Read Bhaibheri Dzvene MuChiShona Chanhasi Jobho 31 Bible Online

Jobho 31 - Bhaibheri Dzvene MuChiShona Chanhasi bible

Jobho 31

¹“Ndakaita sungano nameso angu kuti ndirege kutarisa musikana noruchiva.

²Nokuti mugove womunhu unobva kumusoro kuna Mwari ndoweiko, iyo nhaka yake inobva kuna Wamasimba Ose?

³Ko, hakuzi kuparadzwa kwavakaipa, nenjodzi kuna avo vanoita zvakaipa here?

⁴Ko, iye haaoni nzira dzangu uye haaverengi nhambwe dzangu dzose here?

⁵“Kana ndakafamba nenzira yenhema kana kuti tsoka dzangu dzakamhanyira kunyengera,

⁶Mwari ngaandiyere pachiyero chakatendeka uye achaziva kuti handina mhosva,

⁷kana tsoka dzangu dzakatsauka kubva pagwara, kana kuti mwoyo wangu wakatevera meso angu, kana kuti maoko angu akasvibiswa,

⁸ipapo vamwe ngavadye zvandakadyara, uye mbesa dzangu ngadzidzurwe.

⁹“Kana mwoyo wangu wakanyengerwa nomukadzi, kana kuti ndakavandira pamusuo wemuvakidzani wangu,

¹⁰ipapo mukadzi wangu ngaakuye zviyo zvomumwe murume, uye vamwe varume ngavavate naye.

¹¹Nokuti chingadai chiri chinhu chinonyadzisa, chivi chinofanira kutongwa.

¹²Ndiwo moto unopfuta kusvikira pakuparadzwa; ungadai wakadzura mukohwo wangu.

¹³“Kana ndichinge ndaramba kururamisira varanda vangu, pavane mhaka neni,

¹⁴ndichaita sei pandichasangana naMwari? Ndichatiiko ndikanzi ndizvidavirire?

¹⁵Ko, iye akandiisa muchizvaro haazi iye akavaita here? Ko, haazi iye mumwe chete akatiumba tose muna vanamai vedu here?

¹⁶“Kana ndakaramba zvido zvevarombo kana kurega meso echirikadzi achineta,

¹⁷kana ndakazvidyira chingwa changu, ndisingachigoverani nenherera,

¹⁸asi kubva paujaya hwangu ndakamurera sezvinoitwa nababa, uye kubva pakuberekwa kwangu ndakatungamirira chirikadzi,

¹⁹kana ndakaona mumwe achiparara nokuda kwokushaya zvokupfeka, kana munhu anoshayiwa asina nguo,

²⁰uye mwoyo wake ukasandiropafadza nokuti adziyirwa namakushe amakwai angu,

²¹kana ndakasimudzira nherera ruoko rwangu ndichiziva kuti ndinozivikanwa padare redzimhosva,

²²ipapo ruoko rwangu ngaruwe papfudzi rangu, ruwire pasi napafundo.

²³Nokuti ndaitya kuparadza kunobva kuna Mwari, uye handina kuita zvinhu zvakadaro nokuti ndaitya kubwinya kwake.

²⁴“Kana ndakaisa chivimbo changu pagoridhe, kana kuti kugoridhe rakaisvonaka ndikati, ‘Ndiwe chivimbo changu,’

²⁵kana ndakafadzwa nepfuma yangu huru, mukomborero wakabva mumaoko angu,

²⁶kana ndakava nehanya nezuva pakubwinya kwaro, kana mwedzi uchifamba mukubwinya,

²⁷zvokuti mwoyo wangu wakanyengereka pakavanda, uye ruoko rwangu rukazviremekedza nokuzvisveta,

²⁸zvino izvozviwo zvingangova zvivi zvinofanira kutongwa, nokuti ndainge ndisina kutendeka kuna Mwari wokumusoro.

²⁹“Kana ndakafadzwa nokurasikirwa kwomuvengi wangu, kana kufara zvikuru pamusoro penhamo yakamuwira,

³⁰handina kutendera muromo wangu kutadza, nokudana chituko pamusoro poupenyu hwake,

³¹kana vanhu veimba yangu vasina kumboti, ‘Ndianiko asina kumbogutswa nenyama yaJobho?’

³²Hapana mutorwa akavata usiku hwose munzira dzomumusha, nokuti musuo wangu wakaramba wakazarurirwa vashanyi.

³³Kana ndakavanza chivi changu saAdhamu, nokuviga mhosva yangu mumwoyo mangu,

³⁴nokuda kwokuti ndaitya kwazvo vanhu vazhinji, uye ndakatya kwazvo kuzvidza kwevemhuri, zvokuti ndakaramba ndinyerere ndikasabuda kunze,

³⁵“Haiwa, dai ndaiva nomumwe angandinzwa! Ndinonyora runyoro rwangu ndichizvidzivirira iye zvino, Wamasimba Ose ngaandipindure; mupomeri wangu ngaanyore rugwaro rwezvaanondipomera.

³⁶Zvirokwazvo ndairutakura pamapfudzi angu, ndairupfeka sekorona.

³⁷Ndaimupa kuzvidavirira kwangu kwenhambwe imwe neimwe; ndaiswedera kwaari somuchinda.

³⁸“Kana munda wangu ukadanidzira kwandiri uchindipa mhosva, uye miforo yose ikanyorova nemisodzi,

³⁹kana ndakadya zvibereko zvawo ndisingaripi, kana ndakaparadza upenyu hwavanourima,

⁴⁰ipapo rukato ngarumere pachinzvimbo chegorosi, nesora pachinzvimbo chebhari.” Mashoko aJobho apera.