Read Bhaibheri Dzvene MuChiShona Chanhasi Jobho 33 Bible Online

Jobho 33 - Bhaibheri Dzvene MuChiShona Chanhasi bible

Jobho 33

¹“Asi zvino, Jobho, chinzwa mashoko angu; rerekera nzeve yako pane zvose zvandinoreva.

²Ndava kuchizoshamisa muromo wangu; mashoko angu ari pamuromo worurimi rwangu.

³Mashoko angu anobva pamwoyo wakarurama; muromo wangu uchataura chokwadi chandinoziva.

⁴Mweya waMwari wakandiita; kufema kwaWamasimba Ose kunondipa upenyu.

⁵Ndipindure zvino, kana uchigona; zvigadzirire ugomisidzana neni.

⁶Ini ndakangoita sewe pamberi paMwari; neniwo ndakatorwa muvhu.

⁷Kutyisa kwangu hakufaniri kukuvhundutsa, uye ruoko rwangu harufaniri kukuremera.

⁸“Asi wakati ini ndichizvinzwa, ndakanzwa mashoko acho chaiwo,

⁹‘Ndakachena uye handina chivi; ndakanaka uye handina mhosva.

¹⁰Asi Mwari awana mhosva neni; anonditi muvengi wake.

¹¹Anosunga makumbo angu nezvisungo; anocherechedza nzira dzangu dzose.’

¹²“Asi ndinokuudza kuti pachinhu ichi hauna kururama, nokuti Mwari mukuru kukunda munhu.

¹³Seiko uchimunyunyutira kuti haasi kupindura mashoko omunhu?

¹⁴Nokuti Mwari anotaura zvino neimwe nzira, pane imwe nguva neimwe nzira, kunyange munhu asingazvioni.

¹⁵Mukurota, uye muchiratidzo chousiku, hope huru padzinowira vanhu, pavanotsimwaira pamibhedha yavo,

¹⁶angangotaura munzeve dzavo uye agovavhundutsa neyambiro zhinji,

¹⁷kuti adzore munhu pakuita zvakaipa, uye nokuita kuti arege kuzvikudza,

¹⁸kuti achengetedze mweya wake pagomba, uye kuti upenyu hwake hurege kuparadzwa nomunondo.

¹⁹Kana kuti munhu angarangwa panhoo yokurwadziwa, achiramba achitambudzika mumapfupa ake,

²⁰saka upenyu hwake chaihwo hunosemburwa nezvokudya, uye mweya wake unosema zvokudya zvakaisvonaka.

²¹Anoonda kusvikira apera, uye mapfupa ake, akanga asingaonekwi, zvino obuda kunze.

²²Mweya wake unoswedera kugomba, uye upenyu hwake kunhume dzorufu.

²³“Asi kana kurutivi rwake kuine mutumwa somurevereri, mumwe kubva muchiuru, kuti audze munhu zvakamunakira,

²⁴kuti amunzwire tsitsi agoti, ‘Murwirei kuti arege kuenda kugomba; ndamuwanira dzikinuro,’

²⁵ipapo nyama yake inovandudzwa ikafanana neyomwana; inovandudzwa ikaita sapamazuva oujaya hwake.

²⁶Anonyengetera kuna Mwari agowana nyasha kwaari, anoona chiso chaMwari agopembera nomufaro; anodzoserwazve kururama kwake naMwari.

²⁷Ipapo anosvika kuvanhu agoti, ‘Ndakatadza, uye ndakaminamisa zvakanga zvakarurama, asi handina kuwana zvaindikodzera.

²⁸Akadzikinura mweya wangu pakupinda mugomba, uye ndichararama ndichifadzwa nechiedza.’

²⁹“Mwari anoita zvinhu zvose izvi kumunhu, kaviri, kunyange katatu,

³⁰kudzora mweya wake pakupinda mugomba, kuti chiedza choupenyu chivhenekere paari.

³¹“Chinzwa, Jobho, uye urerekere nzeve dzako kwandiri; nyarara, uye ini ndichataura.

³²Kana unacho chokureva, ndipindure; taurisa, nokuti ndinoda kuti ururamisirwe.

³³Asi kana zvisakadaro, chinzwa zvino kwandiri; nyarara, uye ndichakudzidzisa uchenjeri.”