Read Bhaibheri Dzvene MuChiShona Chanhasi Jobho 32 Bible Online

Jobho 32 - Bhaibheri Dzvene MuChiShona Chanhasi bible

Jobho 32

¹Saka varume vatatu ava vakarega kupindura Jobho, nokuti akanga akarurama pakuona kwake.

²Asi Erihu mwanakomana waBharakeri muBhuzi, wemhuri yaRami, akatsamwira Jobho zvikuru nokuda kwokuzviruramisira kwake panzvimbo yokuti zviitwe naMwari.

³Akatsamwirawo kwazvo shamwari nhatu idzi, nokuti vakanga vashayiwa nzira yokupikisa nayo Jobho, kunyange vakanga vambomupa mhosva.

⁴Zvino Erihu akanga ambomira kutaura naJobho nokuti ivo vaiva vakuru kwaari.

⁵Asi paakaona kuti varume vatatu ava vakanga vasisinazve chokureva, hasha dzake dzakamuka.

⁶Saka Erihu mwanakomana waBharakeri muBhuzi akati: “Ndiri muduku pamakore, uye imi muri vakuru; ndokusaka ndanga ndichitya, ndisingadi kukuudzai zvandinoziva.

⁷Ndakafunga kuti, ‘Zera rinofanira kutaura; makore mazhinji anofanira kudzidzisa uchenjeri.’

⁸Asi ndiwo mweya uri mumunhu, kufema kwaWamasimba Ose, kunomupa kunzwisisa.

⁹Havazi vakuru bedzi vakachenjera, kana vatana chete vanganzwisisa zvakanaka.

¹⁰“Naizvozvo ndinoti: Nditeererei; neniwo ndichakuudzai zvandinoziva.

¹¹Ndakambomirira pamaitaura, ndakateerera pfungwa dzenyu; pamakanga muchitsvaka mashoko,

¹²ndakanyatsokuteererai. Asi hakuna mumwe wenyu akapwisa Jobho; hakuna pamuri akapindura mashoko ake zvinogutsa.

¹³Regai kuti, ‘Tawana uchenjeri; regai Mwari amukonese, kwete munhu.’

¹⁴Asi Jobho haana kunongedza mashoko ake kwandiri, uye handingamupinduri namashoko enyu.

¹⁵“Vashamiswa uye havachina chokureva; vapererwa namashoko.

¹⁶Ko, zvino ini ndingamirira here ivo zvavangonyarara, zvino zvavangomira ipapo vasina mhinduro?

¹⁷Neniwo ndichava nechokutaura; neniwo ndichareva zvandinoziva.

¹⁸Nokuti ndizere namashoko, uye mweya uri mandiri unondimanikidza;

¹⁹mukati mangu ndafanana newaini iri muhomwe yakadzivirwa, sehomwe itsva dzewaini dzoda kuparuka.

²⁰Ndinofanira kutaura kuti ndirerukirwe; ndinofanira kushamisa muromo wangu ndigopindura.

²¹Handina munhu wandichatsaura, uye handingabati kumeso munhu upi zvake;

²²nokuti dai ndaiva nyanzvi yokubata kumeso, Muiti wangu aizokurumidza kunditora.