge nemhepo, kuchengetedzeka kwangu kwapera segore.

¹⁶“Uye zvino upenyu hwangu hwava kuguma; mazuva okutambudzika anondibata.

¹⁷Usiku hunobaya mapfupa angu; zvinondiruma-ruma zvinorwadza hazvizorori.

¹⁸Nesimba rake guru Mwari anova chipfeko kwandiri; anondisunga somutsipa wenguo yangu.

¹⁹Anondikanda mumatope, uye ndava seguruva namadota.

²⁰“Ndinochema kwamuri, imi Mwari, asi hamundipinduri; ndinosimuka, asi munongonditarisa zvenyu.

²¹Munondishandukira noutsinye; munondirova nesimba roruoko rwenyu.

²²Munondibvuta mondidzingira pamberi pemhepo; munonditenderedza mudutu.

²³Ndinoziva kuti muchandiburutsa muchindiendesa kurufu, kunzvimbo yakatsaurirwa vapenyu vose.

²⁴“Zvirokwazvo, hakuna munhu anobata munhu ari kushushikana paanochemera rubatsiro pakutambudzika kwake.

²⁵Ko, handina kuchema nokuda kwevaitambura here? Ko, mweya wangu hauna kuva neshungu pamusoro pavarombo here?

²⁶Kunyange zvakadaro, pandakanga ndakarindira zvakanaka, zvakaipa zvakasvika; pandakatarisira chiedza, ipapo rima rakasvika.

²⁷Kumonyoroka kwoura hwangu hakumbomiri; mazuva okutambudzika anondivinga.

²⁸Ndinodzungaira ndichisvibiswa, asi kwete nezuva; ndinosimuka pakati peungano ndichichemera rubatsiro.

²⁹Ndava hama yamakava, neshamwari yamazizi.

³⁰Ganda rangu riri kusviba uye riri kufunuka; muviri wangu unopisa nefivha.

³¹Mbira dzangu dzava kungoridza nziyo dzokuchema, uye nyere yangu nziyo dzokuungudza.